1 Korintô 12 - NTSHOB NSI

Tshu kondèn tse Ywèt num mfà là

¹ Fèt tshàm, mbe se' mba tshu tse Ywèt num mfà là, me ke' kô nelem zin sàm ju.

² Bin lèn ndù ngelaṅ bin na' mbe ghakelèn Nsi là, ba nsi neto tse bo ke' be tshob là nke nsoṅte zin mba bo kô là.

³ A ndùlala, me tshob bin ndù sàm mèn ze Ywèt Nsi ke mbèn ntshagt'é là ke' ku' netshob ndù: Ndon num tu Yésu; sàm mèn ke bèn nku'ni netshob ndù: Yésu b'a Tshùaben ke be ndù Ywèt Nelàn bèn nke ntshagt'é.

⁴ Tshu kondèn b'a nzenze, là Ywèt be nda' ntshù';

⁵ fa' b'a nzenze, là Tshùaben b'a nda' ntshù'.

⁶ Nefa' b'a nzenze, là Nsi z'a be ngù njoṅ i fa num njoṅ benntùn fa là b'a nda' ntshù'.

⁷ Ywèt num ntswite wul i mba we lo, mfà ju yi num ywimte ntam.

⁸ Ywèt num mfà zenu mo', be Ywèt mbit num mfà nelèn mo',

⁹ be Ywèt mbit num mfà bamntù mo', be Ywèt mbit num mfà neyate ngokèt mo';

¹⁰ mfà ngùninu nsa mo', mfà netshob ntshob Nsi mo', mfà nelèn ba ywèt mo', mfà nelèn ntshob nzenze mo', mfà nebagte tun ntshob mo';

¹¹ a b'a be Ywèt mbit bèn nke mfa' njoṅ tshen nà fa, nke ngabte yube, mfà mba ze we lo mb'a kô là.

¹² Mba wut be ntshù', ngù nkam mi yàme, njoṅ nkam wut fa mi yàm nà, tamte mb'a ta' wut ntshù' là, a b'a be ndaṅndaṅ num Kristô.

¹³ Nummbe bo lo nyu' be ntùm Ywèt ntshù' ndù be tù' ta' wut ntshù'. Ba Yuda ke ba Grikia lo, ba kuan ke bonla' lo, njoṅ be fa lo nu ntùm ta' Ywèt ntshù'.

¹⁴ Wut ke b'a kam ntshù', là nkam yàme.

¹⁵ A be ze ku tshob ndù: Mba me ke' b'a bu là, me ke' b'a num wut là, mba ndùlala nsi ghù a tum num wut ké?

¹⁶ A be ze toṅ tshob ndù: Mba me ke' b'a lag là, me ke' b'a num wut là, mba ndùlala nsi ghù a tum num wut ké?

¹⁷ Njoṅ wut fa lo mb'a lag, mba neju' ntoṅ b'a yà? Njoṅ i fa lo mb'a neju' ntoṅ, mba neju' njwèt ju ntselag b'a yà?

¹⁸ Là Nsi lo yab mba zit kam wut lo ntùm wut mb'a kô là.

¹⁹ Njoṅ i fa na' mb'a kam ntshù', mba wut b'a yà?

²⁰ Là nkam wut b'a yàme, là wut yôg mbe ntshù'.

²¹ Lag ke' ku'ni netshob bu ndù: Nu tsho ke num àm; tu ke ku'ni netshob nku ndù: Nu tsin ke num àm.

²² Be lèn kua' mebwô ndù nkam wut mi be num ndo' yub mba mi nebot là num njwimte.

²³ Nkam wut mi be num ngwag yub là b'a mi be num ngamte yub là; mi be num ndo' yub mba mi tuswe là be num nabte yub kua' mebwô.

²⁴ Mi be num ndo' yub mba mi mebwô là, ke' bètte ndù bo nabte yube. Là Nsi lo tse'te wut mèn à ntùm mat z'a fà ghamte netshùate nkam wut mi a bwoṅ nà.

²⁵ Ndùlala ndù kà fagte be num wut, là ndù nkam wut ke njwimte wut tshob netèt bo.

²⁶ Ndùlala, a be ze mo' kam wut tshwèt njen nge' là, mba njoṅ nkam wut fa a' yen nge' bo à bo; a be ze bo ghamte mo' kam wut là, mba njoṅ nkam wut fa a' tsiaṅte bo à bo.

²⁷ Bin b'a wut Kristô, mbèn mbe nkam wut mi, mba we lo num ze dù'.

²⁸ Ntùm ntse'te benkristô, Nsi lo yab tsemo'o: Mbwe i, mba ghantum nà; mbatte bàa, mba ghatshob ntshob Nsi là; mbatte tat, mba ghatswite là; mbèn njab tsemo' mba ghaghù nsà, ghayate ngokèt, ghaywimte, ghatshagte mba ghatshob ntshob nzenze là.

²⁹ Njoṅ yub fa b'a ghantum ké? Njoṅ yub fa b'a ghatshob ntshob Nsi ké? Njoṅ yub fa b'a ghatswite ké? Njoṅ yub fa num ngù nsà ké?

³⁰ Njoṅ yub fa num njate ngokèt ké? Njoṅ yub fa num ntshob ntshob nzenze ké? Njoṅ yub fa num mbagte tun ntshob ké?

³¹ Bin diag tshu kondèn tse ndùb, m'a' bèn nda'te manze z'a bwô ntshùate là bin.