1 Kronika 11 - NTSHOB NSI

Bo yo' David, ndo' ngù mfen ba Israél

¹ Njoṅ ba Israél fa kùmte mbaṅ David Hébron, ntshob ndù: Tshù, bag b'a lem tsho.

² Mba tà ndùse Saulo be mfen nà, o na' mbèn nke ntshagte, nke nkùmte Israél. Tshùaben Nsi o lo tshob wù ndù: O nsi tshagte yàm nzwit mèn Israél, be mfen yàm nzwit mèn Israél.

³ Ndùlala njoṅ ghakwé mbwe Israél fa nèn mbaṅ mfen Hébron. David wat kàn boa bo Hébron, mbwe Tshùaben. Bo yo' David mfen ba Israél, kua' mb'a ntùm ntshob mi Tshùaben tshùa num ntshu Samuél ntshob là.

David lo' Yérusalém

⁴ David lo nsi boa njoṅ ba Israél fa. A b'a Yébus. Ba Yébusia na' nke ntswe à bwe, mb'a ba la'.

⁵ Ba Yébusia tshob David ndù: O ke nsi tsho nsen ni. Là, David lo' tusô Sion se bo kut ntsham ntsiag là. A yi bèn mbe se tusô David.

⁶ David lo tshob ndù: Mba zit mèn no z'a bwôg lo' ba Yébusia là nsi be mfen mba nkame. Yoab nshum Tséruya bwôg lo' yube, ntù' mfen.

⁷ David tswe ntùm tusô bo kut ntsham ntsiag là; a ndùlala ze bo be ntsiaṅ i ndù tusô David là.

⁸ A kut mba' ndo' ndiaṅ tusô yi mbume, neto' Millo boa dù' ts'a ghebte là; Yoab nabte tshé' tusô.

⁹ David nke nku' nèn be mbwe, Tshùaben tàndà ntsho nke mbe bo yi.

Tse ba nduku ghale' ntsho David

¹⁰ Tshù fenfen ba neta nduku tse bo be ntùm fa' David, njwimt'é boa ba Israél fa nete ze netô nsi li. Bo na' mbèn ngom i fen, mba Tshùaben na' ntshob mfà num Israél là.

¹¹ Tshù ba neta nduku là tse bo be ntùm fa' David li, tshù mba njoṅ yub be li: Yashobéam nshum Hakmoni, mo' mèn netèt tàndà ntsho tse ndùbndùb. A lo sab kô num benntùn nkù tat, mbiagte yub nda' yoṅ ntshù'.

¹² Mèn z'a batte là be Eléazar nshum Dodo, mén Akosh, mo' mèn netèt ghama' ntsho tat.

¹³ Bo David na' mbèn mbe Pas. Dammim, dù' ze ba Filistia nkùmte bwe kà nde' ntsho là. Mo' dù' tsha' lo be bwe ndù nsa yàm bwe; ngô nke nkù mbwe ba Filistia.

¹⁴ Bo tshote netèt nà, ntshètt'é , ntshùa ba Filistia ntsho. Tshùaben bù' bu i, ntshu' Israél num sen lé'njù là.

¹⁵ Ben tat netèt fenfen ṅam ntat swe' nèn mbaṅ David num gholoṅ ntùm ngabloṅ z'a Adullam nà. A na' mb'a ndùse mbàn ba Filistia na' mbe ntùm tômbo' ba Refaim nà.

¹⁶ David na' mb'a ntùm tusô se bo kut ntsham ntsiag là, mbe ndù ba Filistia ghù ta' dù' Bétléhém.

¹⁷ David ghù nkwate ntù i ntshob ndù: Be we ghù me nu ntse mi a tum tôntse s'a be nzendà Bétléhém à?

¹⁸ Ndùlala ben tat dut tèt mbàn ba Filistia, ntu' ntse ntùm tôntse s'a be nzendà Bétléhém nà. Bo lo' se' yi mbwe David, mfà yi; là David ke kô nenu, mfètte mbwe Tshùaben.

¹⁹ Ntshob ndù: A bwô ndù Nsi àm béb àm num yen nu là! Be me nu lem tshen ben ni bo nèn swèn tu tshob là ké? Nummbe bo nèn nswèn à tu yub kà ndo' ntse li nse' yi. David ke kô nenu ntse. Tshù ju ze tshen ba neta nduku tat là ghù là.

²⁰ Abishai, mfèt Yoab na' mb'a mfen netèt tshen ben tat là. A sab kô se num benntùn nkù tat, nzwite yube. Lén se ju'ni netèt ben tat là.

²¹ A na' mb'a mèn ndùb num mo' kam ben tat bàa, mb'a mfen yub; là a lo ke kote mbwe benntùn tat.

²² Benaya nshum Yéhoyada, nshum mo' mandum Kabtséel, lo be bwe ndù a dun nzenze fen, lén se bèn nju'ni num ntsho ts'a le' là. A yi na' mbèn nzwi tse nshum Ariél bàa tse bo ghù neta mba ngwayit là Moab. A yi bèn mbèn nswe' nèn tôntse mo' lé'njù nywinmbaṅ be là, nzwi ta' ngwayit z'a be bwe là.

²³ A be yi na' nzwi ta' ze Egipto z'a sag mbu mbàa kam nà. Ze Egipto là lo tshùb kô ndùb bu i mba ṅwi bàm ngaba' bàm nà. Benaya lo lo' ta' kôg nèn yi num i. A kwé kô bu ze Egipto, ndo' à be kô là kà nzwi i yi.

²⁴ Tshù ju ze Benaya nshum Yéhoyada na' ngù là; lén se lo ju'ni netèt ba neta nduku tat.

²⁵ A na' mb'a mèn ndùb netèt ben ṅam ntat; là, ke kote mbwe benntùn tat.

²⁶ Ba neta nduku ntùm ntsho: Asaél mfèt Yoab, Elkanan nshum Dodo ze Bétléhém.

²⁷ Shammot ze Harof Héléts ze Palon.

²⁸ Ira nshum Ikkesh ze Tékoa. Abiézer ze Anatot.

²⁹ Sibbekai, mèn Hushatété, Itai ze Akoak;

³⁰ Maharai ze Netofat. Héléd nshum Baana ze Netofat.

³¹ Itai nshum Ribai ze Guibéa tusô tse nshum Benjamin, Benaya ze Piraton.

³² Hurai ze Nakalé-Gash, Abiél ze Araba.

³³ Azmavét ze Bakarum. Eliaba ze Shaalbon,

³⁴ Béné-Hashém ze Guizon. Yonatan nshum Shagué ze Harak.

³⁵ Akiam nshum Sakar ze Harar. Elifal nshum Ur.

³⁶ Héfer ze Makéra. Akiya ze Palon.

³⁷ Hétsro ze Kamél. Naarai nshum Ezbai.

³⁸ Yoél mfèt Natan. Mibkar nshum Hagri,

³⁹ Tsélék ze Ammon. Nakrai ze Bérot z'a na' nke ntshùb tshuntshùag Yoab nshum Tséruya là.

⁴⁰ Ira ze Yéter, Gareb ze Yéter.

⁴¹ Uria ze Hit. Zabad nshum Aklai,

⁴² Adina nshum Shiza, mèn Rubèn, mfen ben Rubèn boa ben ntu ṅam ntat njam i.

⁴³ Hanan nshum Maaka. Yosafat ze Mitni.

⁴⁴ Ozias ze Ashtarot. Shama bo Yéhiél tse nshum Hotam ze Arser.

⁴⁵ Yediaél nshum Shimri. Yoka mfèl i, mén Tits.

⁴⁶ Eliél ze Makavim. Yéribai bo Yoshavia tse nshum Elnaam. Yitna mén Moab.

⁴⁷ Eliél, Obèd bo Yaasiél Metsobaya.