1 Korintô 4 - NTSHOB NSI

Tshùaben b'a ta' ngatsho'te ntsha

¹ Ndùlala mènntùn lo' yag mba kuan Kristô là, mba ghalé' tsham Nsi là.

² Ju ze bo ke mbètte ghalé' tshu là b'a ndù bo be ben nenùne,

³ mba me là, ke bin tsho't'àm, ke benntùn tsho't'àm no, mba yen nà kag miagte num miag màm; mba me ke' be tsho'te tu wul àm.

⁴ Nummbe me ke' lèn sàm ju ze me fàn nà, là mba ndùlala me ke b'a mèn netsine, ngatsho't'àm b'a Tshùaben.

⁵ A ndùlala, kà bin tsho'te ke ngelaṅ yoṅ nku'u, bin béb ngelaṅ Tshùaben nsi se' là; a nsi ké'te tshu ts'a lem ntùm njam nà, a nsi la'te nkwatenu mi a be ntùm ntù là; Nsi nsi nyàmte mba we lo.

⁶ Fèt tshàm, me lo lo' yen mfi' nu là num àm mba num Apôlô, ndùlala ndù bin tshùa num bag mba num nu ze bo kite là, nzi'te, ndèn ndù a ke' bwô nelo' mo' mèn, nko'te wut yi mbwe mo'.

⁷ We z'a te o nsen n'à? Ke z'o ghù ke be ndù bo nefà wù à? A be ze bo nefà wù là, numk'o nke nta' nsoṅ mba bo ke' nefà wù l'à?

⁸ Kà, bin à ywèle, kà, bin à be ghafu'! A ke bag, mba bin b'a fenfen! We nsi ghù bin be fenfen bag à bin tamte ntô à?

⁹ Nummbe me kwate ndù Nsi lo yab yag ghantum à tà mànjam, mba ben tse bo keb ntsha nezwi yub là; bag lo tù' tshu zwi mbwe njù, mbwe ba Angél mba mbwe benntùn.

¹⁰ Bag b'a ba mbabun num nu Kristô, là bin b'a ghazenu num Kristô. Bag b'a ben nebole, là bin be ben neta. Bin b'a ben neghamte, là bag be ben newage.

¹¹ Tà nse' nkum ndonni, nziku' num nja yage, ntù yag kù, bag b'a tunntôg, bo num ndab yage, bag b'a ba tshakendà,

¹² bag num ndab wut nefa' ko' mbu mage. Bo num nso ndon tu bag, bag nke naṅ mbotni; bo num ntsho' nku mag kebàn, bag nke mfènte.

¹³ Bo num ntute yage, bag nke mfite ntù benntùn. Tà nse' nkum ndonni, bag lo tù' ṅu' njù, ntù' nenà nsindà njoṅ benntùn fa.

Ntage

¹⁴ Me ke' kite yen ni à nelo' ma' tuswe yi num bin, a b'a nelo' ntagte zin yi mba bon tshàm tse me num nkô yub là.

¹⁵ Nummbe, a be ze bin ghù ghatswite mba nguan ntsha' gham num Kristô là, mba bin ke' ghù tà yàme. Nummbe a b'a me na' mbèn ntshùa njam nkùn mebwô mbwe zin num Kristô Yésu.

¹⁶ Ndùlala me tsiaṅ zin ndù bin be ghafi't'àm!

¹⁷ A num ndùlala ze me na' ntum Timôtio z'a be mén àm ze me num nkô i, mèn nenùn num Tshùaben nà bin nà; a nsi kwimte tshàm manze num Kristô Yésu bin, ndaṅndaṅ mba me num ntswite njoṅ dù' fa, ntùm njoṅ ntse'te benkristô fa là.

¹⁸ Tsemo' ben lo to' neko'te wut, nke nkwate ndù me ke bèn nese' la' bin.

¹⁹ Là me nsi se' la' bin ndende, a be ze Nsi kô là, me nsi lèn mfa' tshen ghako'te wut là, ke b'a nda' ntshob ntshu.

²⁰ Nummbe nufen Nsi ke b'a ntùm ntshobe, là ntùm mfa'.

²¹ Ke ze bin kô à? Me se' la' bin à bag à shua' ké, ke nkôni mba Ywèt nefit'à?