Marc 4 - Bibla tu limba Rrãmãnã

Parabola a Simnãtorlui

¹ Deapoea Isusul apãrnji sã-nveatsã mardzina di amari. Shi avãrliga di nãsu s-adunã un multsãmi mari di oaminj, cãt elu intrã tu varcã shi-shãdea pi nãsã, shi tutã multsãmea eara mardzina di amari.

² Shi elu lã nvitsa a lor cu paraboli multi lucruri, shi tu nvitsãtura-a lui lu dzãsi:

³ “Ascultats! Ia, inshi siminãtorlu sã seaminã.

⁴ Shi cãndu elu simina, nãscãnti gãrãts a farãljei cãdzurã pi cali shi puljilji a tserlui vinirã sh-li mãcarã.

⁵ Shi nihiam a farãljie cãdzu pi loc chitros, iu nu avea multã tsarã shi deadi dinãoarã, cã nu avea tsarã ãhãndoasã.

⁶ Ma cãndu inshi soarili s-pãlirã shi ti atsea, tsi nu avea rãdãtsinã s-uscã.

⁷ Shi un parti a farãljei cãdzu namisã di schinj, schinjilji criscurã, ljã acãtsarã anasa shi nu deadi carpo.

⁸ Unã altã parti cãdzu pi tsarã bunã, shi deadi carpo tsi crishtea shi adusi: unã treidzãtsi, alanta shaidzãtsi, shi alanta unã sutã.”

⁹ Deapoea elu lã dzãsi a lor: “Cai ari urechlji trã avdzãri, s-avdã.”

¹⁰ Cãndu Isusul eara singur, atselji tsi eara avãrliga di nãsu deadun cu doisprãdzatslji, lu ntribarã trã parabola.

¹¹ Elu lã dzãsi a lor: “A voauã vã easti datã s-cunushtets mistirĝiul a amirãriljei al Dumnidzãu, iarã atsilor tsi sãntu afoarã tuti aesti sã si da cu paraboli:

¹² ‘Mutrinda, s-veadã ma s-nu bagã oarã, shi avdzãnda, s-avdã ma s-nu aducheascã, cã s-nu mitanjuseascã shi amãrtiili s-ljeartã.’”

Explicarea a Paraboljei

¹³ Deapoea u dzãsi a lor: “Nu u-aduchits aestã parabolã? Ma atumtsea cum va li aduchits tuti alanti paraboli?

¹⁴ Siminãtorlu seaminã Zborlu.

¹⁵ Atselji ningã cali sãntu atselji pri la cai si seaminã zborlu, ma dupã tsi u-avdzãrã atsea, yini trãoarã Satanlu shi lã-scoati sborlu siminatã la nãshi.

¹⁶ Tutashã atselji tsi u-ljea fara pri chetri, sãntu atselji tsi cãndu lu avdzãrã zborlu, trãoarã u ljea cu harauã,

¹⁷ ma tsi nu acãtsarã rãdãtsinã pri nãshi, shi sãntã ti putsãn chiro, shi cãndu yini zorea icã avinarea trã itia a-zborlui, si-scandalizescu trãoarã.

¹⁸ Atselji cai u-ljea fara namisa di scinj, sãntu atselji tsi lu-ascultã zborlu,

¹⁹ ma nvirinãrili-a ashtiei eti, arãdearili-a averilor, shi mania ti alti lucri tsi ljã intrã a omului, astupu sborlu shi nu da carpo.

²⁰ Iarã atselji tsi u loarã fara tu tsarã bunã, sãntu atselji tsi lu ascultã sborlu, u ljea shi aducã carpo: unlu treidzãts, altu shaidzãts shi altu unã sutã.”

Parabola a Lambãljei

²¹ Deapoea lã dzãsi a lor: “Vahi s-bagã lamba sum un gãleatã icã sum un pat? Nu si s-bagã pri purtãtorul ali lunjini?

²² Cã nu ari tsiva ascumtu tsi s-nu s-dizvileascã, shi tsiva faptu pri ascumtu tsi s-nu easã tu lunjinã.

²³ Cai ari ureclji ti avdzãri, s-avdã!”

²⁴ Shi lã dzãsi a lor: “Bãgats oarã atsea tsi avdzãtsã. Cu atsea misurã tsi voi misurats, va vã si misurã, shi a voauã tsi avdzãts va vã si da ma multu.

²⁵ Cã atsilui tsi ari va lji si da, ma atsilui tsi nu ari va lji si ljea shi atsea tsi ari.”

Parabola a Simintsãljei

²⁶ Isusul dzãsi: “Amirãriljea al Dumnidzãu easti ca un om tsi arucã simintsa pri loc.

²⁷ Noaptea shi dzua, cãndu elu doarmi shi si scoalã, simintsa fitruseashti shi creashti, fãrã si shtibã elu cum.

²⁸ Di singur loclu lu fatsi: ma nãinti curpanlu, sh-apoea schiclu, shi tu soni schiclu cu gãrnutsi.

²⁹ Iarã cãndu carpolu s-coatsi, trãoarã s-bagã seatsira, cã yini oara di sitsirari.”

Parabola a Simintsãljei di Sinap

³⁰ Elu dzãsi: “Cu tsi undzeashti amirãriljea al Dumnidzãu? Icã cu tsi parabolã su-aspunem?

³¹ Ea undzeashti cu simintsea di sinap tsi easti siminat tu loc. Atsea simintsã easti ma njicã pri loc.

³² Ma dupã tsi si seaminã, creashti shi s-fatsi ma mari di tuti zãrzãvãtsile, shi sãlgheashti alumãchi ahãti mãri cãt puljilji a tserlui poatã s-aflã streahã sum aumbra a lor.”

³³ Shi cu multi ahtãri paraboli lã spunea a lor sborlu, ashã cum elji putea s-lu achicãsea.

³⁴ Shi nu lã grea a lor fãrã paraboli, iarã a ucenitsilor a lui ahoria, lã spunea itsido.

Isusul shi Furtuna

³⁵ Tu seara a aishtei dzuã, lã dzãsi a lor: “Tritsem pi alantã parti.”

³⁶ Shi ucenitsilji, cum u nchisirã multsãmea, u loarã Isusul ashã cum eara tu varcã. Cu nãsu eara sh-nãscãnti varchi njitsi.

³⁷ Tu oarã aestã si s-featsi unã furtunã mari shi vãljiurili s-plãscãnea pri varcã ahãt multã cãt ea ma s-umplea.

³⁸ Iarã elu durnjea tu varcã pri unã cãpitinj. Elji lu dishtiptarã shi lji dzãsirã: “Nvitsãtore nu ai mirachi trã noi cã ma ni nicãm?”

³⁹ Shi elu cum si dishtiptã lji aurlã a vimtului shi lji gri ali amari: “Tãtsã shi isihãsea-ti!” Shi vimtulu pãpsi shi s-featsi isihii mari.

⁴⁰ Shi lã dzãsi a lor: “Cãtse hits ahãnt fricoshi? Cum nu avets pisti?”

⁴¹ Shi atselji li acãtsã unã fricã mari shi dzãtsea un cu-alantu: “Cai easti aesti tsi lu ascultã shi vimtulu shi amarea?”