Rɔmfuɛ Mun 4 - Nyanmien nde Ufle

Sa nga Abraham yôli bo é nian su'n

¹ ?Se o ti so'n, é kan é nannan Abraham i lie'n se? ?Nzu ye o nyennin io?

² Afin se Nyanmien buli Abraham swran kpa i sa kpa b'o yôli'n ti'n, wuun o le liké b'o fa di i nuaan. Sannge o kwla di'e i nuan Nyanmien nyrun,

³ afin é kenngen Nyanmien Nde nga bé kleli'n nun ke: «Abraham lafii Nyanmien su, o man i su b'o lafi'n ti, o bulii swran kpa.»

⁴ Se swran kun di dyunman'n i kale nga bé fa tue'n bé bu'e i ke liké bo ba fa tye io, sannge i akatuaa.

⁵ Sannge swran ng'o yô'a liké fi, nan o lafi Nyanmien b'o bu swran b'o srô'a Nyanmien'n i swran kpa'n i su'n, o katyi swran so'n i swran kpa i su b'o lafi'n ti.

⁶ I kunngba'n David keen i ke, swran nga Nyanmien nie'en i nyôlie'n su ye o bui swran kpa'n, i lie su ti yé. O sé ke:

⁷ «Bé nga bé ton mmla'n bo Nyanmien yatyi tye bé'n B'o kata bé sa nga bé yôé'n su'n, bé lie su ti yé!

⁸ Swran nga é Min Nyanmien'n bu'e i sa b'o yôé'n i akunndan kun'n, i lie su ti yé!»

⁹ ?Ye so'n, o ti bé nga bé wlaa bé klen'n, bé ngunmin bé lie, annze o ti bé nga ba wla'a bé klen'n bé kusu bé lie wié? Afin é sé ke: «Nyanmien su bo Abraham lafi'n ti o man o bui swran kpa.»

¹⁰ ?Ke oh buih so'n, wuun o ti se? ?Ba wle i klen annze bé nian wle'e i klen? Wuun bé nian wle'e i klen.

¹¹ Nyanmien dun mmua bui swran kpa i su b'o lafi'n ti, i sin ye bé wlee i kleon. O fa klen wlale so'n siéé Abraham nzolie b'o ti liké nga wa dun mmua yôé'n i lalôfue, nan Abraham yô bé kwlaa nga, kannze ba wla'a bé klen'n, bé Nyanmien su bo bé lafi'n ti, o bu bé swran kpa kusu wié'n, bé si.

¹² Ye o ti bé nga bé wlaa klen bo bé lafi'a bé klen wlale'n ngunmin su, sannge bé nanti adyale kunngba nga Abraham nanti su'n ke o nian wla'a klen'n o lafi Nyanmien su'n, i su wié'n, bé si.

Sa nga Nyanmien waan oh yôh man é i su bo é lafi'n ti'n

¹³ Nyanmien séé Abraham ke men'n oh yôh i nin i anunman'm bé lie. Nanh mmla'n b'o fa su'n ti ye o séé i soo, sannge i su b'o lafi b'o bui swran kpa'n ti ye o séé i soo.

¹⁴ Se bé nga bé di mmla'n su'n bé ye bé nyan liké nga Nyanmien séé ke oh fah man bé'n, wuun Nyanmien sulafile'n o ti ngben, ye liké ng'o séé ke oh yôh'n o keen ngben.

¹⁵ Mmla'n ye man swran kun Nyanmien yaa, afin se mmla'n nu'an le'n, bé tonman.

¹⁶ I so'n ti, liké nga Nyanmien waan oh fah man bé'n, o fa man bé i su bo bé lafi'n nin yé dan b'o yô bé'n ti, o man sa nga Nyanmien séé ke oh yôh'n, san oh yôh man Abraham anunman'm bé kwlaa. O tié i anunman nga bé di mmla'n su'n bé ngunmin bé lie, sannge o ti i anunman nga bé lafi Nyanmien su ke i b'o ti é kwlaa é nannan'n i lie'n sa'n, bé lie wié.

¹⁷ Afin bé klee ke: «M man ah yôh nvlé kpanngban kpa bé si.» Nyanmien b'o lafi i su'n b'o tyen swran nga wa wu'n, b'o bô liké nga bé nu'an le'n bé dunman ke liké bo bé ô le sa'n, i nyrun'n, o ti é si.

¹⁸ Abraham le'a liké fi b'o kwla fe i wla'n gua suo, kannze o ti so'n, o fe i wla'n guaa Nyanmien su, o lafi nde nga Nyanmien kannin'n su, o sé ke: «Ke o ôsu'n o wa tre ke nga sa.» O man o yôô nvlé kpanngban kpa bé si.

¹⁹ Ke bé wulii'n, o su wa di afue ya. Ke o bu ôké bo wa i ba wule bo wa sin'n i akunndan'n, o nin i so'n ngba, wa yi'e i wla'n Nyanmien su.

²⁰ Ke o bu liké nga Nyanmien séé i ke oh yôh'n i akunndan'n, i akunndan'n yô'a nnyonnyon, sannge o dyran kéklé Nyanmien su b'o lafi'n ti, ye o menmen.

²¹ I wla ô su kpa ke liké nga Nyanmien séé i ke oh yôh'n, o kwla yô.

²² I so'n ti ye «i su b'o lafi'n ti, o bulii swran kpa nion.»

²³ Nenh i ngunmin ti ye bé klelii ke, «o bulii swran kpa nion,»

²⁴ sannge é bo é lafi Nyanmien b'o tyennin é Min Jésus'n b'o su wa bu é swran kpa wié'n i su'n, é lie ô nun wié.

²⁵ Nyanmien yii i ke o wa wu sa nga é yôli'n ti, ye é swran kpa bule ti ye o tyennin io.