Tite 1 - Nyanmien nde Ufle

Paul kle fluwa nga kô maan Tite

¹ M Paul n ti Nyanmien i swran bo Jésus-Christ sunmaan min ke n wuka bé nga Nyanmien kpaa bé'n man bé lafi i su kpa, ye bé wun nde nanwle nga bé bo bé srô Nyanmien'n bé sii'n i wle kpa,

² nan bé fa bé wla gua anannganman nguan'n su. Nyanmien b'o bua'a atô'n, ke o nian yi'a men'n o séé ke nh nyanh nguan so'n.

³ Ke ble ng'o siéli'n dyuli'n, o yii i nde so'n nglô. É Défue Nyanmien'n ye o fa nde so'n wlaa n sa nun ke n kaan.

⁴ O man nh kleh fluwa nga ble o Tite bo a ti n wa sakpa'n, yele ke é nnyon'n Nyanmien kunngba'n su ye é lafio. Man é Si Nyanmien nin é Défue Christ-Jésus be man a nyan yé, ye man o wun dyo o fouun!

O fa Crète lo asonun'm bé siésiéle'n wle tite sa nun

⁵ N yatyii o Crète lo ke a siésié sa nga ba wié'e i siésié'n, ye a sié asonun kpenngben kloklo'm bé su. Bu bé siéle nde nga n kan kléli wo'n i akunndan:

⁶ man swran nga béh feh sié asonun kpenngben'n o yô swran bo bé kwla satyi'e i wun kaan sa, bo i yi ti kun, bo i mma'm bé lafi Nyanmien su, bo bé kwla satyi'a bé dunman ke bé nzuen ti te, bé nyin ti kéklé.

⁷ Man asonun sunianfue'n yô swran bo bé kwla satyi'e i wun kaan sa, afin o nian Nyanmien ninngé'm bé su. Nanh mon o yô swran b'o yô i bobo i klun sa, nin ya fafue, nin nzanbôefue, nin utré klôfue, nin swran b'o kunnde sika i wafa ng'o ti'e i su'n.

⁸ Sannge mon o yô swran b'o ti aklunyéfue, b'o klô sa ng'o ti kpa'n, b'o yô sa i nuan su, b'o ti swran kpa, b'o ti Nyanmien lie mlonmlon, b'o si i bobo wun su nian.

⁹ Mon o yô swran b'o lafi nde nanwle nga bé klélii'n su kpa, nan nde nanwle b'o klé'n ti, o kwla tu bé fo, ye o klé bé nga bé kpalô i nde'n ke bé si ke ba fon.

¹⁰ Afin swran kpanngban bé nyin ti kéklé, bé kan nde ngbenngben fa laka swran mun. Bé kpanngban lika bé fin Juif'm bo ba katyi Christfue'n bé nun.

¹¹ Sé i sofue mun ke bé yatyi bé nde so'm bé kanle. Bé klé liké ng'o ti'e i su'n, bé fa kunnde sika ng'o ti'e i kunndewle'n, o man bé bô awlô'n wié sékésékéséké.

¹² Crètefue'm bé bobo bé liké kléfue kun séé ke: Crètefue'm bé bua atô titi, bé ti nnen wlefue, bé ti nveefue alie safue.

¹³ I nde so'n ti nanwle. I so'n ti, idyo bé kpa, man bé lafi Nyanmien su kpa,

¹⁴ nan ba lafi'a Juif'm bé nde b'o ti ke ngôwa sa'n su, ye ba yô'a sa nga swran nga ba yatyi nde nanwle'n bé sé bé ke bé yô'n ti.

¹⁵ Swran nga bé akunndan'n ti kpa'n, liké kwlaa ti kpa bé nyrun, sannge swran nga bé akunndan'n ti'a kpa, bo bé lafi'a Nyanmien su'n, liké fi ti'a kpa bé nyrun. Afin bé akunndan'n ti tete, bé yô saa bé klun ti'a bé.

¹⁶ Bé yô bé wun ke bé si Nyanmien, sannge sa nga bé yô'n o klé'a ke bé sii. Bé wun yô te, bé nyin ti kéklé, bé kwla yô'a sa kpa bo kun sa.