1 Korintô 16 - NTSHOB NSI

Ma'te

¹ Mbe se' mba ma'te num ben nelàn nà, mba bin zin ghù ju ze me na' ntshob ntse'te benkristô Galatia là.

² Mba we lo ke mfà ju z'a lé' mat mb'a ku'ni là, lé'njù sondé, ke ke mbéb ndù me se' kà bin ghù ma'te.

³ Ngelaṅ me nsi se' là, me nsi tum ben tse bin tsho' yub là boa ṅwa'ni ndù bo lo' ju kondèn zin nèn yi Yérusalém.

⁴ Là, a be z'a bwô ndù mba tu wul àm nèn nà, mba me nsi nèn bag à bo.

Ntag nzenze

⁵ Me nsi se' la' bin, ngelaṅ me miagte netshùa Makédônia là; nummbe me tshwèt nkô netshùa Makédônia.

⁶ Mo' ndù me nsi tsin la' bin, jù mba sàn à bwe, ndùlala ndù bin nèn ntshag àm mba yà lo dù' ze me nsi nèn nà.

⁷ Nummbe me ke' kô neyen zin à nda' neyen ntôge, me tshwèt nywinte netswe la' bin mo' mén ngelaṅ, a be ze Tshùaben bam nà.

⁸ Là me nsi tswe Efésô tà kum Pentekôte;

⁹ nummbe nzendà ndùb num fa' mebwô te me bwe nge, ghakeban bèn njàme.

¹⁰ A be ze Timôtio se' là, kà bin bam ndù a lab wul i num sàm nu netèt bin, nummbe a num mfa' fa' Tshùaben mba tu wul àm nà.

¹¹ Ndùlala kà sàm mèn wag i. Là bin bèn ntshag i ntùm fite a se' ntèl àm, nummbe bag à fètfèt tshwèt mbéb i.

¹² Mbe se' mba mfèt be Apôlô là, me tshob yi yoṅ yàm ndù a se' la' bin boa fèfèle. Là, a ke kô nese' kua' ndonni; a nsi se' ngelaṅ z'a bwô i là.

¹³ Bin zi tshùalo, bin ghô ntùm bamntù, bin be benntùn, bin ta.

¹⁴ A bwô bin ghù njoṅ tshu f'a ntùm nkôni.

¹⁵ Fèt tshàm, me tshwèt mbèn ntagte zine, bin lèn ndù tunndà Stéfana b'a ntàm Akaya, mba ndù a fà wul i num fa' ben nelàne.

¹⁶ Bin ju'ni lèn tshen ben nà, mba njoṅ benntùn fa tse bo tshwèt mfa' mbwe, nke ndab wut bo à bo là.

¹⁷ Me tsiaṅte mba Stéfana, Fôrtunatô mba Akayikô se' mbaṅ àm nà, bo zwiagte ju z'a tsi bin nà;

¹⁸ bo kôgte ywèt tshàm mba tsine. Bin lo' lèn tshen ben ni kua' mebwô.

¹⁹ Ba ntse'te benkristô tse bo Asia là tsha'te zine. Akila mba Prisila mba njoṅ benkristô fa tse bo num ntse'te ndà i là tsha'te zin yàm num Tshùaben.

²⁰ Njoṅ fètfèt fa tsha'te zine. Bin tsha'te wut tsin bin bin ntùm nenyô nge' ze nelàne.

²¹ Tu wul àm Paulo kite tsha't'a kua' ko' bu àm.

²² A be ze mèn ke' kô Tshùaben nà, ndon tsho tu i. Maranata (Tshùaben tshwèt nse'e).

²³ Kondèn z'a fe Tshùaben Yésu là be bin.

²⁴ Nkôni àm be njoṅ zin fa num Kristô Yésu.