Rɔmfuɛ Mun 9 - Nyanmien nde Ufle

Israëlfue'm bo Nyanmien faa bé'n

^1-2 Ke n sé ke awlabôe'n wô n su dan, ye min awlen'n kpe n klun'n, Christfue bo n ti'n ti, n di nanwle, Nyanmien Wawe'n kusu man n si n klun lo wéiin ke m bua'a atô.

³ Afin se Nyanmien bô n sannzan bo min nin Christ é bu, nan n niaan'm bo min nin bé é ti nvlé kun'n bé nyan bé ti'n, nh séh Nyanmien ke o yô n so.

⁴ Bé ti Israëlfue, Nyanmien Kpli'n man bé katyii i wa, o nin bé trannin, o kléé bé liké ng'o sé ke oh yôh man bé'n, o fe i mmla'n maan bé, o kléé bé i sole wafa'n nin liké nga o wa yô'n.

⁵ Bé ti é nannan'm bé anunman, Christ kusu ke o katyii swran'n, ôsu so'n nun ye o balio. I ye o ti Nyanmien b'o sié liké'n kwlaaa, bé bô i dunman titi. Mon o yô so!

⁶ Nanwle, nanh ke nde nga Nyanmien kannin'n wa kwle'e i yô tio. Afin bé kwlaa nga bé fin Israël ôsu'n nun'n, nanh bé ngba ye bé ti Israëlfue kpaa.

⁷ I kunngba'n, ba kwlaa nga bé fin Abraham ôsu'n nun'n, nanh bé ngba ye bé ti i ôsufue kpaa, afin Nyanmien séé i ke: «Isaac ôsu lie'n ye béh buh bé ke bé ti o lieo.»

⁸ O man, nanh bé nga bé ti Abraham ôsufue bé awulie'n nun'n bé ye bé ti Nyanmien wa kpaa, sannge bé nga Nyanmien dun mmua sé ke bé wu bé'n, bé ye bé bu bé ke bé ti i wa kpaa.

⁹ Liké nga Nyanmien sé ke o wa yô'n ye: «Afue ékun biki sa mh bah ye Sara wa wu ba yasua kun.»

¹⁰ Ye kusu Rébecca nin é nannan Isaac bé wunnzeli nda.

^11-12 Ke bé nian wu'a ba so mun bo bé nian si'a liké nga bé flee kpa nin te'n, Nyanmien séé Rébecca ke: «Ba kpenngbenfue'n oh suh i sinma'n.» O yôé so nan bé si ke o fa swran nga i bobo klô'n, o nia'an liké nga swran'm bé yô'n su ye o fa fa béo, sannge bé nga o fle bé'n bé ye o fa béo.

¹³ Afin bé klee ke: «N klô Jacob, Sannge n kpo Ésaü.»

¹⁴ ?O man éh séh se? ?É sé ke Nyanmien yô'a sa i nuan su? O ti'a so mlonmlon!

¹⁵ Afin o séé Moïse ke: «Swran nga n klô ke nh wunh i aunnvue'n, nh wunh i aunnvue, ye swran nga n klô ke nh sih i aunnvue'n, nh sih i aunnvue.»

¹⁶ I so'n fi'an liké nga swran klô'n nin liké ng'o mien i nyin yô'n, sannge o fin Nyanmien b'o si aunnvue'n.

¹⁷ Afin é kenngen Nyanmien nde nga bé kleli'n nun ke, Nyanmien séé Pharaon ke: «N siéli o famien ke n fa o n fa yi min wun nglô ke n kwla sa'n kwlaa yô, nan n dunman'n fu men wunmuan'n nun.»

¹⁸ O man é si ke swran ng'o klô ke oh wunh i aunnvue'n, o wun i aunnvue, ye swran ng'o klô ke oh kétééh'n, o kétéé.

¹⁹ Wiénuon swran wié wa usa n ke: ?Se o ti so'n, o yô se ti ye Nyanmien fa sa nga é yô'n gua é suo? Afin swran fi kwla kpalô'a Nyanmien nuan.

²⁰ ?O bo a usa so'n, a ti o lie se bo a yiyi Nyanmien nuan nuon? «?Liké nga bé fa ufa wu'n, o kwla use i ufue'n ke: O yô se ti ye a wuu n soo?»

²¹ ?Se ufue'n o kwla fa'a fa tole kunngba'n wu'a se wafa ng'o klô'n, se o wui klaan ô, se o wu'e klaan kpa ô, o kwla yô'e so?

²² ?Ye Nyanmien kusu yô'a swran mun ke se ufue'n yô i se mun'n sa? ?Se o klô ke swran'm bé si ke wa fa bé wun ya, ye o kwla sa kwlaa yô'n, ye se bé nga bé kun i ya bo bé nin kunle fata'n, o blu su'n, o kwla yô'e so?

²³ ?Se o yôé so ke o fe i yé dan b'o yô é i klun-ufué su'n klé yé'n, o kwla yô'e so? Afin é b'o wunnin é aunnvue'n é ti ke se klaan sa. O dun mmua siéé é ke é nyan nyrun.

²⁴ É b'o fleli yé'n, nanh é Juif mun é ngunmin ye o flee yéo, sannge bé nga bé ti'a Juif'n bé ô nun wié.

²⁵ É kenngen Osée fluwa'n nun ke Nyanmien sé ke: «Bé bo bé ti'a n swran'n, nh fleh bé n swran, Ye nvlé nga n klômen'n, nh fleh nvlé so'n nunfue mun n swran kpa.

²⁶ Lika nga n séé lofue'm bé ke: An ti'a n swran'n, Béh fleh lofue mun Anannganman Nyanmien mma mun.»

²⁷ Ésaïe kusu kaan Israël i nde, o kpan sé ke: «Kannze man Israël mma'm bé tre ke dyénvié nuan aunnyan sa'n, Bé nun kaan sa ye béh kah le, ye béh nyanh bé tio.

²⁸ Afin sa nga é Min'n sé ke oh yôéh men'n nun'n, oh yôéh trelele, oh wiéh.»

²⁹ Ésaïe kunngba'n keen laa ke: «Se é Min Anannganman Nyanmien Kpli'n Wa yatyi'a é ôsu kaan sa'n, Wuun éh yôh ke Sodome (*f36*) sa, Ye éh katyih ke Gomorrhe (*f36*) sa.»

Israël'm bé nin dyasin fe'n

³⁰ ?O man éh séh se? Bé bo ti'a Juif bo ba kunnde'a ke Nyanmien bu bé swran kpa'n, Nyanmien buu bé swran kpa i su bo bé lafili'n ti.

³¹ Sannge Israëlfue'm bo bé kunnde ke béh nyanh mmla kun béh fah su nan Nyanmien bu bé swran kpa'n, ba nyenmen.

³² ?Nzu tio? Afin bé kunnde'a ke bé lafi Nyanmien su nan bé yô swran kpa, sannge bé bu ke bé yô swran kpa bé sa kpakpa bo bé yô bé'n bé ti. Bé dya kplaa yebue bo swran'm bé fin asé su'n,

³³ bo bé kleli i wun nde ke: «Anh nian, nh fah yebue kun sié Sion (*f14*) lo, oh kplah swran'm bé dya, Yebue dan kun bo swran'm béh fin asé su. Sannge swran ng'o lafi i su'n, i nyin su gua'a asé.»