1 Korintô 3 - NTSHOB NSI

Nefagte netèt ba Korintô

¹ Fèt tshàm, mba me là, me lo ke ku'ni netshob bin à mba ben tse bo ghù Ywèt là, là me lo tshob bin à mba ben mbàb wut là, mba bonfi num Kristô là.

² Me lo fà à mbùn bin, ke b'a jujù, nummbe bin lo ke yoṅ nku'ni, mba ndonni bin ke' yoṅ nku'ni,

³ nummbe bin ke' à ben mbàb wut. Tshù, ghe'te mba ntsha ke' netèt bin; bin ke b'a ben mbàb wut ké? Bin ke ke nzin à num ze mat mènntùn ké?

⁴ Nummbe mo' mèn num ntshob ndù: Me b'a ze mèn Paulo, mo' tshob ndù: Me b'a ze Apôlô, yen nà ke b'a ze mat benntùn ké?

⁵ Apôlô b'a ke? Paulo b'a ke? Bo b'a ghafa' tse bin na' ntshùa njam bo mbame, ndaṅndaṅ mba Tshùaben na' mfà mba we lo là.

⁶ Me lo ywile, Apôlô zwi', là Nsi ghù a ku'.

⁷ A ndùlala, mèn z'a ywit là ke sàm ju, mèn z'a zwi' là ke bèn mbe sàm ju, là Nsi z'a ghù a ku' là.

⁸ Ngaywit mba ngazwi' b'a ta' ju ntshù', là mba we lo netèt bo nsi kwé ko' mi ntsho'fa' ndaṅndaṅ mba ko' se fa' be là.

Kristô b'a nkwi tseba'

⁹ Nummbe bag b'a shun fa' Nsi, bin b'a nà ze Nsi tshwèt ndù' là, bin b'a ba' ze Nsi tshwèt nkut là.

¹⁰ Me lo tshùa num kondèn Nsi z'a be mfà me là, njab tseba' mba nkum ngave là, mo' mèn kut ba' num bwe. Là mba we lo lôte mat z'a tshwèt nkut ba' yi num bwe là.

¹¹ Mba tseba' là, be sàm mèn ke ku'ni neyab mo'o, k'a ke nda' z'a be là, yen nà b'a ndù Yésu Kristô.

¹² Ke mèn lo' à tshu gol, tshu silba, ndoṅ tanjoṅ, ntù ke nyi'nga lo nkut ba' yi num tseba' là lo,

¹³ mba fa' mba we lo nsi la'te wul i. Lé'njù Tshùaben nsi ghù bo lèn i, nummbe a nsi se' à bo mbwôge, yen mbwôg là nsi la'te mat ze fa' mba we lo be là.

¹⁴ A be ze fa' mèn z'a kut num tseba' ghô là, mba ng'é nsi kwé ntsho'fa'.

¹⁵ A be ze fa' mèn kù ntùm mbwôg là, mb'a nsi bi ntsho'fa' là tu wul i nsi yôge, là mba mèn z'a tshùa ntùm mbwôg là.

Mènkristô b'a Ndà Nsi

¹⁶ Bin ke' lèn ndù bin b'a Ndà Nsi, mba ndù Ywèt Nsi num ntswe num bin ké?

¹⁷ A be ze mèn bagte Ndà Nsi là, mba Nsi nsi bagt'é; nummbe Ndà Nsi b'a nelàne, bin b'a yen Ndà Nsi là.

¹⁸ Kà mèn fùm wul i! A be ze mo' mèn netèt bin kwate ndù a b'a nzenu ntùm yen njù li là, a bwô a tù' mbabune, ndùlala ndù a be nzenu.

¹⁹ Nummbe zenu yen njù li b'a bà mbwe Nsi. Nummbe bo kite ndù: A num ntshùb ghazenu ntùm zete yub,

²⁰ mba ndù: Tshùaben lèn nkwatenu ghazenu, bo b'a banban.

²¹ Ndùlala kà sàm mèn ta' nsoṅ num benntùn, nummbe bin ghù njoṅ i fa,

²² ke Paulo lo, ke Apôlô lo, ke Kéfa lo, ke njù lo, ke yôg lo, ke vù lo, ke tshu ts'a be ndonni lo, ke ts'a nsi se' lo: Bin ghù njoṅ i fa,

²³ là Kristô ghù zine, Nsi ghù Kristô.