1 Korintô 8 - NTSHOB NSI

Num nu mbàb bo lo' ngamte nsi neto yi là

¹ Mbe se' mba mbàb tse bo lo' ngamte nsi neto yi là, bag à bin lèn ndù njoṅ be fa ghù nelène. Là nelèn num mfà ko'te wut, nkôni nke nkule.

² A be ze mèn kwate ndù a lèn ju là, mb'a ke' lèn mb'a lo mbwô ndù a lèn nà.

³ A be ze mèn kô Nsi là, mb'a lèn yen mèn nà.

⁴ Ndùlala, mbe se' mba nefèt mbàb tse bo lo' ngamte nsi neto yi là, bag à bin lèn ndù nsi neto ke' be ntùm njù, mba ndù mo' Nsi ke' be ntùm njù k'a ke nda' Nsi tù' i.

⁵ Mba mba tse bo num ntsiaṅ yub Nsi be mfe kamànyam mba num nsitsha' là, mba mba ba nsi yàme, ba tshùaben bèn njam nà,

⁶ bag à bin ghù à nda' ta' Tshùaben, Yésu Kristô, ze njoṅ tshu fa b'a njam i, tu wut be bèn mbe njam i là.

⁷ Là njoṅ benntùn fa ke' ghù nelène. Tsemo' ben num bwe, tà nse' nkum ndonni, tse matnu num nsi neto be ngù njoṅ mbàb fa be bo à mba mbàb tse bo lo' ngamte nsi neto yi là, mba bo ke' à ben nebot là, bo num nkwate ndù bo sagte wut tshobe.

⁸ A ke b'a jujù bèn ghù be nèn mbaṅ Nsi. A be ze be ke' jù i là, mb'a ke séb mo' ju num be; a be ze be jù i là, mb'a ke kwi'te mo' ju num be.

⁹ Là bin zete ndù kà netswe zin tu tù' ywi' ben nebole.

¹⁰ Nummbe, a be ze mèn yen o, wù z'o ghù nelèn nà, o tswe téblé ntùm ndà nsi neto là, mba yen mèn ni z'a b'a mèn nebot là, ke nsi nkwate ndù a bwô nefèt mbàb bo lo' ngamte nsi neto yi l'a ndùke?

¹¹ Yu nelèn nsi ghù mèn nebot bi, yen mfèt li ze Kristô kwù num tu i là.

¹² A be ze bin tshwèt ngù yen nukebwô li num fèt tsine, nke nsob ntù tshob ts'a be tse nebot là, mba bin ke ngù nukebwô à num Kristô.

¹³ A ndùlala, a be ze mo' jujù nsi fa'te mfèl àm nà, mba me ke nsi bèn fèt mbàb, mbwôg ndù kà mfèl àm fa'te num àm ngwù nsi.