1 Fenfen 3 - NTSHOB NSI

Salomon na ndà bo ngon mfen Egipto; njem z'a na' njen nà

¹ Salomon tsho shun bo Faraon mfen Egipto, nso ngon i. A lo' i njab ntùm tusô David, kà nke mbéb nemiagte nekut ntshwèt, ndà Tshùaben bo kàb z'a lam Yérusalém mbum nà.

² Ngô ke nke' ma' bo' à mbwe', nummbe bo lo ke yoṅ nkut ta' ba' num se lén Tshùaben.

³ Salomon lo ke nkô Tshùaben, nke nzin mum ntag tàab David. Nda' ndù a mfà tshule'te, ke neton labinda lo à mbwe'.

⁴ Mfen nèn Gabaon ma' bo' bwe, nummb'a na' mb'a mbwe mbwe' netèt tsemo'o. Salomon ton nyàm ntsha' mbùm tômbwôge.

⁵ Tshùaben ṅwag mum njem tèttswe', mà Gabaon, Nsi tshob Salomon ndù: Bètt'àm ju z'o kô là, me fà wù.

⁶ Salomon bùnte ndù: O lo la'te bwôntù ndùb num ngafa' o David, tàa, tu wul i bèn nke nzin mbwe o ntùm nenùne, ntùm netsin bo ndaṅndaṅ njoṅ ntù i fa. O lo ke séb yen bwôntù ndùb là num i, mbèn mbam yi mba ndù mo' nshum i tswe num diaṅkwa se sènni.

⁷ Tshùaben Nsi àm, ndonni o bèn nte nkuan o num dù' tàa David, mbe be ndù tu wul àm ke' a nguanmèn, ke lèn mb'a bwô nesa' fen nà.

⁸ Nkuan o b'a netèt ngô z'o na' ntsho'o, ngô ze bo yàme, njàm neshu kà mèn ke ku'ni nesiaṅ ndèn njoṅ i là.

⁹ Fà ntù z'a dun zenu là nkuan o, ndù me lèn fagte z'a netèt mebwô bo kebwô là. We z'a ku'ni nesa' yu nzwit mèn ni z'a yàm neshu à?

¹⁰ Yen ju li ze Salomon lon nà bwô Tshùaben.

¹¹ Nsi tshob yi ndù: Mb'o bètt'a yen ju là, ke bètt'a ndù mu ntswe'njù yôg mi a sage, ke ndù o be ngaju, ke ndù ghakeban tsho kwùte lo, là mbètt'a zenu num nelo' ngù nunetsin yi là,

¹² me nsi ghù wù à mb'o bètte là. Me nsi fà ntù zenu, ntù nesiaṅte wù, lèn ntù ze sàm mèn netèt ben bo na' mbe, boa tse bo nsi tum njam ke zi ngù, sàm ta' i mba ntshù' ke fut'o là.

¹³ Me nsi bèn fà mba ju z'o ke' lon nà wù, fà fu' yàm bo ghamte wù ndù kà sàm mfen fut'o num njoṅ ngelaṅ fa z'o ke' ntùn nà.

¹⁴ A be z'o bèn nzin num tshàm manze, nze ntshù' màm boa ntag màm mba tàan David na' ngù là, mba me nsi ghù ntswe'njù yôg mu sage.

¹⁵ Salomon bam num miaglo, ndèn ndù a yen njem. A bèn njam Yérusalém ntsin mbwe Koṅ Kàn Tshùaben, nton nyàm mbèn mfà tshule'te Nsi tse netamte fa, ngù njoṅ tshe' tse fa jù jùa.

¹⁶ Yen nà be tôge, kattù bènnzwi se' mbwe mfen ntu tshob bàa.

¹⁷ Mo' netèt tshen bènnzwi li tshob ndù: Tshùaben àm, netsho'o, ju' mba me tshob wù là. Bag yen mènnzwi li ke ntswe à ntùm ndà ntshù'. Me bwe à mbaṅ i ntùm ndà mbile.

¹⁸ Lé'njù tat lo be tôg yen mènnzwi là bwe ze. Bag ke ntswe ndà à ntu tshag bàa, sàm ngùn ke ndà k'a ke nda' bag ntu bàa.

¹⁹ Là, nshum yen mènnzwi li lo nkwù, nummb'a lo nô num i tèttswe'.

²⁰ Ndùlal'a lo ndo nsi tèttswe' ndùse me lo nke nzi là nket yàm mén z'a be ntùn nà njab num se kunndà, ndo' fe ze mén nse' njab ndàntù nkuan o me.

²¹ Me lo nsi nkebnjù nefà bùn nshum àm, njen ndù a kwù. Ndùlala me lôt'é kua' mebwô nkebnjù, njen ndù a ke' b'a yàm nshum ze me na' mbwe là.

²² Mo' mènnzwi tshob ze ndù: o fù à wul o, a yàm nshum bèn mbe ntùn, yu là z'a kwù là. Là mbwe mènnzwi bùnte ndù: Nga man! A yu nshum bèn nkwù, yàm nà z'a be ntùn nà. Yen ni b'a mba bo tshob mbwe mfen nà.

²³ Mfen tshob. Mo' mènnzwi tshob ndù: A yàm nshum bèn mbe ntùn, tshù yu l'a kwù là. Mo' bèn ntshob ze ndù: Nga man, a b'a yu nshum bèn nkwù, yàm b'a ntùn.

²⁴ Ndùlala mfen bèn ntshob ndù: Bin fà ta' ṅwi là me. Bo lo' ta' ṅwi nse' yi mbwe mfen.

²⁵ Mfen tshob ndù: Bin keb mén z'a be ntùn nà nkam mbàa, mfà mba ze kam we lo netèt bo.

²⁶ Mènnzwi ze mén z'a be ntùn be mén i là be ju' ndùlala ntù i tum num nu mén i, a tshob mfen ndù: Ah! Tshùaben àm, fà mén yi ntùnntùn, kà zwi i. Là, mo' mènnzwi tshob ze ndù: Mén nà ke nsi be me, ke bèn mbe wù, bo keb i nekebe.

²⁷ Ndùlala mfen bùnte ndù: Bin fà mén z'a be ntùn nà mbwe mènnzwi, ke zwi i. A yi bèn mbe kua' mà mén.

²⁸ Njoṅ ngô Israél fa ju' mba mfen na' mbùn kam yi là, mbwôg neshu. Bo lèn ndù zenu Nsi num num i, nke ntshagt'é num nu netsho'te kame.