1 Cô‑ꞌlin‑ꞌthô 2 - Tai Dam

Páo ꞌviạk Chảu ꞌGiê‑ꞌsu ꞌchịu tai ꞌtếng ꞌmạy tháng khen

¹ ꞌPi ꞌnọng ꞌhặc ꞌpéng, khỏi ꞌmá páo hảư ꞌpi ꞌnọng ꞌphắng ꞌviạk Chảu Pua ꞌPhạ khỏi ꞌhụ hên#ꞌnặn, khỏi ꞌcọ báu#đảy au ꞌquám ꞌhụ lắc sung ꞌmá ꞌvạu cá#đaư.

² Khỏi đảy ngắm ꞌvạy#ꞌlẹo, ꞌchớ bók son ꞌpi ꞌnọng ꞌnặn ꞌchí báu#ꞌvạu ꞌhọt nả ꞌviạk#ứn, ꞌmí ꞌto nả ꞌviạk Chảu ꞌGiê‑ꞌsu ꞌKha‑ꞌlịt, ꞌsướng ꞌTan chảu ꞌchọ thứk sáu tók ꞌneng lếc sáư ꞌtếng ꞌmạy tháng khen#ꞌnặn.

³ Khỏi dú nẳng ꞌpi ꞌnọng ꞌnặn ꞌcọ ón ꞌsém dản sắn#lai.

⁴ ꞌQuám ꞌvạu ꞌquám páo khỏi ꞌnặn ꞌmen ꞌtoi phép ꞌquiến Chảu Khuôn#Saư, báu#ꞌmen au ꞌquám ꞌhụ lắc ꞌmá chướng ꞌchứa ꞌpi ꞌnọng cá#đaư.

⁵ ꞌPi ꞌnọng ꞌchưa ꞌsướng ꞌnặn ꞌcọ ꞌdọn phép ꞌquiến Chảu Pua#ꞌPhạ, báu#ꞌmen ꞌdọn ꞌquám ꞌhụ lắc phủ ꞌcốn cá#đaư.

ꞌQuám ꞌhụ lắc Chảu Pua ꞌPhạ

⁶ ꞌSướng đaư ꞌcọ đi, ꞌchớ ꞌsúm khỏi bók son ꞌpứng ꞌcốn ꞌchưa Chảu ꞌGiê‑ꞌsu ꞌtẹ#ꞌnặn, ꞌcọ đảy au ꞌquám ꞌhụ lắc ꞌmá#bók, hák báu#ꞌmen ꞌquám ꞌhụ lắc pang ꞌlới ꞌcốn#ꞌnị, ꞌhứ#ꞌva pên ꞌquám phủ téng đa bản ꞌmướng pang ꞌlới ꞌcốn ꞌnị đang ꞌchí sút suổi#pay.

⁷ ꞌSúm khỏi ꞌvạu ꞌtoi ꞌquám ꞌhụ lắc Chảu Pua#ꞌPhạ, pên ꞌquám ꞌlặp ꞌlợc ꞌTan chảu đảy dăm#ꞌvạy, té đaư té đai ꞌTan chảu đảy téng ꞌvạy ꞌpưa hảư ꞌsúm ꞌháu ꞌhung#ꞌhướng.

⁸ ꞌQuám ꞌhụ lắc Chảu Pua ꞌPhạ ꞌnặn ꞌpứng phủ téng đa bản ꞌmướng pang ꞌlới ꞌcốn ꞌnị báu#ꞌmí phaư#ꞌhụ, ꞌva sau ꞌhụ ꞌcọ ꞌchí báu#au ꞌGiê‑ꞌsu phủ pên Chảu Chom phủ ꞌhung ꞌhướng ꞌnặn ꞌmá tók ꞌneng lếc sáư ꞌtếng ꞌmạy tháng#khen.

⁹ ꞌSướng đaư ꞌcọ#đi, pên ꞌsướng ꞌquám Chảu Pua ꞌPhạ đảy tẻm ꞌchiến ꞌvạy#ꞌva: ꞌNéo ta báu ꞌkhới hên Hu báu ꞌkhới ꞌnghín Chaư ꞌcốn báu ngắm ꞌhọt ꞌPứng ꞌnéo ꞌnị ꞌmen Chảu Pua ꞌPhạ đảy ꞌkhớng ꞌvạy hảư ꞌpứng ꞌcốn phủ ꞌhặc ꞌTan#chảu.

¹⁰ Hák#ꞌva Chảu Pua ꞌPhạ hảư Chảu Khuôn Saư ꞌpá ꞌháu ꞌhụ ꞌquám ꞌlặp ꞌlợc khong ꞌTan#chảu. Chảu Khuôn Saư sóng hên mết ꞌchu#ꞌnéo, ꞌtếng#cá ꞌquám ꞌlặp ꞌlợc Chảu Pua#ꞌPhạ.

¹¹ Sủ ꞌsướng chaư phủ ꞌcốn#ngắm, phủ ứn báu#ꞌhụ#đảy, ꞌmí ꞌto ꞌminh khuôn phủ ꞌnặn hák ꞌhụ#thôi. ꞌCọ ꞌsướng điêu ꞌmí ꞌto Chảu Khuôn Saư phủ điêu ꞌhụ chaư ngắm Chảu Pua#ꞌPhạ.

¹² ꞌSúm ꞌháu báu#đảy ꞌhặp au ꞌluống ngắm ꞌmướng#ꞌlum, hák#ꞌva đảy ꞌhặp au Chảu Khuôn Saư ꞌmá té Chảu Pua#ꞌPhạ, chắng ꞌpá chaư ꞌháu ꞌhụ công ꞌphún ꞌTan chảu phớng ꞌdứa#hảư.

¹³ ꞌSúm khỏi páo nả ꞌviạk ꞌnặn ꞌtoi ꞌquám Chảu Khuôn Saư bók hảư#ꞌhụ, báu#ꞌmen ꞌtoi ꞌquám ꞌhụ lắc phủ ꞌcốn cá#đaư. ꞌSướng ꞌnặn ꞌsúm khỏi chắng au nả ꞌviạk Chảu Khuôn Saư ꞌmá kẻ nghỉa hảư phủ ꞌmí Chảu Khuôn#Saư.

¹⁴ Phủ đaư báu#ꞌmí Khuôn Saư Chảu Pua#ꞌPhạ, phủ ꞌnặn ꞌcọ báu#ꞌhụ ꞌphắng ꞌquám ꞌTan#chảu, ꞌhiạk#ꞌva ꞌquám ꞌTan chảu pên ꞌquám bảư#ꞌchạ. Phủ ꞌnặn báu#ꞌmí ꞌluống đaư ꞌchí ꞌhụ chẻng#đảy, ꞌchí ꞌhụ đảy ꞌmí ꞌto ꞌpơng inh Chảu Khuôn#Saư.

¹⁵ Phủ đaư ꞌmí Chảu Khuôn Saư uôn ꞌpá chắng ꞌtạ đảy mết ꞌchu#ꞌnéo, hák#ꞌva báu#ꞌmí phủ đaư ꞌhụ ꞌtạ chảu#đảy.

¹⁶ [ꞌSướng ꞌquám Chảu Pua ꞌPhạ đảy tẻm ꞌchiến ꞌvạy#ꞌva]: ꞌTan chảu ngắm ꞌsứ đaư báu ꞌmí phaư ꞌhụ Báu ꞌmí phaư ꞌchí bók son ꞌTan chảu đảy. Hák ꞌva ꞌsúm ꞌháu lỏ#ngắm ꞌsướng Chảu ꞌKha‑ꞌlịt.

« Roimhe

Air adhart »

Wycliffe Bible Translators, Inc.

Lean sinn:

Ceanglaichean taic

Sanasan