1 Ioan 3 - Bibla tu limba Rrãmãnã

Hiljilji a Dumnidzãlui

¹ Videts tsi vreari marã nã deadi Tatãlu, tra s-nã numim hiljilji al Dumnidzãu, shi dealihea noi him. Trã aestã, lumea nu nã cunoashti noi, cã nu lu ari cunuscutã atselu.

² Multuvruts, tora him hiljilji al Dumnidzãu, ma ninga nu si-ari aspusã tsi va him. Shtim cã, cãndu si aspunã elu, va him un soi cu nãsu, cã va l-videm cum easti elu.

³ Shi caitsido tsi ari aestã nãdii tu nãsu, prindi si s-curã ashã cum elu easti curat.

⁴ Cai fatsi amãrtii, fatsi shi cãlcarea a nomlui, cã amãrtiia easti cãlcarea a nomlui.

⁵ Shi voi lu shtits cã elu si-fãnipsi tsi s-dipãrteadzã amãrtiili a noastri, cã tu elu nu ari amãrtii.

⁶ Cai armãni tu elu nu amãrtiseashti, cai amãrtiseashti nu lu-ari vidzutã sh-nu lu-ari cunuscutã.

⁷ Ficiori, vãrã s-nu vã arãdã. Atselu tsi fatsi ndriptati easti ndreptu, ashã cum elu easti ndreptu.

⁸ Cai fatsi amãrtii, easti di la draclu, cã draclu amãrtisi di tu ahurhitã. Trã aestã s-fãnipsi Hiljilu al Dumnidzãu: trã asprãdzeari lucrili a dracului.

⁹ Cai s-amintã di la Dumnidzãlu nu va s-continueadzã s-amãrtiseascã, cã simintsa al Dumnidzãu armãni la nãsu, shi nu poati s-bãneadzã amãrtisãnda, cã s-amintã di la Dumnidzãu.

¹⁰ Di la aestã s-cunoascã hiljilji al Dumnidzãu sh-hiljilji a dracului. Caitsido tsi nu fatsi ndriptatea, nu easti di la Dumnidzãu, ahtar nu easti nitsi atselu cai nu va fratili a lui.

¹¹ Cã aestã easti mesajul tsi avdzãtã di tu ahurhitã: s-nã vrem un cu alantu,

¹² nu cum fu Cainul, cai eara di la slabulu shi vãtãmã fratili a lui. Sh-ti tsi lu vãtãmã? Cã faptili a lui eara uruti, iarã a fratili a lui eara ndreapti.

¹³ Nu vã ciudisits, fratsi a melji, macã lumea vã aurashti.

¹⁴ Noi lu shtim cã avemu tricutã di la moartea tu banã, cã lji vrem fratsilji. Cai nu va fratili a lui, armãni tu moarti.

¹⁵ Caitsido tsi aurashti fratili a lui easti vãtãmãtor, shi voi lu shtits cã nitsiun vãtãmãtor nu ari banã di totãna dãnãsit tu nãsu.

¹⁶ Di aestã lu avem cunuscut vrearea: elu deadi bana a lui trã noi, trã atsea sh-noi prindi s-dãmu bana a noastrã trã fratsilji.

¹⁷ Shi macã unlu ari bunili aishtei dunjei shi veadi fratili a lui cai easti tu ananghi shi u ncljidi inima a lui, cum va armãnã la nãsu vrearea a Dumnidzãlui?

¹⁸ Ficiori, si nu vrem cu zboari, nits cu limbã, ma cu fapti shi cu alihea.

¹⁹ Sh-di aestã noi shtim cã him cu alihea shi va cãndãrsimu ininjli a noastri nãinti a Lui.

²⁰ Cã, ma s-nã catadzicãseascã inima a noastrã, Dumnidzãlu easti ma marã di inima a noastrã shi li shti tuti.

²¹ Multuvruts, macã inima a noastrã nu nã catadzicãseashti avem sigurantsã nãinti a Dumnidzãlui.

²² Sh-itsi cãftãm, u lom di la nãsu, cã fãtsem ordinli a lui shi fãtsem atseali tsi l-arãsescu a lui.

²³ Sh-aestã easti ordinlu a lui tsi pistipsim tu numa a Hiljilu a lui, Isus Hristos shi s-lu vrem unu-alantu cum nã dimãndã elu.

²⁴ Atselu tsi veaglji ordinli a lui, armãni tu Dumnidzãlu, sh-elu tu nãsu. Di aestã noi shtim cã elu armãni cu noi: di Duhlu tsi elu nã deadi.