Marc 2 - Bibla tu limba Rrãmãnã

Paralizatlu al Capernaum

¹ Dupã ndoauã dzãli, Isus vini nãpoi tu Capernaum shi s-avdzã cã elu eara la casã.

² Dinãoarã s-adunarã ahãnts mults oaminji cãt nu aflai loc nitsi dininti ali poarti. Sh-elu lã nvitsa zborlu.

³ Atumtsea vinirã niscãnts, tsi adusirã un om paralizat tsi lu-purta patru inshi.

⁴ Ma niputãnda s-apruchia ti itia a multsamiljei, dizvãlirã plocili a citiljei iu eara Isusul, shi dupã tsi disfeatsirã unã guvã lu-dipusirã patlu pi cai stãtea paralizatlu.

⁵ Isusul vidzãnda pistea a lor ljã-dzãsi a paralizatlui: “Hiljie, amãrtiili a tali sãntu ljirtati!”

⁶ Ma atsia shidea niscãntsã scribi tsi tu ininjli a lor minduia:

⁷ “Cãtse vahi aestu ma blastimã? Cai poati s-ljeartã amãrtiili, singur di Dumnidzãul?”

⁸ Ma Isusul tsi trãoarã aduchi tu suflitlu a lui cã elji ma mintuia aesti lucri cu mintea-a lor, lã dzãsi: “Cãtse li mintuits aesti lucri tu ininjli a voastri?

⁹ Tsi easti ma lishor s-ljã dzãtsã a paralizatlui: ‘Amãrtiili a tali sãntu ljirtati’, ama s-ljã dzãtsã: ‘Scoalã-ti, ljea patlu a tãu sh-fudz!’?

¹⁰ Ma tra si-shtits cã Hiljilu-a omlui ari puteari sã-ljeartã amãrtiili pri loc,

¹¹ mini ma ts-dzãcã: ‘Scoalã-ti, ljea patlu shi imnã la casa a ta!’”

¹² Shi elu si sculã dinãoarã, lo patlu a lui, shi inshi afoarã dininti a tutlor, shi ashã tuts s-ciudisirã shi alãvdarã Dumnidzãulu dzãcãnda: “Unã ahtari thavmã nu u-avem vidzut pute!”

Acljimarea al Levi

¹³ Isus inshi nãpoi mardzina di amari shi multsãmea yinea la nãs shi elu lã-nvitsa.

¹⁴ Trãcãnda vidzu Levilu, hiljilu al Alfeul apunat iu s-pãltea taxa, sh-lji dzãsi: “Urmeadz-mi!” Sh-elu si sculã shi s-dusi dupã nãs.

¹⁵ Sh-ma nãpoi cãnd Isusul eara la measã la casa a Levilui, mults taxidãri shi amãrtioshlji shãdea la measã cu Isusul sh-cu ucenitsilji a lui, cã eara mults atselj tsi nãdzea dupã nãs.

¹⁶ Atumtsea scriblji shi Fariseilji, cãndu vidzurã cã ma mãca deadun cu taxidãrlji shi amãrtioshlji, lã-dzãsirã a ucenitsilor a lui: “Cum mãcã sh-bea elu deadun cu taxidãrlji shi amãrtioshlji?”

¹⁷ Sh-Isusul cãndu li avdzã, lã-dzãsi a lor: “Nu sãntu sãnãtoshlji tsi au ananghi ti iatrulu, ma lãndzitslji. Mini nu vinj s-acljemã ndreptsilji, ma amãrtioshlji trã mitãnjiusiri.”

Nvitsãtura Atsea Noaua al Isus shi Traditsia Atsea Veaclja

¹⁸ Atumtsea ucenitsilji al Ioan shi al Fariseilor tsãnea pãreasinji. Atselji vinirã la Isusul shi lj-ntribarã: “Cãtse ucenitsilji al Ioan shi atselji al Fariseilor tsãnã pãreasinji, shi ucenitsilji a tãlj nu tsãn pãreasinji?”

¹⁹ Shi Isusul rãspunsi atsilor: “Poati s-tsãnã preasinji acljimatsilji pi numtã cãndu dzinirlu easti cu nãsh? Di cãt chiro dzinirlu easti cu nãsh nu poatã s-tsãnã preasinji!

²⁰ Ma va s-yinã dzãlili cãndu va s-hibã loatã dzinirlu di nãsh, shi atumsea tu atseali dzãli elji va s-tsãnã pãreasinji.

²¹ Nitsunã nu bagã tu un stranji veclju un peticu nou, cã altã soi lu arupi stranjilu shi azmuldzearea s-fatsi ma marã.

²² Tutã ashã nitsunã nu bagã yinu nou tu foali veachli, altã soi yinlu nou aspardzi foalili, yinlu s-vearsi shi foalili chearã, ashã cã yinlu atselu nou s-bagã tu foali nali.”

Isus, Domnul a Sãmbãtãljei

²³ Shi undzi tsi unã dzuã di Sãmbãtã elu ma tritsea anamisa di agri siminati, shi trãcãnda ucenitsilji a lui arupea schipuri.

²⁴ Shi Fariseilji lji-dzãsirã: “Vedzã, cãtse lu facã aestã tsi nu prindi s-lu facã dzua di Sãmbãtã?”

²⁵ Shi elu lã dzãsi a lor: “Ma nu avets ghivãsitã tu Scriturili tsi featsi Davidul, cãndu avea ananghi shi agiuna, elu shi tuts alantsilji tsi eara cu nãs?

²⁶ Elu intrã tu casa al Dumnidzãu tu chirolu a arhipreftului Abiatar, shi mãcã pãnjili di dininti, tsi nu prindi s-li mãca nitsunã, ma singru dicãt preftsãlji, shi elu lã deadi sh-atsilor tsi eara cu nãs.”

²⁷ Deapoea lã dzãsi atsilor: “Sãmbãta easti fãptã ti omlu, sh-nu omlu ti Sãmbãta.”

²⁸ Trã atsea Hiljilu a omlui easti domn sh-a Sãmbãtãljei.