Bìoball air-loidhne

Dô‑ꞌhăn 21 - Tai Dam

Chảu ꞌGiê‑ꞌsu ók hảư mốt ꞌtoi ꞌtáng ꞌTan chảu hên máư

¹ Lăng ꞌpứng nả ꞌviạk ꞌnặn, Chảu ꞌGiê‑ꞌsu ók hảư mốt ꞌtoi ꞌtáng ꞌTan chảu hên máư nẳng nong luông Ti‑bê‑ꞌlia, pên ꞌsướng#ꞌnị:

² ꞌMưa ꞌchớ ꞌnặn cuông mốt ꞌtoi ꞌtáng Chảu ꞌGiê‑ꞌsu ꞌmí chết ꞌcốn dú ꞌtoi căn#ꞌsướng: ꞌTan ꞌSi‑ꞌmôn Pê‑tô ꞌTan ꞌThô‑ꞌma (ꞌchư ꞌnọi khék Đi‑đim) ꞌTan ꞌNa‑ꞌtha‑ꞌna‑ên ꞌtáy bản Ca‑ꞌna phén đin ꞌKha‑ꞌli‑ꞌlê ꞌPứng ꞌlụk ꞌchái ꞌtan ꞌSê‑bê‑đai [ꞌchư Da‑cô‑bô kéng Dô‑ꞌhăn] cắp song ꞌcốn máư phủ ꞌtoi ꞌtáng Chảu ꞌGiê‑ꞌsu ꞌcọ dú#hẳn.

³ ꞌSi‑ꞌmôn Pê‑tô bók sau#ꞌva, “Khỏi ꞌchí pay ha pa#ꞌnớ.” Sau#tóp, “ꞌSúm ꞌháu pay ꞌtoi căn#ꞌnớ.” Sau ꞌtếng#cá chắng au căn khảu ꞌhứa#pay, ꞌcứn ꞌnặn sau báu#đảy sắc#tô.

⁴ ꞌHung ꞌchạu#ꞌmá, hên Chảu ꞌGiê‑ꞌsu dưn dú ꞌhím#bốc, hák mốt sau báu#ꞌhụ chắc phủ ꞌnặn ꞌmen Chảu ꞌGiê‑ꞌsu.

⁵ ꞌTan chảu khék tham sau#ꞌva, “ꞌPứng ꞌnọng ꞌhặc#ꞌpéng, báu#đảy#a?” Sau#tóp, “Báu#đảy cá#đaư.”

⁶ Chảu ꞌGiê‑ꞌsu chắng bók sau#ꞌva, “Hảư pếng ꞌmóng ꞌlống ꞌtáng khoa ꞌhứa ꞌlẹo hák ꞌchí#đảy.” Sau chắng pếng ꞌmóng ꞌlống, pa ꞌdiến ꞌmá khảu ꞌmóng#lai, ꞌlạk ꞌmóng khửn ꞌhứa chao báu#đảy.

⁷ ꞌCốn ꞌtoi ꞌtáng phủ Chảu ꞌGiê‑ꞌsu ꞌhặc ꞌnặn chắng ꞌvạu sú Pê‑tô, “ꞌMen Chảu ꞌGiê‑ꞌsu ꞌnế.” ꞌSi‑ꞌmôn Pê‑tô đảy ꞌnghín ꞌsướng ꞌnặn ꞌdiến au sửa ꞌmá ꞌhặng eo (ꞌpưa báu#ꞌnung sửa#ꞌhí), ꞌlẹo ꞌtéo ꞌlống ꞌnặm#pay.

⁸ ꞌPứng ꞌcốn ꞌtoi ꞌtáng ꞌTan chảu phủ ứn ꞌnặn ꞌnhắng dú nẳng ꞌhứa đảy au ꞌhứa khảu phắng ꞌtếng ꞌlạk ꞌmóng ꞌmí pa ꞌnặn ꞌmá#ꞌtoi. Sau báu#dú đắc ꞌhím bốc kỉ#lai, dáo hả síp ꞌvá#thôi.

⁹ ꞌMưa sau khửn bốc ꞌlẹo ꞌdiến hên ꞌmí cong ꞌpháy thán đang#mảy, ꞌmí pa kéng khảu béng tay#é.

¹⁰ Chảu ꞌGiê‑ꞌsu bók sau#ꞌva, “Au pa ꞌpứng ꞌnọng ꞌchọm cang đảy ꞌnặn ꞌmá kỉ tô é#ꞌnớ.”

¹¹ ꞌSi‑ꞌmôn Pê‑tô ꞌcứn khảu ꞌhứa pay ꞌlạk ꞌmóng khửn#bốc. Đảy pa tô nháư ꞌtếng mết ꞌmí 153#tô. Pa ế ꞌcơ ꞌnặn ꞌmóng ꞌcọ báu#khát.

¹² Chảu ꞌGiê‑ꞌsu bók sau#ꞌva, “ꞌPứng ꞌnọng ꞌmá kin khảu ꞌchạu#ꞌí.” ꞌPứng ꞌcốn ꞌtoi ꞌtáng ꞌTan chảu báu#ꞌmí phaư dám tham ꞌTan chảu lỏ#phaư, ꞌpưa#ꞌva sau ꞌhụ chắc ꞌmen Chảu ꞌGiê‑ꞌsu ꞌlẹo.

¹³ ꞌTan chảu ꞌmá au khảu béng tay kéng pa chí păn hảư sau#kin.

¹⁴ ꞌMen ꞌtưa thứ#sam, Chảu ꞌGiê‑ꞌsu ók ꞌmá hảư mốt ꞌcốn ꞌtoi ꞌtáng ꞌTan chảu hên lăng ꞌmưa tai ꞌlẹo ꞌcứn ꞌhéng#ꞌmá.

Chảu ꞌGiê‑ꞌsu ổ cắp ꞌtan Pê‑tô

¹⁵ Kin khảu#ꞌlẹo, Chảu ꞌGiê‑ꞌsu chắng tham ꞌSi‑ꞌmôn Pê‑tô, “ꞌSi‑ꞌmôn ꞌlụk ꞌchái ꞌtan Dô‑ꞌhăn, ꞌnọng ꞌhặc ꞌháu lai ꞌsứa sau#báu?” ꞌSi‑ꞌmôn Pê‑tô tóp, “ꞌMen#lo, ꞌchiếng ꞌTan chảu ꞌhụ ꞌlẹo, ꞌnọng ꞌhặc ꞌTan#chảu.” Chảu ꞌGiê‑ꞌsu bók Pê‑tô ꞌva, “ꞌCoi ꞌliệng au phen ꞌdo ꞌnọi ꞌháu#ꞌnớ.”

¹⁶ Chảu ꞌGiê‑ꞌsu tham ꞌSi‑ꞌmôn Pê‑tô ꞌtưa thứ#song, “ꞌSi‑ꞌmôn ꞌlụk ꞌchái ꞌtan Dô‑ꞌhăn, ꞌnọng ꞌhặc ꞌháu#báu?” ꞌSi‑ꞌmôn Pê‑tô tóp, “ꞌMen#lo, ꞌchiếng ꞌTan chảu ꞌhụ ꞌlẹo, ꞌnọng ꞌhặc ꞌTan#chảu.” Chảu ꞌGiê‑ꞌsu bók Pê‑tô ꞌva, “ꞌCoi ꞌlăm đu bớng ꞌdéng au phen ꞌdo ꞌháu#ꞌnớ.”

¹⁷ Chảu ꞌGiê‑ꞌsu tham ꞌSi‑ꞌmôn Pê‑tô ꞌtưa thứ sam, “ꞌSi‑ꞌmôn ꞌlụk ꞌchái ꞌtan Dô‑ꞌhăn, ꞌnọng ꞌhặc ꞌháu#báu?” Pê‑tô ꞌnghín Chảu ꞌGiê‑ꞌsu tham chảu ꞌtưa thứ sam#ꞌva, “ꞌNọng ꞌhặc ꞌháu#báu,” ꞌdiến khổ chaư lỏ#tóp, “ꞌChiếng ꞌTan#chảu, ꞌTan hák ꞌhụ ꞌchu#ꞌnéo, ꞌcọ ꞌhụ chắc#ꞌva ꞌnọng ꞌhặc ꞌTan chảu#ꞌlẹo.” Chảu ꞌGiê‑ꞌsu bók ꞌva, “ꞌCoi ꞌliệng au phen ꞌdo ꞌháu#ꞌnớ.

¹⁸ ꞌHáu ꞌvạu ꞌsư hảư ꞌnọng#ꞌhụ, ꞌmưa ꞌchớ ꞌnọng ꞌnhắng nóm ꞌcọ hák ꞌhặng sai eo#au, é pay cá đaư lỏ#pay. ꞌChớ thảu ꞌmá#ꞌlẹo, ꞌnọng ꞌchí ꞌnhó ꞌmứ khửn hảư phủ ứn ꞌhặng#hảư, ꞌlẹo au ꞌnọng pay bón báu#é#pay.”

¹⁹ Chảu ꞌGiê‑ꞌsu ꞌvạu ꞌsướng ꞌnặn, ꞌchị bók hảư Pê‑tô ꞌhụ#ꞌva, ꞌmắn ꞌchí tai ꞌnéo đaư ꞌpưa hảư ꞌchư siêng Chảu Pua ꞌPhạ đảy ꞌhung#ꞌhướng. ꞌLẹo Chảu ꞌGiê‑ꞌsu bók#ꞌva, “ꞌMá ꞌtoi ꞌháu#ꞌnớ.”

²⁰ Pê‑tô ꞌngoại nả pay hên ꞌcốn ꞌtoi ꞌtáng phủ Chảu ꞌGiê‑ꞌsu ꞌhặc ꞌnặn ꞌmá ꞌtoi#lăng, (phủ đảy inh sáư ꞌTan chảu ꞌmưa sau đang kin ꞌléng cón ꞌTan chảu ꞌchí ꞌchọ pắt#ꞌnặn, tham nả ꞌviạk phaư ꞌchí phản ꞌTan#chảu).

²¹ Pê‑tô hên phủ Chảu ꞌGiê‑ꞌsu ꞌhặc ꞌnặn ꞌdiến tham, “ꞌChiếng ꞌTan#chảu, phủ ꞌtoi lăng ꞌmá ꞌnị lăng ꞌmá ꞌchí pên ꞌnéo#đaư?”

²² Chảu ꞌGiê‑ꞌsu tóp, “ꞌVa ꞌháu é hảư phủ ꞌnị ꞌnhắng ꞌtạu ꞌhọt ꞌchớ ꞌháu táo ꞌlống ꞌmá ꞌcọ báu#nuống ꞌpán ꞌhọt ꞌnọng#ꞌnệ. Hảư ꞌnọng ꞌmá ꞌtoi ꞌháu#ꞌnớ.”

²³ ꞌPưa ꞌsướng ꞌnặn chắng ꞌmí ꞌquám tiếng pay ꞌtua ꞌpi ꞌnọng phủ ꞌchưa Chảu ꞌGiê‑ꞌsu, ꞌhiạk ꞌcốn ꞌtoi ꞌtáng phủ ꞌTan chảu ꞌhặc ꞌnặn ꞌchí báu#tai. Hák#ꞌva Chảu ꞌGiê‑ꞌsu báu#đảy ꞌvạu ꞌnéo#ꞌnặn, ꞌmí ꞌto#ꞌvạu, ꞌva ꞌTan chảu é hảư phủ ꞌnặn ꞌnhắng ꞌtạu ꞌhọt ꞌchớ táo ꞌlống ꞌmá ꞌcọ báu#nuống ꞌpán ꞌhọt Pê‑tô, ꞌvạu ꞌsịn#thôi.

²⁴ Phủ ꞌnặn lo ꞌmen ꞌcốn ta hên ꞌmứ ꞌchị chắng đảy tẻm ꞌchiến ꞌpứng ꞌviạk ꞌvạu ꞌmá#ꞌnị. ꞌSúm khỏi ꞌhụ#ꞌva ꞌpứng ꞌviạk ꞌtan phủ pên chứng ꞌnị ꞌcọ ꞌmen#ꞌtẹ.

²⁵ ꞌViạk Chảu ꞌGiê‑ꞌsu đảy ꞌdệt ꞌnặn ꞌnhắng ꞌmí lai#ꞌnéo, ꞌva ꞌchí tẻm ꞌvạy#mết, khỏi ngắm#ꞌva, ꞌtếng#cá phén đin ꞌmướng ꞌlum báu#ꞌmí bón ꞌpó ꞌvạy ꞌpứng ꞌpặp sư ꞌnặn#lo.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan