1 Kronika 15 - NTSHOB NSI

David nabte neket Koṅ Kàn

¹ Mfen David kut ba mba' ntùm se tusô, a nabte ta' dù' num Koṅ Kàn ntùm bwe.

² Ndùlala, David tshob ndù: A nda' ben Lévi bèn ke ket Koṅ Kàn Nsi, nummbe Tshùaben lo tsho' yub neke nket Koṅ Kàn Nsi; mbe ndù bo ghù bèn mfa' bwe njoṅ ndù fa.

³ David tse'te njoṅ ba Israél fa Yérusalém num neket Koṅ Kàn Tshùaben nèn yi dù' z'a nabte là.

⁴ David tse'te tse nshum Aron boa ben Lévi.

⁵ Netèt tse nshum Kéhat mfen Uriél se' boa fèt tse ben ntu bon bàa nkù.

⁶ Netèt tse nshum Mérari mfen Asaya se' boa fèt tse ben ntu bon bàa nkù se'.

⁷ Netèt tse nshum Guershom mfen Yoél se' boa fèt tse ben ntu bon tat nkù.

⁸ Netèt tse nshum Elitsafan, mfen Shemaéya se' boa fèt tse ben ntu nkù bàa.

⁹ Netèt tse nshum Hébron, mfen Eliél se' boa fèt tse ben ntu ṅam fome.

¹⁰ Netèt tse nshum Uziél, mfen Aminadab se' boa fèt tse, ben ntu ntshob bàa mén bùm nkù.

¹¹ David tsiaṅ ghafà tshule'te, Tsadok bo Abiatar, boa ben Lévi Uriél, Asaya, Yoél, Shemaéya, Eliél bo Aminadab.

¹² A tshob bo ndù: Bin b'a fenfen tunndà ben Lévi; bin sôg ndàne, bin mba fèt tsine, nket Koṅ Kàn Tshùaben nko' nèn yi dù' ze me nabte njab num Koṅ Kàn Tshùaben, z'a be Nsi Israél là.

¹³ Tshùaben Nsi be lo lab be mbwe yoṅ i, nummbe bin lo ke be nsi, mba ndù bag lo ke ket Koṅ Kàn à mba ntshù' tshwèt mbètte là.

¹⁴ Ghafà tshule'te boa ben Lévi sôg ndàne, num neket Koṅ Kàn Tshùaben z'a be Nsi Israél là nko' yi.

¹⁵ Tse nshum Lévi lo' mbwoṅ nket Koṅ Kàn Nsi yi nkembe' bo, kua' mb'a be ntùm ntshob mi Tshùaben tshob Mosé là.

¹⁶ David tshob fenfen ben Lévi ndù bo tete fèt tshob ghayobkwi boa tshu nebu' sa yi: Ndoṅe, ndoṅ nse' boa netsha'a. A bwô ndù bo bu' là se tum tù, tsiaṅte be nsi.

¹⁷ Ben Lévi lé' Héman nshum Yoél; mbèn ndé' Asaf nshum Bérékia netèt fèt tse; nèn netèt tse nshum Mérari, fèt tshobe, ndé' Etam nshum Kushaya;

¹⁸ mbèn ngù fèt tshob num ndaṅ mbàa, Sakaria, Bén, Yaasiél, Shemiramot, Yéhiél, Unni, Eliab, Benaya, Maaséya, Mattitia, Elifelé bo Miknéya, ngù Obéd-Edom bo Yéiél ghabéb nzendà.

¹⁹ Ghayobkwi, Héman, Asaf bo Etam lo ghù netsha' ndù bo nabt'á tùn meba, ndù a ke ntshob mebwô.

²⁰ Sakaria, Aziél, Shemiramot, Yéhiél, Unni, Eliab, Maaséya bo Benaya ghù ndoṅe ndù bo nabt'a nke ntshob nz'é ṅwate.

²¹ Mattitia, Elifelé, Miknéya, Obéd-Edom, Yéiél bo Azazia ghù ndoṅ nsa fome, neke ntshagte kwi yi.

²² Kenania, mfen ju nebu' netèt ben Lévi, na' mbèn nke ntshagte sa, nummb'a lo lèn tu i bwe mebwô.

²³ Bérékia bo Elkana na' mbèn nke mbéb nzendà dù' Koṅ Kàn be là.

²⁴ Shebania, Yosafat, Netanéel, Amasai, Sakaria, Benaya bo Eliézer, ghafà tshule'te na' nke ntô à ba nta mbwe Koṅ Kàn Nsi. Obéd-Edom bo Yekiya na' mb'a ghabéb nzendà dù' Koṅ Kàn be là.

Koṅ Kàn kum Yérusalém

²⁵ David, ghakwé mbwe netèt ba Israél boa fenfen ben tse bo ke ntô ben ntsha' mbùm nà tam manze neket Koṅ Kàn Tshùaben ndà Obéd-Edom nko' yi ntùm tsiaṅte yàme.

²⁶ Ben Lévi lo ket Koṅ Kàn Tshùaben à ntùm ngù' ze Nsi fà bo là. Bo fà mfot mfô sammbàa boa nkomnjù sammbàa num jule'te.

²⁷ David na' nket kummbaṅ, nzwe mebwô mba ben Lévi tse bo ket Koṅ Kàn nà, ghayobkwi bo Kenania mfen ju nebu' netèt ghayobkwi na' be yub à be mba David là; David lo ghù kum nesag se bo ke nket à num ngelaṅ fa' le'te là num i ndù bo lo' à nzwe nefùag ntam yi.

²⁸ Njoṅ ba Israél fa lo' à tshu'te tsiaṅte, num nze ba mandô, ba nta boa ba netsha'a, nze ndoṅ boa ndoṅ nse', kà nket Koṅ Kàn Tshùaben nko' nèn yi Yérusalém.

²⁹ Mba Koṅ Kàn Tshùaben ke ntsho tusô David là, Mikal ngon Saulo lôte tôndà, mbe yen mba mfen David tshwèt ntsho' mfe tù nke nyiaṅ nà, ngwag David ntùm ntù i.