1 Fenfen 4 - NTSHOB NSI

Ghafa' Salomon tse ndùbndùb

¹ Mfen Salomon na' mb'a mfen njoṅ ngô Israél fa.

² Tshù tshe' mfen tse boa mfen ke ntô ngô li: Azaria nshum Tsadok ngale'te Nsi.

³ Elihoref bo Ashiya nshum Shisba. Bo na' mb'a ghakite. Yosafat nshum Ahilud na' mb'a ngalé' ṅwa'ni.

⁴ Benaya nshum Yéhoyada lo b'a tàndà ntsho. Tsadok bo Abiatar be ghale'te Nsi,

⁵ Azaria nshum Natan na' mb'a mfen ba ngomna; Zabud, nshum Natan na' mb'a nkim ntshwèt, nke mb'a mbaṅ ku mfen.

⁶ Ashishar na' mb'a ngabéb ndà mfen; bo na' njab Adoniram nshum Abda à num nekùa tagsi ntshub.

⁷ Salomon lo ghù ngomna ntshob bàa gham mum njoṅ ngô Israél fa. Tshen ben ni na' mbèn nke nkém mfen bo njoṅ ze tunndà fa. Mba we lo netèt bo ghù ta' maṅwù ntùm ngu'njù.

⁸ Tshù ndén mub li: Nshum Hur num mbat Efraim.

⁹ Nshum Déker mà Makats, Saalbim, Bét-Shemesh, Elon bo Bét-Hanan.

¹⁰ Nshum Hésed mà Arubbot; a lo bèn ngù Sako bo njoṅ Héfer fa.

¹¹ Nshum Abinadab lo bèn ngù njoṅ bag Dor fa. Tafat ngon Salomon na' mb'a nzwi i.

¹² Baana nshum Ahilud na' mbèn ngù Taanak bo Megiddo mba njoṅ bag Bét-Shéan fa z'a mbaṅ Tsartan mfe tu Yizréel là. Yen dù' là to't'a fe Bét-Shéan tà ntôg Yoknéam.

¹³ Nshum Guéber be Ramot mà Galad; a na' mbèn ngù mi ntaṅla' Yair, nshum Manasé Galad. A na' mbèn ngù mba ze bag Argob z'a Basan nà boa ntusô ṅam sammbàa mi ndùb, mi bo kut kàbngô bwe boa ntùn meba là.

¹⁴ Ashinadab Iddo be Mahanaim.

¹⁵ Ashimaats be Néftali. A lo so ngon Salomon ze lén se be Basmat là.

¹⁶ Baana nshum Hushai be Aser bo mà Bealot.

¹⁷ Yosafat nshum Paruash be Isakar.

¹⁸ Shimei nshum Ela be Benjamin.

¹⁹ Guéber nshum Uria be ntùm ngô Galad; a na' mbèn ngù bag ngô Sion z'a be mfen ba Amor là, bo ze Og mfen Basan. Ta' ngomna ntshù' bèn mbe mum yen ngô là.

²⁰ Yuda bo Israél lo yàm neshu, mbe mba nkwango' mi a nkaṅ dibantse là. Bo lo ke njù, nu, nke ntsiaṅte.

²¹ Salomon lo ke ntô mba njoṅ ngô fa neto' fe ta'ntse tà nèn nkum ngô ba Filistia bo tà ze ndùnsi Egipto. Bo lo ke ndo' ntshub nèn yi ntshwèt Salomon, Salomon tô yub ndùlala njoṅ ngelaṅ fa z'a be ntùn nà.

²² Tshù njoṅ jujù z'a ke mbe ndà Salomon mba sit lé'njù lo li: Ntsi ngefet ndùb ṅam ntat, ntsi ngefet negho' ntùn ṅam ntôge,

²³ nyàmna' gham ts'a tshote là, nyàmna' ṅam mbàa tse bo sô kin nà, mbwe nkù, ke siaṅ nkwinyàm, nyatnyàm, njuanyàm boa ngab tse bo tshab yub là.

²⁴ Salomon lo ke ntô njoṅ ngô fa ts'a yoṅ ta'ntse Efrat là, neto' Tifsash nkum Gaza, nke ntô njoṅ fenfen fa bo be mo' yoṅ ta'ntse Efrat là. A lo ghù fite boa njoṅ benntùn fa tse bo diaṅ i mbum nà.

²⁵ Yuda bo Israél, neto' Dan nèn nkum Ber-Shéba lo tswe ke ke mbwôge, mba we lo be tun ze nkùa bo tun se tù mbatsi num ze ngelaṅ Salomon.

²⁶ Salomon lo ghù lèt ba nyàmdiaṅ tse ntsha' ṅam nkuà, mba ba ko' nyàmdiaṅ ntsha' ntshob bàa gham.

²⁷ Ba ngomna na' mbèn nke nkém mfen Salomon boa njoṅ benntùn fa tse bo ke njù num téblé se là. Mba zit ngomna lo nke ndo' ze ta' maṅwù. Bo ke ke mbam ndù mfen bwoṅ sàm ju.

²⁸ Bo lo ke mfà nenà boa nyi'nga num ba nyàmdiaṅ boa nyàmdiaṅ tse nemaṅ nde yi mba yà lo dù' ze mfen be là, mba we lo nke mfà num ze ngelaṅ i bo yab yi là.

Neghu'u, zenu, lén neju'ni

²⁹ Nsi lo fà zenu Salomon, mfà nesiaṅte z'a zi là yi, tshu nzenze ts'a lèn nà yàm mba nkwango' mi a nkaṅ dibantse là.

³⁰ Zenu Salomon lo tshùa ze njoṅ bon ntumnyam fa, bo njoṅ zenu ba Egipto fa.

³¹ A lo ze nu ntshùa njoṅ benntùn fa, nze nu ntshùa Etam, Ezrak, Heman, Kalkol bo Darda, bon Makol tse bandum. Lén se lo ju'ni mum njoṅ ngôngô fa tse bo diaṅ Israél mbum nà.

³² A lo tshob tànkùt ntsha' tat, nabte nkwi neyob ntsha' mbùm ngù nkwi ntàn.

³³ A lo tshob nu mfà num ntù, nelo num sédra Liban nkum num nzenyi z'a bit mbaṅ ndà là; a lo tshob nu mfà mba num ba nyàm boa nsaṅe,

³⁴ num nyàm tse bo be nsoṅ bam sob nsi là boa ngontse. Benntùn lo ke mfe netèt njoṅ nzwit benntùn fa nse' ju' zenu Salomon, nke mfe netèt njoṅ fenfen fa tse bo num nsitsha' là nse' ju' zenu Salomon ze bo tshwèt nsoṅte là.