1 Kronika 17 - NTSHOB NSI

Mba Natan tshob ntshob Nsi là

¹ Ndùse David tsho ntùm ze ndà là, a tshob ngatshob ntshob Nsi Natan ndù: Tshù me tshwèt ntswe ntùm ba' ze bo lo' sédra nkut yi là, nda' ndù Koṅ Kàn Tshùaben nke ntswe bam ta' ntàb.

² Natan bùnte David ndù: Ghù mba ke lo z'a ko' ntù o là, nummbe bin Nsi bèn mbe.

³ A be mo' tèttswe', Nsi tshob Natan ntùm ntshob mi ndù:

⁴ Nèn ntshob ngafa' àm David ndù: Tshù ju ze Tshùaben tshob li: A ke b'a wù nsi bèn kut ta' ba' me, ze me ghù dù'ntswe àm yi là.

⁵ Nummbe me ke' to' tswe ntùm ta' ba' fe lé'njù se me ghù Israél ko' là tà nse' nkum sènni; là me lo ke ntswe ntàb ntàb bo dù'ntswe nzenze.

⁶ Njoṅ dù' fa bag Israél ke nzin nà, me lo to' tshob sàm nu mo' mèn netèt ghasa'kam Israél tse me na' ntshob ndù bo ke mbéb yàm nzwit mèn nà ké? Me lo to' bètte ndù bin be ke kut ba' sédra me numke di ké?

⁷ Ndonni tshob ngafa' àm David ndù: Tshù ju ze Tshùaben tàndà ntsho tshob li: Me lo lo' o tshwèt njam ba mbwe, ndù o be mfen yàm nzwit mèn Israél;

⁸ me lo ke mbe bag wù njoṅ dù' fa o ke nèn nà; me lo biagte ghakeban tsho fa num miag mu, ngù lén so ju'ni, mfute se ben ndùbndùb tse bo num nsitsha' là.

⁹ Me lo fà ta' dù'ntswe yàm nzwit mèn Israél, njag i nsi ndù a ghô bwe ke bèn nyi'te, mba ndù kà ghatshùagntù bèn nsat'é mba mbwembwe là,

¹⁰ mba ngelaṅ ze me na' njab ghasa'kam num yàm nzwit mèn Israél là. Me lo kag tuswe tu ghakeban tsho. Me tshwèt nsoṅ ndù Tshùaben nsi kut ta' tunndà wù.

¹¹ Ngelaṅ tsho lé'njù nsi ku' o nèn ntèt tà tsho là, me nsi tù' bù'te nzwil o, mo' ta' nshum o, ghù fen se ghume.

¹² A yen mén nà bèn kut ta' ba' me, me ghù diaṅkwa se ghum matmat.

¹³ Me nsi be tàab, tu wul i be nshum àm; me ke nsi kwé kondèn àm yi, mba me na' ngù num mèn z'a be mbwe o là.

¹⁴ Me nsi yab i ntùm ndà àm matmat mba ntùm nufen sàm, diaṅkwa se ghum matmat.

¹⁵ Natan tshob men ntshob là fa bo yen njem nà David.

Le'te Nsi David

¹⁶ Mfen David nèn ntsin mbwe Tshùaben ntshob ndù: Tshùaben Nsi, me b'a we, yàm tunndà b'a zit k'o ngù me nse' tà nkum nsen ni dù' me be à?

¹⁷ Nsi, a tswe à mba yen njoṅ i là ke' yoṅ nku' num miag mu là! O tshwèt mbèn nka' tunndà ngafa' o mb'o nsi fà fu' yi. Tshùaben Nsi, o tshwèt njen àm mba mèn ndùb là.

¹⁸ Be David bèn ntshob wù à ndùke num nkuni mi o fà ngafa' o à? O lèn ngafa' o.

¹⁹ Tshùaben, a tshùa num ngafa' o, bo mb'a ko' ntù o là, k'o ngù tshen tshu ndùbndùb là, mbèn nda'te tshen tshu là yi.

²⁰ Tshùaben, sàm mèn ke bwe z'a fut'o là, mo' Nsi ke bwe mba wù là. Bag yé't'à num tshu tse ntoṅ mag ju' là kà mbame.

²¹ Mo' ta' ngô num bwe nsitsha' mba yub nzwit mèn Israél là ké? Wù Nsi lo se' ntshu' i, nelo' ngù yu nzwit mèn yi, ntshùa num i nte lén so. O lo ghù ba nsà boa nu netshàme, ndo' nta' ngôngô yi mbwe yu nzwit mèn z'o tshu' i bu ngô Egipto là.

²² O lo te Israél nsi ndù a be yu nzwit mèn matmat. Tu wul o bèn mb'a ze Nsi.

²³ Tshùaben, ndonni a bwô ndù ntshob mi o tshob num ngafa' o, mba num tunndà i là be ndùlala matmat. Zwiagte ntshob mu kua' mb'o na' ntshob là.

²⁴ A bwô ndù ntshob mu ghô matmat, bo ke ngamte lén so njoṅ ndù fa nke ntshob ndù; Tshùaben tàndà, Nsi Israél, b'a ta' Nsi Israél tù' i! A bwô ndù tunndà ngafa' o ghum num miag mu.

²⁵ Tu wut wù Nsi àm la'te ngafa' o me ndù o nsi te ta' tunndà me. A ndùlala ze ngafa' o me kagtùn netsin mbwe o nde't'o là.

²⁶ Ndonni me Tshùaben, o b'a Nsi, mbe ndù o bù sen fu' là ngafa' o me.

²⁷ Tam ntse tunndà ngafa' o, ndùlala ndù a ghô matmat mbwe o! Nummbe mba ke lo ze wù Tshùaben tam ntse yi là, mb'o tam ntse yi à matmat.