1 Ioan 5 - Bibla tu limba Rrãmãnã

Pistipsirea la Hristolu, Hiljilu al Dumnidzãu

¹ Caitsido tsi pistipseashti cã Isusul easti Hristolu, easti amintat di la Dumnidzãlu, shi caitsido tsi va Dumnidzãlu tsi lu ari amintat, va sh-atselu tsi easti amintat di la nãsu.

² Di aestã noi shtim cã vrem hiljilji a Dumnidzãlui, cãndu vrem Dumnidzãlu shi vigljem dimãndãrili a lui.

³ Cã aestã easti vrearea a Dumnidzãlui: tsi noi s-vigljem dimãndãrili a lui, cã dimãndãrili a lui nu sãntu greali.

⁴ Cã tuti tsi sãntu amintat di la Dumnidzãlu anichiseascã pristi lumea, sh-nichisirea pristi lumea easti pistea a noastrã.

⁵ Cai easti atselu tsi nichiseashti pristi lumea, mash atselu tsi pistipseashti cã Isusul easti Hiljilu al Dumnidzãu?

Mãrtiria al Dumnidzãu ti Hiljilji a lui

⁶ Isus Hristos easti atselu tsi vini prit apã ti pãtidzari sh-prit sãndzili a moartãljei a lui, nu mash prit apã, ma prit apã sh-prit sãndzi. Sh-Duhlu easti atselu tsi mãrtirseashti, cã Duhlu easti alihea.

⁷ Cã trei sãntu atselji tsi da mãrtirii tu tser: [Tatãlu, Zborlu shi Duhlu Sãntu, shi aeshti trelji sãntu un.

⁸ Shi trei sãntu atselji tsi mãrtirsescu pri loc]: Duhlu, apa shi sãndzili, sh-aeshti trelji sãntu pi un minti.

⁹ Macã noi apruchem mãrtiria a oamnjilor, mãrtiria al Dumnidzãu easti ma mari, cã aestã easti mãrtiria a Dumnidzãlui tsi elu deadi trã Hiljilu a lui.

¹⁰ Atselu tsi pistipseashti tu Hiljilu al Dumnidzãu ari aestã mãrtirii pi nãsu. Atselu tsi nu pistipseashti la Dumnidzãlu, lu ari faptã arãdios, cã nu pistipsi la mãrtiria tsi Dumnidzãlu deadi di Hiljilu a lui.

¹¹ Sh-mãrtiria easti aestã, Dumnidzãlu nã deadi bana eternã sh-aestã banã easti tu Hiljilu a lui.

¹² Atselu tsi ari Hiljilu, ari bana. Atselu tsi nu ari Hiljilu al Dumnidzãu, nu ari bana.

¹³ Vã scriai aesti a voauã [tsi pistipsits tu numa a Hiljilu a Dumnidzãlui], tsi s-shtits cã avets bana eternã shi s-pistipsits tu numa a Hiljilu a Dumnidzãlui.

Putearea a Pãrãcãlsiriljei

¹⁴ Aestã easti sigurantsa tsi avem nãinti a lui: ma cãftãm tsiva dupã vrearea a lui, elu nã-u da.

¹⁵ Shi macã shtim cã elu nã-li avdi tuti atseali tsi cãftãm, noi shtim cã l-avem atseali tsi lji cãftãm a lui.

¹⁶ Macã vãrã veadi fratili a lui cã fatsi unã amãrtii tsi nu dutsi tu moarti, s-pãrãcãlseascã a Domnului, sh-elu va lji da bana, atsilor tsi fac amãrtii tsi nu duc tu moarti. Ari amãrtii tsi duc tu moarti, nu dzãc tsi elu s-pãrãcãlseascã trã aestu.

¹⁷ Itsi nindriptati easti amãrtii, ma ari amãrtii tsi nu dutsi tu moarti.

¹⁸ Noi shtim cã caitsido tsi easti amintat di la Dumnidzãlu nu poati s-bãneadz amãrtisãnda, atselu tsi easti amintat di la Dumnidzãlu s-veaglji, shi Slabulu nu lu pligueashti.

¹⁹ Noi shtim cã him di la Dumnidzãlu shi cã ntreagã lumea s-aflã sum puterea a Slabului.

²⁰ Noi shtim cã Hiljilu al Dumnidzãu vini shi nã deadi aduchirea tsi noi s-cunushtem atselu tsi easti Alihinoslu, shi noi him tu Alihinoslu, tu Hiljilu a lui Isus Hristos. Aestu easti alihinoslu Dumnidzã shi bana eternã.

²¹ Ficiori, afirits-vã di idulji.