1 Korintô 6 - NTSHOB NSI

Kà mènkristô bote mfèl i mbwe ben ketsin

¹ Be mèn netèt bin z'a ghù ntsha bo mo' là, fèn ntù mfaṅ ben nelàne, nèn mbwe ben ketsin, tsho'te mfèl i ké?

² Bin ke' lèn ndù ben nelàn nsi tsho'te njù ké? A be ze bin nsi tsho'te njù là, mba bin ke' ku'ni netsho'te bon tshu nke'nke' ké?

³ Bin ke' lèn ndù bag à bin nsi tsho'te ba Angél ké? Ke z'a ghù be ke tsho'te tshu sen yôg li à?

⁴ A num mbe ngelaṅ bin ghù ntsha num sen yôg là là, bin diag ghatsho'te ntsha à netèt ben tse ntse'te benkristô num ngwag là.

⁵ Me tshob à ndù tuswe ko zine. Ndùlala sàm ngazenu ke netèt bin z'a ku'ni netsin netèt fètfèt ntsho'te yub là!

⁶ Là mènkristô num njoṅ mbe ghù ntsha bo mo', nèn mbwe ghakelèn Nsi.

⁷ Num njoṅ bag tse fa, bin à vù, a be ze ntsha be ntum netèt bin nà. Be bin ke fènte nuketsin ké?

⁸ A b'a bin bèn nke ngù nuketsin, nke ndagte tshu fèt tsine.

⁹ Bin ke' lèn ndù ben ketsin ke nsi ghù yub bag i ntùm nufen Nsi ké? Kà bin fùte wut tsine! Ke ba kattù, ke ghakelèn Nsi, ke ghaghù màndà, ke ben nebole, ke ghakô yôg ngùa,

¹⁰ ke ba tshô, ke ghaghe'te, ke ghabum ndu', ke ghaso ndon, ke fimntshu lo ke nsi ghù yub bag i ntùm nufen Nsi.

¹¹ Tsemo' ben netèt bin na' mb'a ndùlala. Là bo lo sôg zine; là bo lo ghù bin tù' ben nelàne; bo lo ghù bin tù' ben netsin num lén Tshùaben Yésu Kristô mba num Ywèt Nsi be.

Bin kù kat

¹² Me ku'ni neghù njoṅ i fa, là njoṅ i fa ke' ywimte. Me ku'ni neghù njoṅ i fa, là me ke nsi faṅ sàm ju tô àm.

¹³ Tshujù b'a num bam, bam be num tshujù; là Nsi nsi bagte sen ni mba tshen nà. Là wut mèn ke' b'a num kat, là, a b'a num Tshùaben, Tshùaben be num wut mèn.

¹⁴ Nsi lo bam Tshùaben num vù, a nsi tshùa njam neta, bam mba be.

¹⁵ Bin ke' lèn ndù wut tsin b'a nkam wut Kristô ké? Me nsi lo' nkam wut Kristô ghù nkam wut kattù mènnzwi yi ké? Nga, a ke b'a ndùlala!

¹⁶ Bin ke' lèn ndù mèn z'a tamte bo kattù mènnzwi là, b'a wut ntshù' bo yi ké? Nummbe bo tshob ndù: Ben bàa nsi tù' à mbàb wut ntshù'.

¹⁷ Là mèn z'a tamte bo Tshùaben nà b'a ta' Ywèt ntshù' bo yi!

¹⁸ Bin kù kat! Njoṅ nukebwô fa tse be mèn ghù là ke' be tsho num wul i; là mèn z'a num nkat là ke ngù nukebwô à num ko' tu wul i.

¹⁹ Bin ke' lèn ndù wut tsin b'a ndà Ywèt Nelàn ts'a be num bin, ndù bin kwé à Nsi là ké? Tu wut tsin ke bèn ngù wut tsine!

²⁰ Nummbe bo lo jun zin à tanjoṅ. Ndùlala bin ghamte Nsi ntùm wut tsine.