1 Fenfen 7 - NTSHOB NSI

Nekut ntshwèt

¹ Salomon lo yab ngu'njù ntshob tat gham kà miagte nekut ntshwèl i.

² A bwôgmbwe nkul à ba' fèn Liban. Ba' là lo ghù mbu ṅam ntàn nesage, ngù mbu ntshob tàn ṅam mbàa num bam se bo mbu ntshob tàn gham nenèn tù. Ba' là na' njé't'a num nka ntom kuà, ntom ts'a b'a ntù sédra là. Ntù mi bo lo' ntshùb tu ba ntom yi là na' mb'a ntù sédra.

³ Bo lo' ntù sédra nabte nto'ndà mi a be tu ba ntom nà yi. Men nto'ndà là na' mb'a ntshob tàn ṅam nkuà, ta' laṅ ba' nke ngù nto'ndà ntshob tàn gham.

⁴ Ndaṅ ba' na' mb'a ntat, ndù bo ghù ntôndà, men ntôndà là tet'a se se.

⁵ Njoṅ nzendà fa boa njoṅ ntom fa lo ghù kum tse kuà, mbe be ndaṅndaṅ num kum kuà fa. Mba num sit laṅ ba' lo num ndaṅ mi ntat fa, nzendà b'a se se.

⁶ A ghù bam ntshundà ba ntom ndù a ghù mbu ntshob tàn ṅam mbàa nesage, ngù mbu ntshob tàn gham num bam se. A bèn ngù mo' bam ntshundà mbwe ba ntom ndù a ghù ba ntom bwe; yen ni b'a mbwe mbwe i.

⁷ A ghù to'ndà diaṅkwa, dù' z'a ke ntsiagte kam bwe là, nummb'a ke nkeb ntsha à bwe. A lo' ntù sédra nabte dù' yi nelo nsindà nèn nkum kandà.

⁸ Bo na' nkut ze ba' netswe bwe à be mbe ntshù', mum mo' ntshundà, njam bam ntshundà. A kut mo' ta' ba' z'a be be mbà ntshù' là, yen nà be ze ngon Faraon z'a na' nso là.

⁹ Bo lo be kut njoṅ men mba' là fa, ndo' à ndoṅ mebwô, ndoṅ netshua'te, mi bo fi' i, ndo' sô nkeb yi, njam ntùm bwe bo njam njù là, ndùlala neto' num tun ba' nèn nkum num nsaṅ tôgndà, neto' njam njù tà nèn nkum ntshundà ndùb.

¹⁰ Bo lo' à ndoṅ mebwô ma' tun ba' yi, ndoṅ mi a zi neshu, ndoṅ mi a ghù mbu ntàn boa mi a ghù mbu nkuà là.

¹¹ Ndoṅ mebwô lo be mba mfe num bwe, ndù bo tshua't'a mba mfi' tse be là boa ntù sédra.

¹² Ntshundà ndùb lo diaṅ mbume, ngù nka ndoṅ netshua'te tat bo ta' nka ntom sédra, ndaṅndaṅ mba bam ntshundà mum ndà Tshùaben nà, mba bam ntshundà ndà Nsi là.

Tsemo' tshu nzenze mum ndà Nsi

¹³ Salomon tum bo nèn ntsiaṅ Hiram, mo' mèn Tiro; a na' mb'a ngatswe tùne,

¹⁴ mbe nshum ta' mfôg mènnzwi ntùm tunndà Néftali, tàab be ze Tiro. Hiram lo ghù zenu, bo nkwate yàme, ndèn bon nzenze ve be yàm num fa' ntùne. A kum mbaṅ mfen Salomon, mfa' bon nzenze mfa' mi yi fa.

¹⁵ Hiram nabte ntom bàa ts'a b'a mi ntùn nà. Mbwe ntom lo ghù mbu bwe'e nenèn tù, ngù mbu ntôg ndiaṅ mbume. Mbatte bàa be ndaṅndaṅ.

¹⁶ A lo' tùn ntswe tu ntom yi bàa neyab tu ntom. Mbwe i ghù mbu bàa kam nenèn tù, mbatt'é ghù mbu bàa kam nenèn tù.

¹⁷ A lo' tùn ntswe bon tshu yi ts'a be mba ghub là boa tsemo' ndù a fate yube, njoṅte tsemo' mba tshan nà num nelo' nkwi tu ba ntom yi, mba zit lo ghù tse sammbàa.

¹⁸ A taṅte tsemo' ntàmntàm tshu nka bàa mbaṅ mo' ta' ju z'a fute ghub là, num nelo' nkabte mo' ta' tu ntom yi. A ghù be ndùlala mba zit tu ntom no.

¹⁹ Tshù, tu ntom ts'a be tu ba ntom ntùm bam ntshundà là lo b'a mba nsàmtù là, ngù mbu bàa nenèn tù.

²⁰ Tu ntom lo be tu ntom bàa mfe tù, mbaṅ dù' ts'a gha'te ntôg mba tshu ts'a be mba ghub là; tsemo' ntàmntàm tshu nkù bàa lo diaṅ tu mbatte ntom bàa mbume.

²¹ A tete ba ntom, mbwe bam ntshundà ndà Nsi. A te ntom bag nzendà zwim, ntswi lén se Yakin, nte ntom bag nzendà kwéb, ntswi lén se Boaz.

²² A lo tshebte tshu num tu ba ntom, a tswe mba nsàmtù là. Se fa' ba ntom mi ze ndùlala.

²³ Hiram lo' tùn mbom dibantse yi z'a ghù mbu ntàn nelo mo' kaṅ se nèn nkum mo' là; njoṅ i fa lo diaṅ mbume, netsho nsi be mbu mbàa kam; ta' nkù z'a ghù mbu ntshob tàn gham nà lo ke ndiaṅ i mbume.

²⁴ Ba ngùtnze' lo be bam ngaṅ i ndam i mbume, nke mbe mba num zit kam bu lo gham, njoṅ i fa lam dibantse mbume; tsemo' ngùtnze' là lo be ndù bo tamt'a boa tùn bo bom dibantse yi là kà na.

²⁵ Bo na' nte dibantse l'a num netshaṅ nyàmna' ntshob bàa gham. Tse tat nke ndôte tu, tse tat nke ndôte mbinyam, tse tat nke ndôte ntèn, tse tat nke ndôte ntumnyam. Dibantse na' mb'a num bo, ntshu tun tshob kaṅ ntshù à netèt bwe.

²⁶ Kub tun dibantse lo be nguan ta' kam bu, bo nabte ngoṅ i a be mba ntoṅ nsàmtù là. Ntse lo ke ntsho bwe nguan lita nkù fome ke mban ntse ṅam nkuà lo.

²⁷ A lo' tùn mbom mba bon miag ntse yi. Ta' i ghù mbu mbàa nesage, mbu mbàa num bam se bo ta' bu kam nenèn nsi.

²⁸ Tshù mba bo lo' mbom bon miag ntse yi là: Bo lo ghù mbwoṅ yube, ndù bo tete memo' ntùn bwe, ntse'te yub dù' ntshù' ndiaṅ mbume.

²⁹ A lo tete ba ngwayit, ba nyàmna' boa ba kérubim num ntùn mi a tete ko'ko' là, mbèn ntete nsàmtù num ba ngwayit, ba nyàmna' num tù mba tunnsi.

³⁰ Mba zit mbwoṅ lo lo ghù nku ntùn nkuà, mbèn ngù ntom ntùn num ntôg mi nkuà. Ngag lo be tun bwe, ndù bo ke' ghebte num nsàmtù.

³¹ Nze i na' mb'a netèt ntom ndù a na' ntshua't'é nguan kam bu num nenèn tù; ntshu i lo diaṅ mbume, bam se be nguan kam bu, ndù bo ve num i.

³² Nku nkuà là na' mb'a bam bwe, num ntôg mi nkuà; mba zit ku lo lo ghù kam bu,

³³ ndù a fute nku kalige. Njoṅ ntùn fa mi a na' njoṅte num nku mi là na' mb'a ntùn mi bo tswe là.

³⁴ Ntom kuà lo be num ntôg mba sit lag ntse lo, ndù a to' tù nkum nsi.

³⁵ Num i lo diaṅ mbume, ngù kam bu nenèn tù. Ngoṅ i bo kum i na' mb'a num ta' ju ntshù'.

³⁶ Hiram lo tshebte ba kérubim, ba ngwayit, ba tshatene boa nsàmtù num yen kum ju là mba num ntô mi mi banban.

³⁷ A ghù be ndaṅndaṅ num miag ntse gham fafa: Ndo' à be tshaṅ tùn ntshù' mfa' yi, njoṅ i fa ghù à be mfi' ntshù', mal i be be ntshù'.

³⁸ A bom ndet gham, ta' let nke ngù bat ṅam nkuà. Mba sit let lo lo ghù mbu mbàa, nke njé'te num mfèl i, ndù bo tamte bo bo tun bwe.

³⁹ A ghabte yube, nte tse tàn num bag ndà Nsi ze zwim, nte tse tàn num bag i ze kwéb. A te dibantse num bag ba' ze zwim, netèt taṅ ntumnyam bo taṅ ntèn.

⁴⁰ Hiram nabte ntsi bwembwôge, nsofa' boa nkob. Ndùlala Hiram miagte njoṅ mfa' fa mi mfen Salomon na' mfà yi num ndà Tshùaben nà:

⁴¹ Ntom bàa, ngù ntom ts'a diaṅ mbum nà, bon mbwoṅ bàa num nelo' nkabte tu ntom yi z'a mfe tu ntom ndù a diaṅ mbum nà.

⁴² Ntàm mbatsi nkù kuà be num bon mbwoṅ, mbe mba num zit lo nka bàa. Yen nà b'a nelo' nkabte tu ntom ts'a be mfe num tu ba ntom nà yi,

⁴³ bon miag ntse gham boa ndet gham lo be num bwe.

⁴⁴ Dibantse boa nyàmna' ntshob bàa gham be bam dibantse.

⁴⁵ Ntsi bwembwôge, nsofa' boa nkob, njoṅ tshen tshu là fa tse mfen Salomon na' ngù Hiram nabte num ndà Tshùaben nà, na' mb'a ntùn mi bo tswe là.

⁴⁶ Mfen lo ghù bo na men ntùn n'a tômbo' Yordan, ntùm tsha' neṅabe, netèt Sukkot bo Sartan.

⁴⁷ Tshen tshu là lo yàm neshu kà Salomon kwé njoṅ i fa ke lôte mfi' ntùne.

⁴⁸ Salomon bèn ngù bo nabte tsemo' bon tshu num ndà Tshùaben: Tômbwôg gol, téblé gol num bàn le'te Nsi.

⁴⁹ Bo lo' à gol mebwô nabte dù' nete ndambo yi bwe, mi ntàn be bu zwim, mi ntàn be bu kwéb, mba mbwe dù' nelàne, ndù ba nsàmtù, ndambo boa nsisasi gol be bwe.

⁵⁰ Ntu', mbi, ndet, ndu' boa lônga gol mebwô, boa fùn gol num nefùn nzendà dù' nelàn yi, nefùn dù' nelàn ntshùate yi, nefùn nzendà ndà Tshùaben Mèn Nelàn yi.

⁵¹ Tshù mba mfen Salomon miagte mfa' fa num ndà Tshùaben nà. Yen nà be tôge, Salomon lo' njoṅ tshu fa tse tàab David lé' là nse' yi: Silba, gol, boa bon tshu fa. A yab njoṅ i fa ntùm dù' nelé' tshunkàb ndà Tshùaben.