Marc 11 - Bibla tu limba Rrãmãnã

Intrarea al Isus tu Ierusalim

¹ Tora cãndu s-apruchiarã di Ierusalim, cãtrã Betfagã shi Betania, ningã Muntili a Masnjilor, Isus pitricu doi di ucenitsilji a lui,

² dzãcãnda: “Imnats tu hoara di dininti a-voastrã, shi ma cãt s-intrats aclo, va s-aflats un gumãric ligat, tsi nu ljã-avea ncãlicat vãr. Dizligats-lu shi adutsets-lu la mini.

³ Shi macã vãr vã-dzãtsi: ‘Cãtse ma fãtsets ashã?’, apãndisits-lã: ‘Ljã-lipseashti a Domnului. Elu va u-toarnã trãoarã aoa.’”

⁴ Elji s-dusirã shi aflarã gumãriclu ligat aproapi di unã ushã, pi cali shi u-dizligarã.

⁵ Shi niscãnts di atselji tsi eara aclo lã dzãsirã a lor: “Tsi fãtsets? Cãtse u-dizligats gumãriclu?”

⁶ Aeshtã l-apãndisirã ashã cum lã avea dzãsã Isus shi elji lã alãsarã s-fugã.

⁷ Atumtsea ljã-adusirã al Isus cãricilu, bãgarã pi nãs mantolul a lor shi elu s-apunã pi nãs.

⁸ Mults oaminj l-ashtirna stranjili a lor pri cali shi alantsilji tãlja alumãchi di ponj sh-li aruca pri cali.

⁹ Shi cum atselji tsi nãdzea nãinti, shi atselji tsi yinjea dupã Isus, aurrla sh-dzãtsea: “Hosana! Vluyisitã easti atselu tsi yini tu numa a Domnului!

¹⁰ Vluyistã easti amirãriljea al David, tatãl a nostru tsi yini tu numa a Domnului. Hosana tu locurili mult analti!”

¹¹ Ashã intrã Isus tu Ierusalim shi tu templu. Sh-dupã tsi vidzu ghini itsido, bãgã oarã cã eara amãnat, inshi deadun cu doispridzatsilji cãtrã Betania.

Hiclu Uscat

¹² Alantã dzuã, cãnd ishirã dit Betania el avea foami.

¹³ Shi vidzãnda di diparti un hic tsi avea frãndzi, el s-dusi di videari nacã putea s-afla tsiva aclo. Ma cãnd s-apruchiã nu aflã tsiva, dicãt frãndzi, cã nu eara chirolu a hitsilor.

¹⁴ Shi Isus ljã-gri a hiclui, dzãcãnda: “Nitsunã s-nu mãcã pute frut di la tini.” Sh-ucenitsilji a lui lu-avdzãrã.

Cãtãrsirea al Tempului

¹⁵ Ashã agiumsirã tu Ierusalim. Isus dupã tsi intrã tu templu, apãrnji s-li aĝuneascã atselji tsi vindea shi acumpãra nãuntru a tempului sh-li rãsturnã measili a alãxitorilor di pãradzi shi scamnili a vinditorilor di purunghi.

¹⁶ Sh-nu alãsa vãr tsi s-purta lucruri prit templu.

¹⁷ Sh-lã nvitsa, dzãcãnda: “Vahi nu easti scriatã: ‘Casa a mea va s-acljeamã casa a pãrãcãlsirljei di tuti natsiunili’? Voi, lu avets adãratã ca unã pishtireauã di furlji!”

¹⁸ Amu scriblji shi mãrlji a preftsilor cãndu li avdzãrã aesti sboari cãfta cã cum s-lu vãtãma, ma avea fricã di nãs, cã tutã multsãmea eara ciudisit di nvitsãtura a lui.

¹⁹ Cãnd s-featsi searã, Isus ishi nafoarã di cãsãbã.

Pistipsirea Alihinoasã

²⁰ Tu alantã dzuã dimineatsa, tricãnda vidzurã cã hiclu eara uscatã dit radãtsinã.

²¹ Shi Petrul adusi a-minti shi lj-dzãsi: “Nvitsãtore, ia, hiclu tsi tini blãstimash easti uscatã.”

²² Sh-Isus apãndisinda u dzãsi a lor: “Avets pistipsirea al Dumnidzãu!

²³ Dealihea vã-dzacã macã vãr va ljã dzãc aishtui munti: ‘Scolã-ti shi arucã-ti tu amari’, sh-nu va s-aibã dilemã tu inima a lui, ma va s-pistipseascã cã atsea tsi ma dzãtsi va s-facã, itsido va s-lji si-adarã.

²⁴ Trã atsea ma vã dzãc, tuti atseali tsi voi cãftatsã pãrãcãlsinda, pistipsits cã va lã-loats shi a vauã va-sã si da.

²⁵ Shi cãndu ahurhits s-pãrãcãlsits, macã avets tsiva contra a vãrnui, ljirtats-lu tsi shi Tatãlu a vostru tsi easti tu tseruri, s-vã ljeãrtã amãrtiili a voastri.

²⁶ [Macã voi nu ljirtats, nits Tatãlu a vostru tsi easti tu tseruri, nu va-s-vã ljeartã amãrtiili a voastri.]”

Ntrãbarea al Fariseilor

²⁷ Dapoea elji vinjirã nãpoi tu Ierusalim, shi cãndu el imna prit templu, mãrlji a preftsilor, scriblji, shi aushlji s-apruchiarã,

²⁸ Sh-lji dzãsirã: “Cu tsi puteari li fats tini aesti lucri? Cai ts-u deadi aestã puteari tsi s-li fats aesti lucri?”

²⁹ Sh-Isus apãndisinda u dzãsi a lor: “Sh-mini va vã ntrebã tsiva. Apãndisits-nji sh-mini va vã-dzãc cã cu tsi puteari li fac aesti lucri.

³⁰ Pãtidzarea a Ioanului eara dit tser ama di la oaminji? Apãndisits-nji.”

³¹ Elji ahurhirã s-minduea namisa di nãsh: “Ma s-dzãtsem ‘dit tser’, elu va s-dzãc: ‘Atumtsea cãtse voi nu lji-pistipsitã?’

³² Ma s-ljã dzãtsem ‘di la oamnjili…’” (elji aveau fricã di populu, cã tuts dzãtsea cã Ioanlu easti dealihea un prufit).

³³ Trã atsea apãndisinda, lji dzãsirã al Isus: “Nu lu-shtim.” Sh-Isus apãndisinda, u dzãsi a lor: “Sh-nits mini nu ma vã-dzãc cã cu tsi puteari li fac aesti lucri.”