Biblia Todo Logo
Bìoball air-loidhne

- Sanasan -

1 Korintô 1 - NTSHOB NSI


Tsha'te

1 Me Paulo, ze Nsi tsiaṅ àm ntùm ze nekô ndù me be ngantum Yésu Kristô là, mba Sôstène, mfèt be,

2 me kite yen ṅwa'ni li à ntse'te ben Nsi tse bo be mà Korintô, tse Nsi lànte yub num Kristô Yésu, ben nelàn tse Nsi tsiaṅ yub là, boa njoṅ ben fa tse bo num ntsiaṅ lén Tshùaben be Yésu Kristô njoṅ dù' fa, Tshùaben yub mba ze be là.

3 Kondèn mbà fite z'a fe Nsi, Tà be, mba Tshùaben Yésu Kristô là be bin.

4 Me num ndabte Nsi njoṅ ngelaṅ fa num bin, num kondèn Nsi z'a na' mfà bin num Kristô Yésu là.

5 Bin lo tshùa num i ntù' ghafu' num njoṅ tshu fa, ntùm ntshobe, mba ntùm nelène,

6 ndaṅndaṅ mba kwénta Kristô na' ntaṅ nga netèt bin,

7 ndùlala ndù kà bin bwoṅ sàm ju kondèn, bin tse bin tshwèt mbéb netswite wut Tshùaben be Yésu Kristô là.

8 Tu wul i nsi ghù bin dun neta tà nèn miagte, ndù bin be ke lo' ntùm lé'njù Tshùaben be Yésu Kristô.

9 Nsi b'a mèn nenùne, yi z'a na' ntsiaṅ zin ndù bin tamte bin à Mén i Yésu Kristô, Tshùaben be là.


Ntag num netswe ntshu ntshù'

10 Fèt tshàm, me tsiaṅ zin num lén Tshùaben be Yésu Kristô; bin be ntshu ntshù', kà fagte be netèt bin, là bin tamte ntùm ta' ywèt ntshù' mba ntùm ta' nkwate ntshù'.

11 Fèt tshàm, me lo ju' ben Klôé ndù ntsha num netèt bin.

12 Me tshob à nummbe mba we lo netèt bin tshwèt ntshob ndù: Me b'a ze mèn Paulo, me b'a ze Apôlô, me b'a ze Kéfa, me b'a ze Kristô.

13 Kristô b'a nkam nkam ké? Bo na' nkwimt'a Paulo num fanta'tù num tu zin ké? Bo na' nyu' zin ntse à num lén Paulo ké?

14 Me labte Nsi mba me ke' nyu' sàm mèn ntse netèt bin nà, mb'a b'a nda' Krispô mba Gayô,

15 ndùlala sàm mèn ke' ku' netshob ndù bo lo nyu' zin ntse num lén sàm.

16 Me lo bèn nyu' mba tunndà Stéfana ntse. Ntôg nsen nà, me ke' lèn, a be ze me nyu' mo' mèn ntse là.


Zenu yen njù li mba zenu Nsi

17 Nummbe Kristô lo ke tum àm à ndù me nyu' benntùn ntse, là ndù me tshob nkùn mebwô, ke b'a ntùm zenu ntshobe, mbwôg ndù kà fanta'tù Kristô tù' ju banban.

18 Nummbe ntshob fanta'tù b'a nu bà num miag ben tse bo tshwèt mbi là, là, a b'a neta Nsi num miag be tse be yôg là.

19 Nummbe bo kite ndù: Me nsi biagte zenu ghazenu, me nsi ghua' nelèn ghalèn.

20 Nzenu b'a yà? Ngalèn ṅwa'ni Nsi b'a yà? Ngadiag zenu yen njù li b'a yà? Nsi ke' ghù zenu njù tù' bà ké?

21 Là mba njù be ke tshùa num zenu ndèn Nsi ntùm zenu Nsi là, Nsi lo yen ndù a bwô netshùa num nu bà z'a b'a ntshob fanta'tù là, njôg ben tse bo nsi bam nà.

22 Ba Yuda num mbètte nsà, ba Grikia nke ndiag zenu,

23 là bag b'a num ntshob Kristô ze bo kwimt'é num fanta'tù là, a b'a nu fa'te ba Yuda, mbe nu bà ghakelèn Nsi,

24 Là, mbe se' mba ben tse Nsi tsiaṅ yub là, ba Yuda mba ba Grikia, a b'a Kristô, neta Nsi mba zenu Nsi.

25 Nummbe nu bà z'a b'a ze Nsi là, ze nu ntshùa benntùn, nebot z'a b'a ze Nsi là ta ntshùa benntùn.

26 Fèt tshàm, bin lôte netèt bin tse Nsi tsiaṅ zin nà njene, ghazenu num ze mat mbàb wut, ghaneta mba ben ndùbndùb ke' yàm netèt bin.

27 Là Nsi lo tsho' tshu bà ts'a b'a tse njù là, ndù a ma' tuswe yi tu ghazenu; Nsi lo tsho' tshu nebot ts'a b'a tse njù là, ndù a ma' tuswe yi tu tse neta.

28 Nsi lo tsho' tshu newag ts'a b'a tse njù là mba tshu banban, tshu ts'a ke' be là, ndù a biagte ts'a be là yi,

29 ndùlala ndù kà sàm ju Nsi nabte là ta' nsoṅ mbwe Nsi.

30 Là Nsi lo ghù bin tamte num Kristô Yésu, z'a tù' zenu z'a fe Nsi, mbèn ntù' nunetsine, nu nelàne, mba netshu' be là,

31 ndùlala ndù mèn z'a tshwèt nta' nsoṅ nà, ta' nsoṅ à num Tshùaben, ndaṅndaṅ mba bo kite là.

La Sainte Bible en Bamiléké-Medùmba © Alliance Biblique du Cameroun, 1993. All rights reserved.

Bible Society of Cameroon
Lean sinn:



Sanasan