1 Korintô 13 - NTSHOB NSI

Nkôni z'a bwô miagte là

¹ Ke me tshob ntshob benntùn mba mi ba Angél lo, a be ze me ke' ghù nkôni là, mba me tù' à mba ke' se bo tshwèt mbu' là, mbèn ntù' à mba kem se bo tshwèt mbu' là.

² Ke me tshob mba ngatshob ntshob Nsi lo, ke me lèn njoṅ tsham fa ke njoṅ zenu fa lo, ke me ghù njoṅ bamntù fa tà nku'ni netsho' ba mbat lo, a be ze me ke' ghù nkôni là, mba me ke' b'a sàm ju.

³ Ke me ghabte njoṅ tshu tshàm fa num jujù bwoṅbwoṅ no, ke me fà wul àm ndù bo ton no, a be ze me ke' ghù nkôni là, mba yen nà ke' ywimt'àm sàm ju.

⁴ Nkôni num mfènte, nkôni num ndun bwôntù, nkôni ke' be ghe'te, nkôni ke' be ta' nku, ke be ko'te wut.

⁵ A ke' be ghù nu tuswe, a ke' be diag à ju z'a bwô à nda' yi là, a ke' be ya ntù, a ke' be kwimte nukebwô,

⁶ a ke' be tsiaṅte num nu z'a ke' tsin nà, là nke ntsiaṅt'a num nunenùne.

⁷ A num nket njoṅ i fa, a num nywinte njoṅ i fa, a num mfènte njoṅ i fa.

⁸ Nkôni ke nsi bi, ntshob ghatshob ntshob Nsi nsi bi, ntshob nzenze nsi tsine; nelèn nsi bi.

⁹ Nummbe ze be nelèn ke' ku', ze be netshob mba ghatshob ntshob Nsi là ke' ku',

¹⁰ là ngelaṅ ze ju z'a bwô miagte nsi se' là, ju z'a ke' ku' là nsi bi.

¹¹ Ngelaṅ me na' mbe mônke' là, me nke nkwate mba mônke' là, nke nsiaṅte nu mba mônke' là. Là ngelaṅ me na' ntù' mèn nà, me ghua' tshunu mônke'.

¹² Nummbe ndonni bag à bin tshwèt njen à ntatntat ntùm yense, là, a nsi be mànjam bag à bin yen se se. Ndonni, yàm nelèn ke' ku', là, a nsi be mànjam me lène, mba bo lèn àm nà.

¹³ Là ndonni tshen tshu tat li mum ngô: Bamntù, nenywinte, nkôni, là ze ndùb netèt tshen nà b'a nkôni.