1 Korintô 14 - NTSHOB NSI

Ntshob nzenze. Netshob ntshob Nsi

¹ Bin taṅ njam nkôni, nke ndiag tshu tse Ywèt num mfà là, là njôg mbe, bin tshob ntshob Nsi.

² Nummbe mèn z'a be ntshob ntshob nzenze là, ke' ke ntshob à benntùn, là, a ke ntshob à Nsi; sàm mèn ke' be ju' i, a num ntshùa njam Ywèt nke ntshob à ba nu tsham.

³ Là mèn z'a num ntshob ntshob Nsi là, ke ntshob à benntùn: A num nkule, ntagte, mfite ntù, mèn z'a num ntshob ntshob nzenze là nke nkul'a tu wul i.

⁴ Mèn z'a num ntshob ntshob Nsi là nke nkut ntse'te benkristô.

⁵ Me kô njoṅ zin fa tshob ntshob nzenze, là njôg mbe, bin tshob ntshob Nsi, mèn z'a num ntshob ntshob Nsi là tshùa mèn z'a num ntshob ntshob nzenze là, là, a ke b'a ndùlala, a be ze ngabagte ntun mi be bwe, ndùlala ndù bo tshùa bwe nkut ntse'te benkristô là.

⁶ Fèt tshàm, ndùlala, a be ze me se' la' bin, nke ntshob ntshob nzenze là, mba me ywimte zin à ke, a be ze ntshob màm ke' la'te sàm tsham Nsi bin, ke fà nelène, ke fà netshob ntshob Nsi, ke fà netswite bin n'à?

⁷ Be lo' mfi' num tshu ts'a ke' ghù ywèt là, màndô bo loṅe; a be ze bo ke' tô màndô ke bèn mbu' loṅ kua' ntùm nze mebwô là, mba we nsi lèn ju ze bo tshwèt ntô ntùm màndô ke ju ze bo tshwèt mbu' num loṅ no l'à?

⁸ A be ze bo tô nta ntsho ntùm nze kebwô là, mba we nsi nabte wul i ma' ntsho à?

⁹ A b'a be ndaṅndaṅ num bin; a be ze bin tshùa num men ntshob là ntshob nu a ke làn nà, mba we z'a nsi ju' ju ze bin tshob l'à? Mba bin nsi tshob nu à mfùag.

¹⁰ Tshù, ntshob nzenze yàm ntùm njù, sàm ta' i ke bwe z'a ke' ghù ntun mi là.

¹¹ Ndùlala, a be ze me ke' lèn ntun ntshob là, mba m'a' b'a ngùn mbwe mèn z'a tshwèt ntshob là, mèn z'a tshwèt ntshob là bèn mbe ngùn mbwe àm;

¹² a b'a be ndaṅndaṅ num bin; mba bin b'a ghadiag mesin Ywèt là, bin diag ntshùate, nda' ndù a b'a num nekut ntse'te benkristô.

¹³ A ndùlala, mèn z'a num ntshob ntshob nzenze ku'ni nele'te Nsi num nebagte ntun mi.

¹⁴ Nummbe, a be ze me tshùa num ntshob nzenze, nde'te Nsi là, mba ywèt tshàm bèn nke nde'te Nsi, là zenu àm ke ghù sàm ju ntùm bwe.

¹⁵ M'a' ghù à ndùke? Me nsi lo' ywèt tshàm le'te Nsi yi, là bèn lo' zenu àm le'te Nsi yi. Me nsi lo' ywèt tshàm yob kwi yi, bèn lo' zenu àm yob kwi yi,

¹⁶ ndùlala, a be z'o lo' ywèt tsho nde'te Nsi yi là, mba mèn z'a be ngùn nà nsi tshob amén num le'te Nsi o à ndùke, mb'a ke' ju' ju z'o tshob l'à?

¹⁷ A bwô, o tshwèt nde'te Nsi kua' mebwô, là, a ke tshwèt nkut mfèl o.

¹⁸ Me tshwèt nde'te Nsi mba me lèn netshob ntshob nzenze ntshùa njoṅ zin fa là.

¹⁹ Là ntùm ntse'te benkristô, me kô nelo' zenu àm ntshob nkam ntshob yi ntàn, ntswite tsemo' ben yi, ntshùa netshob nkam ntshob ntsha' gham ntùm ntshob nzenze.

²⁰ Fèt tshàm, kà bin be bônke' ntùm nkwate. A bwô bin b'a bonfi num nukebwô; là ntùm nkwate bin be kum benntùn tse bo ku' là.

²¹ Bo kite ntùm ntshù' ndù: Tshùaben tshob ndù: Me nsi tshùa num ghatshob ntshob ghua mba num nkub ntshu ghùn tshob nu yen nzwit mèn ni, mba ndùlala, bo ke nsi ju' àm.

²² Ntshob nzenze ke b'a nu netshàm ben tse bo bam nà, là, a b'a nu netshàm ben tse bo ke' bam nà. Netshob ntshob Nsi ke b'a nu ben tse bo ke' bam nà, là, a b'a nu ben tse bo bam nà.

²³ Ndùlala a be ze njoṅ ntse'te benkristô fa bumte dù' ntshù', njoṅ yub fa nke ntshob ntshob nzenze, là ghùn ke ben tse bo ke' bam nà lo tsho netèt bo là, mba bo ke nsi tshob ndù bin b'a ba mbabun ké?

²⁴ Là, a be ze njoṅ yub fa ke ntshob ntshob Nsi, là mo' mèn z'a ke' bam nà ke ngùn no tsho netèt bo là, mb'a yen ndù njoṅ yub fa tshwèt ntshobt'é, mba ndù njoṅ yub fa tshwèt ntsho't'é;

²⁵ tshu nelem ts'a b'a ntùm ntù i là tum dù' tàyage, tu wul i nsi vù nsi kabkab, ghamte Nsi, tshob ndù: Nsi num kua' netèt bin.

Njoṅ tshu fa zin nka

²⁶ Fèt tshàm, m'a' ghù tshàm à ndùke? A num mbe ngelaṅ bin tse'te là, mo' mèn ghù yobkwi, mo' ghù ju netswite, mo' ghù tsham Nsi s'a la'te là, mo' ghù netshob ntshob nzenze, mo' mèn ghù nebagte ntun ntshobe, a bwô ndù njoṅ i fa b'a num nekule.

²⁷ A be ze ngatshob ntshob nzenze be là, ben bàa ke tat lo tshob, là nzin à nka, ta' mèn bagte ntun mi.

²⁸ Là, a be ze ngabagte ke' be là, mba we lo mi ntswe ntùm ntse'te benkristô, ntshob yen nu là tu wul i, mba Nsi.

²⁹ Mbe se' mba ghatshob ntshob Nsi là, ben bàa ke ben tat lo tshob nu, tsemo' lôte ntun mi.

³⁰ A be ze mo' mèn netèt tse bo tswe nsi ghù tsham Nsi là, mbwe i mi ntswe.

³¹ Bin ku'ni netshob ntshob Nsi njoṅ zin fa, là bin zin à nka, ndùlala ndù njoṅ yub fa zi'te, mbèn ngù fènntù.

³² Ba ywèt ghatshob ntshob Nsi num nju'ni ghatshob ntshob Nsi.

³³ Nummbe Nsi ke' b'a ngatshu'tu, là Nsi fite. Ndaṅndaṅ mb'a be ntùm ntse'te benkristô fa là,

³⁴ a bwô ndù bènnzwi mi ntswe ntùm ntse'te benkristô, nummbe bo ke' bam bo ndù bo tshob sàm nu, là, a bwô bo ju'ni ndaṅndaṅ mba ntshù' num ntshob là.

³⁵ A be ze bo kô nezi'te ntun mo' nu là, bo bètte ndu yub ntùm ndà, nummbe a b'a tuswe mènnzwi netshob nu ntùm ntse'te benkristô.

³⁶ Ntshob Nsi tum à la' bin ké? A na' nse' à nda' la' bin ké?

³⁷ A be ze mèn kwate ndù a b'a ngatshob ntshob Nsi ke ngaghù Ywèt lo là, mb'a' lèn ndù ju ze me kite bin nà, b'a kua' ntshù' Tshùaben.

³⁸ A be ze mèn ke' lèn yen nà là, mba bo ke lèn i!

³⁹ Fèt tshàm, ndùlala, bin diag netshob ntshob Nsi, kà bin tshètte netshob ntshob nzenze.

⁴⁰ Là njoṅ i fa tôg be mebwô, mba ntùm nka.