1 Kronika 16 - NTSHOB NSI

¹ Ndùse bo ket Koṅ Kàn Nsi nse' yi là, bo te i ntùm ntàb ze David na' ndù' num bwe là. Bo ton tshule'te tse ma' mbu mbwe Nsi.

² Ndùse David miagte neton tshule'te mba nefà tshule'te tse ma' mbu là, a yab kàn ngô num lén Tshùaben.

³ Yen nà be tôg David fà bàn, ke' mbàb bo ke' makela' nkun mba zit mén Israél lo, mandum mba mènnzwi.

Ntôndà Lévi nke njob nkwi Tshùaben

⁴ A fà fa' nefa' mbwe Koṅ Kàn Tshùaben, netsiaṅ lén se, neghamte bo nenyàmte Tshùaben Nsi Israél ntùm mbu ben Lévi.

⁵ Ben Lévi na' mb'a: Asaf, mfen; Sakaria; mbatte mfen; mbèn ngù Yeiél, Shemiramot, Yéhiél, Mattitia, Eliab, Benaya, Obéd-Edom bo Yéiél. Bo lo ghù tshu nebu' ju yi, ndoṅ boa ndoṅ nse'e; Asaf lo ke ngù bo nke nyi' ba netsha'a.

⁶ Ghafà tshule'te Benaya bo Yakaziél lo ke ntô ba nta mbwe Koṅ Kàn Nsi.

⁷ A num sen lé'njù là ze David bètte Asaf boa fèt tse mbwe yoṅ i ndù bo ke njobe, ngamte Tshùaben nà.

⁸ Bin ghamte Tshùaben, ntsiaṅ lén se. Bin ghù ngôngô lèn tshu ndùbndùb ts'a ghù là.

⁹ Bin yobe, bin ke njob nyàmt'é yi! Bin soṅ nkuni mi.

¹⁰ Bin ta' nsoṅ num lén se se nelàne! A bwô ndù ntù ben tse bo num ndiag Tshùaben nà ke ntsiaṅte.

¹¹ Bin ke ndiag Tshùaben njoṅ ndù fa bo ywimte z'a fe yi là. Bin ke ndiag se i njoṅ ndù fa.

¹² Bin kwimte kuni tshu ts'a na' ngù là, nkwimte tshu netshàm boa tsho'te ntsha ts'a tum ntshu i là.

¹³ Bin ghù ndùlala me nzwit Israél ngafa' i! Bin ghù ndùlala me bon Yakob, nummb'a tsho' zine.

¹⁴ Tshùaben b'a Nsi be, tse netsho'te ntsha fa be ntôg num njoṅ nsitsha' fa.

¹⁵ Bin ke nkwimte kàn se njoṅ ndù fa, nkwimte nka'ni mi num zwiaṅ ntsha' mbùm.

¹⁶ Kàn b'a s'a na' ngwat bo Abraham nà, nka'ni be z'a na' ngù Isak nsaṅlaṅ bwe là.

¹⁷ A lo lo' kàn nà ngù ntshù' yi Yakob, ndo' ngù kàn s'a ghô matmat là yi num bon njoṅ Israél fa;

¹⁸ ntshob ndù: Me nsi fà ngô Kanaan bin, a be zin ju.

¹⁹ Ben Tshùaben na' mb'a metsit bwoṅ yube, ndù bo ke' yàm, mbe ba ghùn mum ngô.

²⁰ Bo lo ke ndo ntùm ta' ngô nèn ntùm mo'o, nke ndo ntùm ta' nufen nèn ntùm ta' tum ngô ghua.

²¹ Nsi ke bam ndù sàm mèn ghùtni yube. A tshùa num tu bo naṅ ntsha num fenfen ntshob ndù:

²² Kà bin kwag ben tse me tsho' yub là, kà bin ghù kebwô ghatshob ntshob màm.

²³ Ben tse bo num ntswe nsitsha' là yob kwi Tshùaben. Bin ke ntshob ndù Nsi yôg zin njoṅ lé'njù fa.

²⁴ Bin soṅ nu nkuni mi netèt ngôngô, nsoṅ ntumntum kuni tshu tse ts'a ghù là,

²⁵ nummbe Tshùaben b'a mèn ndùb, nku'ni ndù bo ghamt'é. A b'a ngafét wut, ntshùa njoṅ nsi fa;

²⁶ nummbe tse nsi ntumntum fa b'a ba neto, mbe ndù Tshùaben bèn nabte kamànyam.

²⁷ Nkuni bo ghamte b'a num miag mi. Neta bo tsiaṅte be ntùm ndà i.

²⁸ Tunndà ngôngô, bin ghamte Tshùaben, Bin ghamte Tshùaben, nke ngù nku'ni yi!

²⁹ Bin ghamte Tshùaben, nyàmte lén se. Bin lo' tshu bwôntù nse' yi mbwe i. Bin ke ngwù mbwe i, nket tshu kwi wut tse nelàne.

³⁰ Bin vètte mbwe i me njoṅ ben fa tse bo nsitsha'a! Njù féb nga tse nsi, a ke' ghù nebèn nyi'te.

³¹ A bwô ndù kamànyam tsiaṅte, nsitsha' ke ṅwate! Bo ke ntshob netèt ngôngô ndù Tshùaben tshwèt ntô!

³² A bwô ndù dibantse boa tshu ts'a bwe là tshu'u. A bwô ndù tshwèt boa tshu ts'a bwe là ke ṅwate.

³³ A bwô ndù ntù mi à fèn nà tshet ngoṅ ntùm tsiaṅte mbwe Tshùaben, nummbe Tshùaben tshwèt nse' tsho'te nsitsha'a.

³⁴ Bin ghamte Tshùaben, nummb'a b'a mèn mebwô. Kondèn i be ntswe matmat.

³⁵ Bin ke ntshob ndù: Yôg yag me Nsi ze yôg sag b'a bu i là. Kùmte yage, sô yag netèt ngôngô, ndù bag ghamte lén so se nelàne, njab yag nku'ni fa num neke ngamt'o.

³⁶ Ghamte be Tshùaben, Nsi ba Israél ngu'ngu'! Njoṅ ngô fa tshob ndù amén! nke ngamte Tshùaben.

³⁷ David faṅ Asaf boa fèt tse mbwe Koṅ Kàn Tshùaben, ndù bo ke mfa' mbwe Koṅ Kàn, nke mfa' sob fa' mba sit lé'njù lo.

³⁸ A faṅ Obéd-Edom bo Hosa mba fèt tshobe, ben ntu ntshob fom ṅam ntôge. Obéd-Edom b'a nshum Yédutun bo Hosa b'a ghabéb nzendà.

Tshule'te bo nkwi Gabaon

³⁹ A te ngafà jule'te Tsadok boa fèt tse ghafà tshule'te mbwe dù'ntswe Tshùaben, ntùm mbwe' z'a be Gabaon nà,

⁴⁰ ndù bo ke nton ba nyàm, mbèn nzwiagte mba ke lo ze bo kite ntùm ntshù' Tshùaben, ndù tu wul i Tshùaben yèn yen nu là Israél à neyèn nà.

⁴¹ Héman bo Yédutun lo be mbaṅ bo, boa tsemo' tse bo na' ntsho' yube, ntsi lén sob num neke ngamte Tshùaben nà.

⁴² Héman bo Yédutun lo be mbaṅ bo boa ba nta, ba netsha'a; bo nke ntshag là sob tù boa tshu nebu' ju yi, njob nkwi yi ngamte Nsi yi. Tse nshum Yédutun na' mb'a ghabéb nzendà.

⁴³ Ngô fa bèn njam, mba we lo ntùm ze ndà. David bèn njam, naṅ mbotni num ze ndà.