1 Kronika 13 - NTSHOB NSI

David yab tu i nelo' Koṅ Kàn nèn yi Yérusalém

¹ David tsin tsham boa fenfen, tse bo ke ntô ben ntsha' mbùm nà boa tse bo ke ntô ben nkù là, mba njoṅ kamkam ngô fa;

² ntshob njoṅ mbumte bon Israél fa ndù: A be ze bin yen a bwô, mbe ze Tshùaben Nsi be bam be là, be tshag ntum njoṅ bag fa tsemo' fèt be tse bo tù' ntùm tsemo' taṅ ngô Israél là; ntshag ntum mba mbaṅ ghale'te boa ben Lévi, ntùm ntusô mube, boa dù' ts'a ghebte là, ndù bo tamte num be,

³ bag bin bo ket Koṅ Kàn Nsi be nse' yi mbaṅ be; nummbe bag bin lo ke nywin num nu Koṅ Kàn num ze ngelaṅ Saulo.

⁴ Njoṅ mbumte fa bam yen nu là, nummbe ngô fa lo yen ndù a bwô neghù ndùlala.

⁵ Ndùlala a tsiaṅ njoṅ ba Israél fa, nelo Shihor z'a Egipto là tà nkum nze netsho yi Hamat, num neket Koṅ Kàn Nsi Kiriat-Jearim mfe yi.

⁶ Ndùlala David boa njoṅ ba Israél fa nèn Baala, yen nà b'a ndù Kiriat-Jearim, tusô Yuda, num neket Koṅ Kàn Nsi, ze lén se be Tshùaben nà bwe. Tshùaben ke ntswe à netèt ba kérubim.

⁷ Bo lo' Koṅ Kàn Nsi ndà Abinadab, nkel i num kalig nswe nèn yi; Uzza bo Akiyo bèn ntènte kalige.

⁸ David boa njoṅ ba Israél fa nke nyiaṅ mbwe Nsi, nyiaṅ à kua' ntùm fùag wut, nke njob nkwi, nke mbu' ndoṅe, nke mbu' ndoṅ nse'e, nke mbu' ntome, nke ma' ba netsha'a, nke ntô ba nta.

⁹ Ndùse bo kum dù' netsham nsa Kidon nà, Uzza tshag bu i nebébte Koṅ Kàn yi, nummbe ba nyàmna' lo ghù à nke mbene.

¹⁰ Yantù Tshùaben kam num Uzza, a lab Uzza nummb'a lo kwag Koṅ Kàn; Uzza kwù dù' i, mbwe Nsi.

¹¹ Nu tse ya David mba Tshùaben to fa mum ngô, ndab Uzza ndùlala là; tà nkum sènni bo ke ntsiaṅ yen dù' l'a ndù Péréts-Uzza.

¹² David bwôg Nsi sen lé'njù là ntshob ndù: M'a' ghù à ndùke kà Koṅ Kàn Nsi ntsho la' àm à?

¹³ Ndùlala David ke bam Koṅ Kàn tsho la' i, ntùm tusô David; là, a nèn yi ndà Obéd-Edom ze Gat.

¹⁴ Koṅ Kàn Nsi tswe la' Obéd-Edom maṅwù tat, ntùm ndà i. Tshùaben tam ntse tunndà Obéd-Edom, ntam ntse mba ke lo z'a ghù là.