Marc 15 - Bibla tu limba Rrãmãnã

Isusul Nãinti al Pilat, Guvernatorlu Romac

¹ Cãrund dimineatsa mãrilji a preftsilor cu aushlji, scriblji shi tut Sinedrul fãtsea consiliu, u ligarã Isusul, lu adusirã nafoarã shi lji-lu-deadirã al Pilat.

² Shi Pilat lu ntribã: “Tini eshti amirãlu a Iudenjilor?” Shi elu apãndisinda lji dzãsi: “Tini dzãts!”

³ Shi mãrilji a preftsilor lu acuza di multi lucri, ma elu nu apãndisea dip.

⁴ Pilatul lu ntribã nãpoi dzãcãnda: “Nu apãndiseshti dip? Vedz ti cãti lucri ti acuzeascã!”

⁵ Ma Isusul nu apãndisi dip, ahãtãt cãt Pilatlu arãmasi ciudisitã.

⁶ Tu cathi sãrbãtoari eara ca adet tsi su-alãsa atsilor un hãpsãnit, caitsido tsi populu cãfta.

⁷ Shi eara tu hapsi un om acljimatã Baraba, deadun cu sotsilji a lui rebilj, tsi avea faptã un vãtãmãri la un ribiljusiri.

⁸ Shi multsãmea, aurlãnda, ahurhi tsi s-caftã s-facã ashã cum avea faptã totãna cu nãsh.

⁹ Iar Pilatul lã apãndisi a lor dzãcanda: “Vrets s-vã sãlghescu amirãlu a Iudenjilor?”

¹⁰ Cã lu shtiea tsi mãrilji a preftsilor lu avea pridatã di inati.

¹¹ Ma mãrilji a preftsilor pimsãr multsãmea s-cãfta tsi s-lã sãlghea Baraba.

¹² Shi Pilatul u lo zborlu nãpoi shi lã dzãsi a lor: “Tsi vrets s-fac cu atselu tsi voi lu acljimats amirãlu a Iudenjilor?”

¹³ Elji aurlarã nãpoi: “Crutsisits-lu!”

¹⁴ Shi Pilatul lã dzãsi a lor: “Ma tsi arãu ari faptã?” Atumtsea elji aurlarã shi ma multã: “Crutsisits-lu?”

¹⁵ Tr-atsea Pilatul vrãnda s-lji arãsea a multsãmiljei, lu deadi Baraba. Shi dupã tsi lu zãpãlirã Isusul, lu deadir a lor tsi s-lu crutsisea.

Pizuirea Nãinti di Crutsisiri

¹⁶ Shi suldatsilji lu-dusirã Isusul tu uborlu di nãntru tu pãlat, shi adunarã tutã cohorta.

¹⁷ Lu-nviscurã cu sirmã, shi mplãtirã unã cãruni di schinj shi lj-u bãgarã pri capã

¹⁸ Dapoea ahurhirã s-lu saluteascã, dzãcãnda: “Sãnãtati amirãlu a Iudenjilor!”

¹⁹ Shi lu agudea pri capã cu un cãlam, u scuchea shi dzinucljãnda diniti a lui, lu alãvda.

²⁰ Dupã tsi arãsirã cu nãs, lu disviscurã purpura, lu nviscurã cu stranjili a lui, shi lu scoasirã afoarã s-u crutsisea.

Crutsisirea

²¹ Elji ursirã un cãlãtor, Simonul di Cyrenea tsi s-turna dit agru, tatilu a Alexandrului shi a Rufiljei, tsi s-lu tsãnea crutsea a lui.

²² Dapoea lu adusirã Isusul tu loclu acljimatã Golgota, tsi va s-dzãcã “Loclu a Cafcãljei.”

²³ Lji deadirã s-bea yinã misticat cu mirã, ma elu nu u lo.

²⁴ Shi dupã tsi lu crutsisirã, li pãrtsãrã stranjili a lui shi arucarã soarti tsi s-shtiea tsi va avea cathiunã.

²⁵ Eara oara a treia cãndu lu crutsisirã.

²⁶ Shi scritura tsi spunea itia a cãtiĝurisiriljei tsi eare bãgatã pri nãsu dzãtsea: “Amirãlu a Iudeilor.”

²⁷ Deadun cu nãs crutsisrã doi furi, unlu tu nadreptea a lui shi alantu tu nastãnga a lui.

²⁸ [Shi ashã s-mplinã Scritura tsi dzãtsi: “Elu s-luguri cu urutsilji.”]

²⁹ Shi elji tsi tritsea atsia aproapi lu ngiura shi giucãnda caplu, dzitsea: “Tini tsi aspãrdzeai templu shi lu adãrai di trei dzãli,

³⁰ ascapã vetea a ta shi dipunã di crutsi.”

³¹ Tutashã shi mãrilji a preftsilor shi scriblji arãdãnda dzãtsea cu un alantu: “Alantsilji lã ascãpã, ma vetea a lui nu putu s-lu ascapã.

³² Hristolu, amirãlu a Israelui, s-dipunã di crutsã tsi s-lu videm shi s-lu pistipsim.” Shi atselji tsi eara crutsisit deadun cu nãsu, lu ngiura.

Moartea al Isus

³³ Dapoea cãndu vini a shasea oarã, ntuneariclu amvãli tut loclu pãn la a noaua oarã.

³⁴ Shi tu a noaua oarã Isusul aurlã cu boatsã analtã: “Eloi, Eloi lama sabacthani?”, tsi va s-dsãcã: “Dumnidzãlu a meu, Dumnidzãlu a meu cãtse mi ai alãsat?”

³⁵ Shi niscãnts di atselji di aproapi, cãndu lu avdzãrã, dzãsirã: “Ia, elu ma greashti Ilia!”

³⁶ Atumtsea un di nãshi vini trãoarã sh-muljã un sfungar tu puscã, dupã tsi u bãgã tu un cãlami lji-lu deadi s-bea, dzãcãnda: “Alãsats-lu, s-videm ma cã va yinã Ilia s-lu dipun nghios.”

³⁷ Ma Isusul cum featsi un sghileari marã deadi suflitlu.

³⁸ Shi velul tu templu s-disicã pi dau di nsus pãn nghios.

³⁹ Shi centurionul tsi stãtea nãinti al Isus, cãndu vidzu cã Isusul zghili ashã, shi avea datã suflitlu, dzãsi: “Dealihea aestu om eara Hiljilu a Dumnidzãului!”

⁴⁰ Atsia eara tutashã shi muljerili tsi videa di diparti, namisa di nãsi eara Maria Magdalena shi Maria, muma a Iacovul njiclu shi al Iose, shi Salomeia,

⁴¹ tsi lu avea urmat shi lã avea servitã di cãndu eara tu Galile, shi eara multi alti tsi avea vinit deadun cu elu tu Ierusalim.

Ngruparea

⁴² Tora s-apruchiã seara, cã eara Etimãsirea, tsi va s-dzãcã apãrirea di Sãmbãtã,

⁴³ Iosif din Arimatea, un consilier respectat, cai ashtãpta amirãriljea a Dunmidzãului, cu curaiu intrã la Pilatul shi cãftã truplu al Isus.

⁴⁴ Shi Pilatul s-ciudisi tsi tora elu avea murit. Lu acljimã centurionlu shi lu ntribã macã avea murit di mult chiro.

⁴⁵ Shi cum sã siguripsi di centurionlu, lji lu alãsã truplu al Iosif.

⁴⁶ Aestu, dupã tsi acumpãrã unã pãndzã, lu dipunã Isusul di crutsi, lu amvãrti cu pãndzã shi lu bãgã tu un murmintu tsi erea disfapt tu chiatrã, deapoea arucã un chiatrã dininti di usha a murmintului.

⁴⁷ Shi Maria Magdalena shi Maria, muma al Iose mutrea iu lu bãgarã.