Marc 14 - Bibla tu limba Rrãmãnã

Apofãsirea a Preftsilor

¹ Dupã doauã dzãli eara Pashtili shi Adzãmili, shi ma mãrilji a preftsilor shi scriblji cãfta cum s-lu acãtsa Isus cu ilei, shi s-lu vãtãma.

² Ma dzãtsea: “Nu tu chirolu a sãrbãtoarãljei, tsi s-nu aibã mintiturã tu populu.”

Isus la Betania

³ Tora elu eara tu Betania, tu casa al Simon tsi eara lepros, shi cãndu eara la measã intrã unã muljiearã cu un vasã di alabastru cu untulem njiurizmos cu nard curat, multã scump shi ea lu frãmsi vaslu di alabastru shi lj-lu-vãrsã untulemlu pri cap.

⁴ Niscãnts s-nãrãirã shi dzãsirã: “Cãtse tutã aestã hãrgiuiri a untulemlui?”

⁵ Cã aestu untulem putea s-vindea ma mult di trei suti di denari shi aesti si s-da a niavutsilor. Shi eara nevrisits cu nãsu.

⁶ Ma Isus dzãsi: “Alãsats-lu! Cãtse u munduits? Ea featsi un lucru bunã trã mini.

⁷ Cã niavutsilji va li avets totãna cu voi, shi cãndu s-vrets, putets s-lã fãtsets ghini. Ma mini nu va mi-avets totãna.

⁸ Ea featsi atsea tsi putu, aumsi di ma nãinti truplu a meu trã ngrupari.

⁹ Dealihea ma vã dzãcã cã tu tutã dunjeaua iutsido tsi va s-hibã predicat aestu evanghelu, va sã spunea shi atsea tsi ea featsi, trã adutsearea aminti a ljei.”

Pretsul di Pridari

¹⁰ Atumtsea Iuda Iscariotul, un di doisprãdzatsilji, s-dusi la mãrilji a preftsilor tsi s-prida Isusul.

¹¹ Shi elji cãndu lu avdzãrã, s-hãrãsirã shi lji tãxirã cã va lji da pãradzi. Ashã elu cãfta oara tsi prindi tsi s-lu prida.

Etimãsirea a Pashtiljei

¹² Tora tu prota dzuã a Adzãmilor, cãndu s-featsi curbanlu a Pashtiljei ucenitsilji a lui dzãsirã: “Iu vrei s-nidzem s-adrãm di mãcari Pashtili?”

¹³ Shi elu pitricu doi di ucenjitsili a lui dzãcãnda: “Imnats-vã tu cãsãbã shi aclo va s-adunats un om tsi tsãni un stamnã plinã cu apã, urmats-lu atselu.

¹⁴ Shi aclo iu elu va s-intrã, dzãtsets-lji a domnului ali casi: ‘Nvitsãtorlu ntreabi: Iu easti udãlu tsi putem s-mãcãm Pashtili cu ucenitsilji a melji?’

¹⁵ Shi elu va vã spunã nsus unã udã marã uidisitã shi gata. Aclo adãrats-lu ti noi.”

¹⁶ Ucenitsilji a lui s-dusirã, agiumsirã tu cãsãbã shi aflarã ashã cum dzãsi elu, shi etimãsirã Pashtili.

Tsina a Pashtiljei

¹⁷ Cãndu s-featsi seara, Isusul vini cu di doisprãdzatsilji.

¹⁸ Cãndu ma shidea la measã shi ma mãca, Isusul dzãsi: “Dealihea vã dzãcã cã un di voi tsi ma mãcã cu mini, va mi vindã.”

¹⁹ Atumtsea elji ahurhirã sã nvirineadzã shi dzãtsea un cu alantu: “S-nu hiu mini?” [Shi un altã dzãsi: “S-nu hiu mini?”]

²⁰ Shi elu, apãndisinda lã dzãsi a lor: “Easti un di doisprãdzatsilji tsi moalji cu mini tu cãtsãn.

²¹ Ma Hiljilu a omlui ma s-dutsi cum easti scriatã trã nãsu, ma cavai di atselu om tsi vindi Hiljilu a omlui. Va eara ma ghini trã nãsu, tsi atselu om s-nu eara amintat pute!”

Pisti-ligãturea Noauã

²² Shi candu elji ma mãca, Isusul lo pãnea, ghinicuvãntã, u pãrtsã, sh-lu deadi a lor dzãcãnda: “Loats shi mãcats. Aestu easti truplu a meu.”

²³ Deapoea lo cupa, lu hãrãstãsi, lã deadi a lor shi tuts biurã di nãsã.

²⁴ Atumtsea lã dzãsi: “Aestu easti sãndzilu a meu, a pistãligarãljei, tsi s-vearsi trã multsã.

²⁵ Dealihea vã dzãcã cã nu va beau ma dit carpolu a yinjãlei pãnã tu atsea dzuã cãndu va s-lu beau di nou tu amirãriljea al Dumnidzãu.”

²⁶ Shi dupã tsi cãntarã un himn, inshirã shi s-dusirã cãtrã Muntsili a Masnjilor.

Isus shi Petrul

²⁷ Shi Isusul lã dzãsi a lor: “Voi tuts va s-vã scandalizats cu mini aestã searã, cã easti scriatã: ‘Va lu agudescã picurarlu shi oili va s-arãspãndeascã.’

²⁸ Ma dupã tsi va mi-injedzã, mini va mi ducã nãinti di voi tu Galilei.”

²⁹ Shi Petrul lji-dzãsi: “Ca s-hibã cã tuts alantsilji s-scandalizeascu cu tini, mini nu va mi scandalizescu.”

³⁰ Shi Isusul lji-dzãsi: “Mini ma ts-dzãcã dealihea cã azã, tu aeastã noapti, nãinti tsi cucotlu s-cãntã doauã ori, tini va mi aleapideshti trei ori.”

³¹ Ma elu insistãnda, dzãtsea: “Shi ca s-hibã tsi prindi s-mor cu tini, nu va ti aleapidescu pute.” Un soi dzãsirã shi tuts alantsilji.

Isus tu Ghetsemani

³² Deapoea agiumsirã la un loc tsi s-acljima Ghetsemani, shi elu lã dzãsi a ucenitsilor a lui: “Apunats-vã aoa, pãn cãndu mini s-hiu pãrãcãlsitã.”

³³ Shi lo cu nãsu Petrul, Iacovul shi Ioanul, shi ahurhi s-aibã frica shi agoniã.

³⁴ Sh-lã dãsi a lor: “Suflitlu a meu easti multu nvirinat, pãnã tu moarti, armãnets aoa shi s-hits dishtiptat.”

³⁵ Shi, cum s-dusi nihiam nãinti, cãdzu pi dintsi shi s-pãrãcãlsea, tsi ma s-putea, s-fudzea di la nãsu aestã oarã.

³⁶ Shi dzãsi: “Abba, Tati, itsido trã tini easti putut, dipãrteadz-lu di la mini aestã cupã. Ma nu si s-fac atsea tsi voiu mini, ma atsea tsi vrei tini!”

³⁷ Shi s-turnã nãpoi, li aflã durnjinda shi lji dzãsi a Petrului: “Simon ma dornji? Nu putush sã stai dishtiptat nits unã oarã?

³⁸ Armãnets dishtiptat shi pãrãcãlsit-vã tsi s-nu intrats tu provã. Duhlu easti etimu, ma truplu easti niputut.”

³⁹ S-dipãrtã nãpoi shi s-pãrãcãlsi dzãcãnda idhiili zboari.

⁴⁰ Shi cãndu s-turnã, lã aflã nãpoi tu somn, cã ocljilji a lor eara greli shi elji nu shtia tsi s-apãndisea.

⁴¹ S-toarnã di a treia oarã shi lã dzãtsi a lor: “Ninga ma durnjits sh-vã discurmats. Nãmalu, vini oara! Ia, Hiljilu a omlui ma s-prida tu mãnjili a amãrtioshilor.

⁴² Sculats-vã, s-ni dutsem. Ia, atselu tsi ma mi prida easti aproapi!”

Acãtsarea al Isus

⁴³ Shi tu atsea oarã, cãndu elu ninga ma grea, vini Iuda, un di doispridzatsilji, shi cu nãsu unã multsãmi marã cu spãts shi cu pãlenji, pitricut di mãrlji a preftsilor, di scriblji shi di aushlji.

⁴⁴ Sh-elu tsi ma lu pridea lji avea datã atsilor un semn: “Cai va s-bashã, elu easti. Acãtsats-lu shi adutsets-lu cu mult cãshtigã.”

⁴⁵ Shi cum agiumsi s-apruchiã trãoarã la nãsu shi lji dzãsi: “Rabbi, Rabbi!” Shi lu bãshã.

⁴⁶ Atumtsea elji bãgarã mãna pi nãs shi u-acãtsarã.

⁴⁷ Un di atselji tsi s-alfa aclo, scoasi spata, agudi sclavlu a arhipreftului shi lji tãljiã ureacljea.

⁴⁸ Shi Isusul apãndisinda, lã dzãsi: “Avets vinit cu spãts shi cu pãlenji tsi s-mi acãtsats?

⁴⁹ Cathi dzuã earam namisa di voi tu templu nvitsãnda shi voi nu mi acãtsat. Ma aeastã s-fatsi s-implineascã Scriturili.”

⁵⁰ Atumtsea ucenitsilji lu alãsarã sh-fudzirã tuts.

⁵¹ Shi un tinir, tsi era anvãrtit cu un pãndzã pi truplu dispuljat ma lu urma, shi elji lu acãtsarã.

⁵² Elu u alãsã pãndza shi fudzi dispuljat.

Isus Nãinti al Sinedrul

⁵³ Atumtsea elji lu adusirã Isusul la arhipreftlu iu s-adunarã mãrilji a preftsilor, aushlji shi scriblji.

⁵⁴ Shi Petrul lu urmã di diparti pãn nãuntru tu pãlatlu a arhipreftului shi s-apunã aclo deadun cu vigljitorlji shi s-ncãldza ningã foc.

⁵⁵ Shi mãrlji a preftsilor shi tutã sinedrul cãfta mãrtirii contra al Isus s-lu vãtãma, ma nu ma afla.

⁵⁶ Mults oaminj fãtsea mãrtirii arãdioasã contra a lui, ma mãrtiriili a lor nu undzea.

⁵⁷ Atumtsea niscãnts si scularã shi mãrtirsirã cu ilei contra a lui dzãcãnda:

⁵⁸ “Noi lu avem avdzãtã cã tsi ari dzãsã: ‘Mini va lu aspargã aestu templu adãratã cu mãnjili, shi di trei dzãli va s-adarã unã altã tsi nu easti faptã di oamnjilji.’”

⁵⁹ Ma nits ashã mãrtiria a lor nu s-uidisea.

⁶⁰ Atumtsea si sculã arhipreftulu namisa di cunvend shi lu ntribã Isusul dzãcãnda: “Nu apãndiseshti dip? Tsi ma mãrtirsescu aeshtã contra a tsãia?”

⁶¹ Ma elu pãpsi shi nu apãndisi dip. Arhipreftul nãpoi lu ntribã shi lj-dzãsi: “Tini eshti Hristolu, Hiljilu a Ghinicuvãntatlui?”

⁶² Shi Isusul dzãsi: “Mini escu. Shi voi va lu videts Hiljilu a omlui apunat tu nandreapta a Puteariljei shi vininda cu norilji a tserlui.”

⁶³ Atumtsea arhipreftulu, arupãnda stranjili dzãsi: “Tsi ananghi avem ti mãrtirioshilji?

⁶⁴ Voi lu avdzãt blãstemlu, cum lu videts?” Shi tuts lu giudicarã cu moarti.

⁶⁵ Shi niscãnts ahurhirã s-lu scuchea, s-lu anvãlea fatsa, shi s-lu agudea cu shupleacã shi s-lji dzãtsea: “Prufitipsea!” Shi vigljãtorlji lu agudea.

Petrul Arniseashti Isusul

⁶⁶ Cãndu Petrul eara nghios tu pãlat, vini unã sclavã a arhipreftului.

⁶⁷ Shi cãndu vidzu Petrul tsi ma s-ncãldza, bãgã oarã shi lj-dzãsi: “Shi tini earai cu Isus Nazareas.”

⁶⁸ Petru lu arnisi dzãcãnda: “Nu lu cunosc, nu achicãsescu tsi dzãts.” Deapoea ishi nafoarã tu ubor shi cucotlu cãntã.

⁶⁹ Shi sclava vidzãnda nãpoi ahurhi s-lu greascã atsilor tsi eara aclo: “Aestu easti unlu di nãshi.”

⁷⁰ Ma elu nãpoi lu arnisi. Shi nihiamã ma nãpoi oaminjli lji dzãsirã nãpoia a lui Petru: “Dealihina tini eshti un di atselji, cã tini eshti Galilean.”

⁷¹ Ma elu ahurhi s-blastimã shi si spigiurã: “Mini nu lu cunoscu atselu om ti cai ma grits.”

⁷² Shi cucotlu cãntã di a doaua oarã. Atumtsea a Petrului lj-vini tu minti zborlu tsi Isusul lji avea dzãsã: “Ma nãinti tsi cucotlu s-cãntã di doauã oarã, tini va mi arniseshti trei ori.” Shi cum mindui aestu, plãmsi.