Marc 5 - Bibla tu limba Rrãmãnã

Demonizatul Gadarean

¹ Ashã agiumsirã tu alantã parti a amarãljei tu locurili a Gherasenjilor.

² Shi macãt Isusul dipunã dit varcã, trãoarã lji inshi nãinti dit murmintul un om umplut cu un duh nicurat,

³ elu bãna tu murmintsã shi nitsiunã nu avea putut s-lu liga cu singir.

⁴ Di multi ori lu avea ligatã cu prãnghi shi singir, ma elu totãna l-frãndzea singirili shi li arupea prãnghili, shi nitsiunã nu putea s-lu imireadzã.

⁵ Dipriunã noaptea shi dzua, prit murmints shi prit muntsi, tritsea aurlãnda shi tãljãnda truplu a lui cu chetri.

⁶ Cãndu elu lu vidzu Isusul di diparti, imnã shi s-ncljinã dininti a lui.

⁷ Shi cu unã aurlari mari dzãsi: “Tsi ari namisa di noi shi di tini, Isus, Hiljilu al Dumnidzãu atsel multu analtu? Mini ti giurã pi numa al Dumnidzãu, nu mi pidipsea!”

⁸ Cã Isusul lji-avea dzãsã: “Duh nicurat, eshi dit aestu om!”

⁹ Atumtsea Isusul lu ntribã: “Cai easti numa a ta?” Shi elu apãndisi dzãcãnda: “Mini mi acljeamã Legion, cãtse him multsã.”

¹⁰ Shi l-pãrãcãlsea multu tsi si nu li aĝuneascã dit loclu atselu.

¹¹ Aclo la coasta a muntilui eara unã cupiã mari di portsi tsi pãshtea.

¹² Atumtsea tuts demonjili pãrãcãlsirã dzãcãndã: “Pitreatsi-nã la portsi tsi s-intrãm tu nãshi.”

¹³ Shi Isusul trãoarã u deadi izini a lor, shi duhurili nicurati dupã tsi inshirã, intrarã la portsilji, shi cupia s-arucã nghios di tu ripã tu amari. Era aproapi doauã njilji di capiti tsi s-nicarã tu amari.

¹⁴ Shi atselji tsi pãshtea portsilji fudzirã shi u scurpisirã shtirea tu cãsãbã sh-pri hoari. Sh-oaminjli vinirã sã videa tsi avea undzitã.

¹⁵ Cãndu vinirã la Isus, vidzurã drãcuitlu mpadi, nviscut shi cu mintea ntreag, atselu tsi eara demonizat di leghionlu, shi avea fricã.

¹⁶ Shi atselji tsi u avea vidzutã, lji spusirã a lor cã tsi lji avea undzitã a demonizatlui shi a portsilor.

¹⁷ Atumsina atselji ahurhirã s-lji pãrãcãlseascã al Isus s-fugã di sinurili a lor.

¹⁸ Cãndu elu ma intra tu varcã, atselu tsi eara demonizatã lji pãrãcãlsea tsi s-putea s fudzea cu nãsu.

¹⁹ Ma Isusul nu lji deadi izini, shi lj-dzãsi: “Imnã la casa a ta, la-a tãlji shi spunã atsilor tsi lucruri mãri featsi Domnul shi cum ti njilui.”

²⁰ Shi elu fudzi shi ahurhi sã predica pri regiunea di Decapolis di tuti atseali tsi avea faptã Isusul shi tuts s-ciudisirã.

Muljearea cu Curarea di Sãndzi

²¹ Shi cãndu Isus tricu nãpoi tu alantã parti cu varcã, un multsãmi marã s-adunã avãrliga di nãsu, shi elu armasi mardzina di amari.

²² Deapoea vini un di ma mãrlji a sinagogãljei, cu numa Iair, tsi cãndu lu vidzu, lj-cãdzu la cicioari.

²³ Shi multu lã pãrãcãlsi dzãcãnda: “Hiljea a mea ma moari, haidi shi bagã mãnjili pri nãsã, tsi s-vindicã shi s-bãneadzã.”

²⁴ Shi elu s-dusi cu nãs, shi unã multsãmi mari nidzea dupã nãs shi s-pindzea avãrliga di nãs.

²⁵ Namisa di nãshi eara unã muljeari tsi lj-cura sãndzili di doisprãdzatsi di anji.

²⁶ Shi avea traptã multi di partea a iatsrilor shi avea chirutã tutã avearea a ljei fãrã ambunãsiri, ninga ma s-fãtsea ma rãu.

²⁷ Cãndu avdzã si zbura di Isusul, intrã la multsãmea, sh-dupã nãs timsi mãna la stranjilu al Isus.

²⁸ Ea dzãtsea: “Macã va bagã mãna la stranjili a lui, va mi vindicã.”

²⁹ Sh-trãoarã curarea a sãndzilui pãpsi shi ea sãmtsã tu truplu a ljei cã s-vindicã di atsea lãngoari.

³⁰ Ma trãoarã Isusul sãmtsã un puteari tsi avea ishit di la nãsu, s-turnã cãtrã multsãmea sh-dzãsi: “Cai deadi di stranjili a meali?”

³¹ Shi ucenitsilji a lui lji-dzãsirã: “Nu vedz cã multsãmea ma s-pingã di tuti pãrtsãli shi tini dzãtsi: ‘Cai deadi di mini?’”

³² Elu mutrea avãrliga s-videa cai u featsi aestã.

³³ Atumtsea, muljearea mplinã di fricã sh-trimurãnda, cã shtia tsi avea pãtsãtã, vini shi lji cãdzu pi cicioari shi lj-spusi tutã alihea.

³⁴ Shi elu lj-dzãsi: “Hiljã, pistipsirea a ta ti-vindicã, imnã tu pace cã eshti vindicatã di lãngoarea a ta!”

Hiljea al Iair

³⁵ Iarã Isusul ninga ma grea, vinirã niscãntsi di la casa a primarului a sinagogãljei dzãcãndã: “Hjiljea a ta muri. Cãtse lu cãrteshti ninga nvitsãtorlu?”

³⁶ Ma Isusul cãndu avdzã tsi dzãsirã, lji dzãsi a primarului a sinagogãljei: “Nu ti asparã, mashi s-ai pistusini!”

³⁷ Nu alãsã s-lu urmeadzã nitsiun altã, dicãt mashi Petrul, Iacovul shi Ioanul, fratli al Iacov.

³⁸ Shi dupã cum agiumsi la casa a marlui a sinagogãljei, vidzu unã mintiturã mari shi oaminji tsi plãndzea shi vãita cu boatsã.

³⁹ Intrã sh-u dzãsi a lor: “Cãtse aurlats shi plãndzets? Feata nu muri, ma doarmi.”

⁴⁰ Sh-elji lu mpizuirã, ma elu dupã tsi li scoasi tuts afoarã, lo cu nãs tat-su shi mã-sa-a li feati sh-atselji tsi eara cu nãsã, sh-intrã aclo iu eara feata.

⁴¹ Shi u lo feata di mãnã shi lj-dzãsi: “Talitha kumi”, tsi va s-dzacã: “Featã, atsãia ma tsã-dzãc: Scoalã-ti!”

⁴² Shi trãoarã feata si sculã shi imnã singur. Ea eara di doisprãdzatsi di anji. Sh-elji s-ciudisirã multã.

⁴³ Ma elu lã deadi ordin tsi nitsiunã s-nu shtia. Sh-lã ursi si lj-da ali feati di mãcari.