1 Korintô 15 - NTSHOB NSI

Nebam num vù

¹ Fèt tshàm, me ke nkwimt'a nkùn mebwô ze me na' ntshob bin nà: A b'a nkùn mebwô ze bin na' nkwé, ze bin ghô ntùm bwe là;

² bin nsi tshùa à num i kà yôge, a be ze bin tshùb i ndaṅndaṅ mba me na' ntshob bin nà; ntag ndùlala mba bin na' mbam à banban.

³ Me lo bwôgmbwe ntswite zin ju ze me na' nkwé là; yen nà b'a ndù Kristô lo kwù num nukebwô be, ndaṅndaṅ mb'a be ntùm ṅwa'ni Nsi là;

⁴ bo lo tshoṅ i, a lo bam num vù mbatte lé'njù tat ndaṅndaṅ mb'a be ntùm ṅwa'ni Nsi là;

⁵ a lo la'te wul i Kéfa, mbèn nda'te wul i tse ntshob bàa gham;

⁶ yen nà be tôge, a la'te wul i fètfèt ndù bo tôg mba nkù tàn ngelaṅ ntshù', tsemo' tse yàm ke' ntùn ndonni, tsemo' bèn nkwù.

⁷ Yen nà be tôge, a bèn nda'te wul i Yakobo, mbèn nda'te wul i njoṅ ghantum fa.

⁸ A be miagte num njoṅ yub fa, nda'te wul i mba me yàm ze me b'a mba sôbam nà.

⁹ Nummbe tu wul àm b'a metsit mèn netèt ghantum, me ke' ku'ni ndù bo tsiaṅ àm ngantum, nummbe me lo tsho' nku ntse'te ben Nsi kebàn.

¹⁰ Là, a tshùa num kondèn Nsi me be ju me be là; kondèn z'a be num àm nà ke' b'a banban, me fa' ntshùa njoṅ yub fa, ke b'a me, là kondèn Nsi ze bag yi be là.

¹¹ Mba ndùlala, ke me, ke bo lo, tshù ju ze bag num ntshob là, tshù ju ze bin na' mbam nà.

¹² Là, a be ze bo num ntshob Kristô z'a bam num vù là, mba tsemo' ben netèt bin ke ntshob ndù nebam num vù ke' be à ndùke?

¹³ A be ze nebam num vù ke' be là, mba mba Kristô ke' bam num vù.

¹⁴ A be ze Kristô ke' bam num vù là, mba yag netshob ntshob Nsi b'a banban, bamntù zin bèn mb'a banban,

¹⁵ mba bag b'a ghakwénta tse tatte, nummbe bag kwé nta Nsi ndù a lo bam Kristô num vù, ke be ndù a bam i num vù, a be ze fe ben ke' bam num vù là,

¹⁶ nummbe a be ze fe ben ke' bam num vù là, mba mba Kristô ke' bam num vù.

¹⁷ A be ze Kristô ke' bam num vù là, mba bamntù zin b'a banban, mba bin bèn nke' à ntùm nukebwô tsine;

¹⁸ a be ndùlala mba ben tse bo kwù njam Kristô là bi.

¹⁹ A be ze ze be nenywinte num Kristô b'a nda' ntùm sen yôg li là, mba bag à bin b'a miagte ghayennge' netèt njoṅ benntùn fa.

²⁰ Là Kristô bam num vù kua' nenùne, a b'a mbwe mèn netèt ben tse bo kwù là.

²¹ Nummbe mba vù na' ntshùa num ta' mèn nse' là, nebam num vù bèn ntshùa num ta' mèn nse'e.

²² Ndaṅndaṅ mba njoṅ yub fa num nkwù num Adam nà, njoṅ yub fa nsi bèn yôg num Kristô.

²³ Là, mba we lo num ze yoṅ i: Mbwe i b'a Kristô; mbatte benkristô ngelaṅ z'a nsi se' là,

²⁴ yen nà nsi be tôge, a b'a miagt'é, ngelaṅ z'a nsi ba' nufen Tàab Nsi là. A nsi bwôgmbwe bagte njoṅ netô fa, njoṅ ngù' fa, mba njoṅ neta fa,

²⁵ nummbe a nsi bwôgmbwe be mfen tà kum ngelaṅ z'a nsi ma' njoṅ ghakeban tse fa tun nku mi là.

²⁶ Miagte ngakeban z'a nsi bagt'é là b'a vù.

²⁷ Nummbe a ma' njoṅ i fa tun nku mi. Là, a be ze bo num ntshob ndù: Bo ma' njoṅ i fa tun nku mi là, be lèn mebwô ndù mèn z'a ma' njoṅ i fa tun nku mi là, ke' be ntùm bwe.

²⁸ Ngelaṅ ze bo nsi ma' njoṅ i fa tun nku mi là, yen ngelaṅ nà, mba tu wut Mén Nsi be tun nku mèn z'a ma' njoṅ i fa tun nku mi là, ndùlala ndù Nsi be njoṅ i fa num njoṅ i fa.

²⁹ A be z'a ke' b'a ndùlala là, mba ben tse bo num nyu' yub ntse num ze tu fe ben nà nsi ghù à ndùke? A be ze fe ben ke bam num vù là, numke bo nke nyu' benntùn ntse num yub tu à?

³⁰ Numke tu wut be nke mbam netsho ntùm nge' njoṅ ngelaṅ f'à?

³¹ Me num nkwù njoṅ lé'njù fa, fèt tshàm, me num nkwé nta yen nu li num nta'nsoṅ màm mi me ghù num bin mbaṅ Kristô Yésu Tshùaben be là.

³² A be ze bag à ba nyàm na' nzwe mà Efésô à num ze mat mènntùn nà, mb'a nsi ywimt'àm ke? A be ze fe ben ke bam num vù là, bag à bin jù mbèn nu, nummbe bag à bin nsi kwù ndamnjù.

³³ Kà bin fùte wut tsine: Shunku kebwô num mbagte ntswendà.

³⁴ Bin ghom wut tsine, kà bin neghù nukebwô! Nummbe tsemo' ben ke' bèn nelèn Nsi, me tshob à num nema' tuswe yi tu bin.

³⁵ Là, a be ze mèn bètte ndù: Fe ben ke mbam num vù à ndùke? Bo ke nse' à num zit wul à?

³⁶ Nkagni, ju z'o ywit là ke' ku' nebile, ke be ndù a kwù.

³⁷ Ju z'o ywit là ke b'a wut tù z'a nsi bit là, là, a b'a nda' lag se, mba lag nsa ke lag mo' tù lo.

³⁸ Là Nsi num mfà wut yi z'a kô là, mbèn mfà mba ko' wut sit lag tù lo yi.

³⁹ Njoṅ mbàb wut fa ke b'a mbàb wut ntshù'. Mo' b'a ze benntùn, mo' be ze ba nyàm, mo' be ze ba nsaṅe, mo' be ze ba ngontse.

⁴⁰ Wut ts'a b'a tse kamànyam nà num bwe, wut ts'a b'a tse nsitsha' là be bwe; là nkuni wut kamànyam b'a tù' i, nkuni wut nsitsha' b'a tù' i.

⁴¹ Mo' nkuni b'a nkuni wut lagnyam, mo' be nkuni maṅwù, mo' be nkuni sa; mo' sa num ntshùa mo' sa ntùm nkuni.

⁴² A b'a be ndaṅndaṅ num nebam num vù. Bo num njwit z'a bagte là, z'a ke' bagte là bam.

⁴³ Bo num njwit ze tuswe, ze nkuni bam. Bo num njwit ze nebole, ze neta bam.

⁴⁴ Bo num njwit wut mèn nyiaṅtu, wut Ywèt bam. A be ze wut mèn nyiaṅtu be bwe là, mba wut Ywèt num bwe.

⁴⁵ Be ndaṅndaṅ bo kite ndù: Mbwe mèn Adam b'a mènntùn z'a kwé yôg là. Adam ze mànjam b'a Ywèt ts'a be mfà yôg là.

⁴⁶ A ke' b'a wut Ywèt na' mbwôg be, là wut mèn nyiaṅtu; wut Ywèt na' nse' à mànjam.

⁴⁷ Mbwe mèn ze bo nabt'é tsha' là b'a ze nsitsha'a, mbatte mèn b'a ze mfe kamànyam.

⁴⁸ Mba mèn num nsitsha' be là, b'a mba ba num nsitsha' be là; mba mèn mfe kamànyam be là, b'a mba ba mfe kamànyam be là.

⁴⁹ Ndonni, mba bag à bin na' ma' mfuni mèn nsitsha' là, bag à bin nsi bèn ma' mfuni mèn mfe kamànyam.

⁵⁰ Fèt tshàm, tshù nu ze me tshob li: Mbàb mba lem ke' ku'ni neghù yub bag i ntùm nufen Nsi, ju z'a num mbagte là ke nsi tsho ntùm nebe ke bagte,

⁵¹ tshù, m'a' soṅ zin mo' tsham: Bag à bin ke nsi kwù njoṅ be fa, là bo nsi kaṅ njoṅ be fa,

⁵² be kua' ndende, num ta' ngualag, ngelaṅ ze miagte nta nsi tô là, nta nsi tô fe ben bam num vù ke bagte, mba be là, bo nsi kaṅ be.

⁵³ Nummbe a bwô ndù yen wut nebagte li ma' ze ke bagte, yen wut nekwù li ma' ze ke kwù.

⁵⁴ Là ngelaṅ ze yen wut nebagte li nsi ma' ze ke bagte, yen wut nekwù li ma' ze ke kwù là, yen ngelaṅ nà, men ntshob li mi bo kite là nsi bumte ndù: Netshùa ntsho lo mi vù!

⁵⁵ Vù, yu netshùa ntsho yà? Vù, njoṅ o yà?

⁵⁶ Njoṅ vù b'a nukebwô, neta nukebwô b'a ntshù'.

⁵⁷ Ghamte be Nsi z'a fà netshùa ntsho be njam Tshùaben be Yésu Kristô là.

⁵⁸ Fèt tshàm tse nkôni, ndùlala kà bin magte, kà bin nyi'te, bin dun nkôni nefa' fa' Tshùaben njoṅ ngelaṅ fa, ndèn ndù fa' sin ke b'a banban num Tshùaben.