Marc 8 - Bibla tu limba Rrãmãnã

Multsirea a Doila a Pãnjilor

¹ Tu atseali dzãli, s-adunã unã multsãmi multu mari sh-nu avea tsi s-mãca, Isusul lã-gri a ucenitsilor sh-lã dzãsi a lor:

² “Nj-easti njilã di atsea multsãmi, cã s-featsirã trei dzãli tsi sta cu mini, sh-nu ari tsi s-mãcã.

³ Sh-ma s-lji pitrecu la casã ni mãcãt, va-s armãnã pi cali, niscãntsi di elji au vinit di diparti.”

⁴ Shi ucenitsilji a lui lji-apãndisirã: “Cum va s-li fãntea vãrã cu pãni aeshti aoa tu irnjii?”

⁵ Sh-elu li-ntribã: “Cãti pãnji avets?” Elji dzãsirã: “Shapti.”

⁶ Atumtsea elu lã-deadi ordinã ali multsãmi s-apunã mpadi. Sh-lo shaptili pãnji, hãrãstisi, li-frãmsi shi li-deadi a ucenitsilor a-lui tsi s-li pãrtsea ali multsãmi, sh-elji u pãrtsarã.

⁷ Avea sh-niscãnti peshtsã njitsi. Dupã tsi li-vluyisi, ordinã tsi shi atselji s-li mpartsã la mutsãmea.

⁸ Ashã elji mãcarã shi s-fãntirã, shi adunarã shapti coshuri cu bãcãtsili tsi armasirã.

⁹ Atselji tsi mãcarã eara vãrã patru njiljiã di oaminji, dapoea lã-alãsã.

Prihãbarea di Nvitsãtura a Fariseilor

¹⁰ Sh-trãoarã intrã tu varcã cu ucenitsilji a lui shi s-dusi tu locurili a-Dalmanutiljei.

¹¹ Vinirã Fariselji shi acãtsarã si sburãscã cu nãsu, cãftãnda un semnu dit tser tsi su bãga tu provã.

¹² Ma elu suschirãnda dzãsi: “Cãtse aeastã gheneratã caftã un semu? Dealihea ma vã dzãc cã aishtei gheneratã nu-va sã si da nitsiunu semn.”

¹³ Shi-li alãsã, intrã napoi tu varcã shi tricu di napãrti.

¹⁴ Tora ucenitsilji avea agãrshit s-ljea pãni pi nãshi, sh-tu varcã nu-avea tsiva dicãt mashi unã singur pãni.

¹⁵ Isusul lã-urlã dzãcãnda: “S-avets cãshtiga, afirits-vã di maeaua a Fariseilor shi di maeaua al Irodul!”

¹⁶ Ma atselji discuta namisa di nãshi, dzãcãnda: “Nu avemu pãni.”

¹⁷ Isusul bãgã oarã shi lã-dzãsi: “Cãtse discutats cã nu avets pãni? Ninga nu avets achicãsitã sh-nu avets aduchitã? Ninga u-avets inima nchitritã?

¹⁸ Avets oclji shi nu videts, avets ureclji shi nu-avdzãts? Nu tsinets minti?

¹⁹ Cãndu pãrtsãi tsintsili pãnji ti tsintsi njiljã, cãti coshuri mplini cu bãcãtsi adunat?” Elji dzãsirã: “Doisprãdzatsi.”

²⁰ “Cãndu pãrtsãi shaptili pãnji ti patru njiljã, cãt coshuri mplinã cu pãnji adunatã?” Elji dsãsirã: “Shapti.”

²¹ Sh-elu lã dzãsi a lor: “Ma cum ninga nu achicãsits?”

Vindicarea a Orblui dit Betsaida

²² Deapoea agiumsi la Betsaida sh-lã adusirã unã orb shi l-pãrãcãlsirã s-bagã mãna.

²³ Atumtsea lu lo di mãnã orbulu, lu scoasi afoarã dit hoarã, shi dupã tsi lji-scuchiã tu oclji shi bãgã mãnjili pi nãsu, lu-ntribã macã videa tsiva.

²⁴ Shi elu, discljidzãnda ocljilji, dzãsi: “Ma vedu oaminj ca ponji tsi imnã.”

²⁵ Shi Isusul lã bãgã mãnjili napoi pristi ochljilji a lui sh-lu featsi s-veadã cãtrã nsus, shi atsilui lji s-turnã videarea sh-videa ghini itsido.

²⁶ Sh-Isusul lu-pitricu s-ducã la-casã a lui dzãcãnda: “Nu intrã tu horã sh-nu lji spunã a nitsiunã tu hoarã.”

Mãrturia a Petrului

²⁷ Dapoea Isusul s-dusi deadun cu ucenitsilji a lui pri hoarili a Cesareljei al Filip. Shi pi cali lã-ntribã ucenitsilji a lui dzãcãndã: “Cai dzãc oaminjiljii cã escu mini?”

²⁸ Elji apãndisirã: “Niscãntsã Ioan Pãtidzãtorlu, altsi Ilia, shi-altsilji un dit prufitslji.”

²⁹ Shi elu lã-dzãsi a lor: “Ma voi, cai dzãtsets cã escu?” Sh-Petrul apãndisinda lji-dsãsi: “Tini eshti Hristolu.”

³⁰ Atumtsea elu lã ursi s-nu spunea a nitsiunu ti nãs.

³¹ Deapoea Isusul apãrnji s-lã nveatsã a lor cã Hiljilu a-omlui prindi s-pidipseascã di multi lucri, shi va-si s-arniseascã di aushilji, di ma mãrlji a-preftsilor shi di scriblji, cã va si-s vatãmã shi dupã trei dzãli va s-injeadzã.

³² Sh-elu lã dzãsi aesti zboari pri fatsã. Sh-Petrul lu lo dinãparti shi apãrnji s-lji vãrgheascã.

³³ Ma elu s-nturnã, vidzu ucenitsilji a lui shi lji aurlã a Petrul dzãcãnda: “Fudz di la mini, drac, cã tini nu ai mintea ti lucrili al Dumnidzãlu, ma ti lucrili a-oamnjilor.”

Unã Crutsã di Caitsido

³⁴ Shi lu acljimã ningã nãsu multsãmea cu ucenitsilji a lui, shi u dzãsi: “Caitsido tsi va s-yinã dupã mini, s-arniseascã bana a lui, shi s-ljea crutsea a lui, shi s-mi urmeadzã.

³⁵ Cã atselu tsi va s-ascapã bana a lui, va su-cheardã, ma atselu tsi va-su cheardã bana a lui ti itia a mea sh-ti evanghelul, va s-ascapã.

³⁶ Tsi buneatsã va s-aibã omlu s-amintã ntreagã lumea ma cã ma napoea va s-cheardã suflitlu a lui?

³⁷ Icã tsi poati s-da omlu tu alãxirea al suflitlu a lui?

³⁸ Cã a caitsido tsi va-lji yinã rushãni trã mini sh-trã zboarli a meali namisa di aestã gheneratã cãrunã-cãlcatã shi amãrtioasã, trã atsea va lj-yinã rushãni shi a Hiljilu a omlui, cãndu s-agiungã la mãrirea a Tatilui a lui, cu anghilji sãntsã.”