Marc 3 - Bibla tu limba Rrãmãnã

Omlu cu Mãna Uscat

¹ Deapoea elu intrã tu sinagogã, shi aclo eara un om cu mãna uscatã.

² Niscãntsã lu viglja Isusul macã va lu vindica dzua di Sãmbãtã, shi deapoea s-lu vãrgheascã.

³ Elu lji-dzãsi a omlui cu mãna uscatã: “Scoalã-ti namisa a tutlor!”

⁴ Shi elu lã dzãsi a lor: “Tsi easti ndrept dzua di Sãmbãtã, s-fatsã ghini icã s-fatsã arãu, sã-ascachi un suflit icã su-vatsãnjã?” Ma elji tãtsea.

⁵ Atumtsea elu, cum li vidzu anvãrliga cu inati, shi nvirinat cã ininjli a lor eara indiferenti, lji dzãsi a omlui: “Tindã mãna!” Elu u timsi shi mãna a lui s-featsi ca alanta sãnãtoasã.

⁶ Sh-Fariseilji inshirã afoarã shi trãoarã apofasirã cu Herodianjilji contra a lui, cum su-vatãmã.

Isusul Aleapsi Di Doisprãdzatsilji

⁷ Isusul cu ucenitsilji a lui s-dusi cãtrã amari shi unã multsãmi mari di oaminj dit Galilea shi dit Iudea lu-urmã,

⁸ sh-dit Ierusalim, sh-dit Idumea, sh-di napãrti di Iordan, tutashã unã multsãmi mari di avãrliga di Tiro sh-di Sidon. Cãndu avdzãrã atseali lucri mãri tsi elu fãtsea, vinirã la nãs.

⁹ Sh-elu lã dzãsi a ucenitsilor a lui sã-aibã totãna etimu unã varcã, tsi laolu si nu-u pindzea.

¹⁰ Elu avea vindicatã mults oaminj, tuts tsi avea lãngoari s-aduna anvãrliga di nãsu s-bãga mãna pi nãs.

¹¹ Shi duhurili nicurati anda u-videa cãdea pi dintsi dininti a lui shi aurla dzãcãnda: “Tini eshti Hiljilu al Dumnidzãu!”

¹² Ma elu lji vãrghea tsi s-nu spunea cai eara elu.

Blãstimarea a Fariseilor

¹³ Deapoea elu s-alinã pri munti, shi acljimã aproapi di nãsu atselji tsi vrea. Shi elji vinirã la nãsu.

¹⁴ Shi elu aleapsi doisprãdzatsi (tsi s-acljima apostulji), s-hibã cu nãsu shi s-li pitritsea sã predica,

¹⁵ shi s-avea puteari s-aĝuneascã dratsilji.

¹⁶ Shi ia doisprãdzatsilji: Simonulu, a cui lj bãgã numa Petru,

¹⁷ Iacovul, hiljilu al Zebedeu, shi Ioani, fratili al Iacov, tsi lã bãgã numa Boanerges, tsi va s-dzãcã hiljilji a bubunidzariljei.

¹⁸ Andrea, Filip, Bartolomeu, Matei, Toma, Iacovul, hiljilu al Alfeu, Tadeu, shi Simon Cananeas,

¹⁹ shi Iuda Iscariotul, tsi ma nãpoi lu vindu.

Familia al Isus

²⁰ Apoea intrarã la unã casã. Shi s-adunã unã multsãmi marã cãt nitsi pãni nu putea s-mãca.

²¹ Shi cãndu soea a lui lo di hãbari, s-dusi su-ljea, cã dzãtsea: “Nu easti ghini di minti.”

²² Iarã scribilji tsi avea dipunatã dit Ierusalim, dzãtsea: “Elu ari Buelzebubul sh-li aĝuneashti dratsilji cu aestu printsilu a dratsilor.”

²³ Ma elu li-acljimã aproapi di nãsu shi lã gri cu parabolã: “Cum poati Satanlu su aĝuneascã Satanlu?

²⁴ Ma cã unã amirãrilj dit nãuntru easti mpãrtsãtã, atsea amirãrilje nu poati s-bãneadzã.

²⁵ Ma cã unã casã dit nãuntru sã-mpartsã, atsea casã nu poati s-bãneadzã.

²⁶ Ashã, macã Satanlu si-scoalã contra ali sinli a lui, shi easti pãrtsãt, nu poati si s-tsãnã, ma s-bitiseashti icã cheari.

²⁷ Nitsiun nu-poati s-intrã tu casa a omlui fãrtos shi s-lju arãcheascã avearea a lui, ni lãgatã ma nãinti omlu atsel fãrtoslu, atumtsea poati s-lju afurã casa.

²⁸ Dealihea ma vã dzãc cã a omnjilor va s-hibã ljirtati itsi amãrtii shi cathe blãstem tsi va s-dzãcã.

²⁹ Ma di atselu tsi va s-blãsteamã contra a Duhlui Sãmtu nu va s-aibã ljirtari di totãna. Elu easti amãrtios ti eta tutã.”

³⁰ Isusul li dzãsi aesti cã elji dzãtsea: “Elu ari un duh nicurat!”

Familia al Isus

³¹ Tu oara atsea vinirã fratsilji a lui shi muma, shi stãnda afoarã, pitricurã sh-lji grirã.

³² Multsãmea eara apunat avãrliga di nãsu, shi-lji dzãsirã: “Ia, muma shi fratsilji a tãlji, sãntu nafoarã sh-ma ti caftã.”

³³ Ma elu apãndisi a lor dzãcãnda: “Cai easti muma-a mea icã fratsilji a melji?”

³⁴ Daepoea, mutrinda avãrliga di atselji tsi shãdea ningã nãsu, dzãsi: “Ia, muma-a mea shi fratsilji-a melji!

³⁵ Cã, caitsido tsi fatsi vrearea al Dumnidzãu, elu easti fratili-a meu, sora-a mea shi muma.”