Rɔmfuɛ Mun 3 - Nyanmien nde Ufle

¹ ?Se o ti so'n, ke bé sé ke bé ti Juif'n, nzu liké ye bé nyen b'o tra swran wié'm bé lie nion? ?Ye nzu liké ye bé nyen klen wlale'n nuon?

² Liké'n kwlaa nun nga bé nyen'n tra swran wié'm bé lie'n. Afin bé ye Nyanmien fe i nde'n maan béo.

³ ?O man é sé se? ?Se swran wié'm bé lafi'a Nyanmien su'n, i su bo bé lafiman'n ti, o man i nanwlefue b'o ti'n o katyi?

⁴ O su yô'a so mlonmlon! Kannze swran kwlaa bé yô atôfue'n, sannge Nyanmien lie'n, san nanwle ye o dio! Afin bé klee ke: «Ke a kan nde'n, béh wunh ke o nde'n yô fe, Ye ke bé di o dyole'n, o nde'n kwlah bé.»

⁵ ?Se sa te nga é yô'n man bé wun ke Nyanmien ti kpa'n, é sé se? ?Ye se i ya'n dyaô'n, éh séh ke o ti'a kpa? — Kpo swran akunndan ye n fa ken i soo. —

⁶ O su yô'a so mlonmlon! ?Afin se Nyanmien di'a nanwle'n, o yô se ye o kwla di menfue'm bé dyoleo?

⁷ ?Sannge se min atô'n o man bé wun wéiin kpa ke Nyanmien di nanwle b'o i nun o nyan dunman'n, o yô se ti ye bé te bu min sa te yôfueo?

⁸ ?Ye nzu ti ye é sé'a ke: Man é yô sa tete nan i agualie'n o gua é kpaa? Swran wié'm bé satyi n dunman ke, ke n sé soo. Se bé sé ke swran so'm ba di fo'n, o ti su.

Swran fi ti'a kpa

⁹ ?Se o ti so'n, é yôé se? ?É Juif mun é ti kpa tra swran nga mun? O ti'a so mlonmlon! Afin ya dun mmua sé ke sa te'n wa ka swran'n kwlaa bé nun, Juif ô, swran wié mun ô.

¹⁰ Afin bé klee ke: «Swran kpa bo kun sa nu'an le, O le'a bé nun bo kun,

¹¹ Bé nun kun sa wu'an sa wle, Bé nun kun sa fe'e i wun manta'an Nyanmien.

¹² Bé kwlaa ba yatyi Nyanmien atin'n, bé kwlaa ba satyi, Bé nun wié fi yô'a sa kpa bo kun, O le'a bé nun bo kun.

¹³ Bé klun lo'n ti ke ndia bo ba tiké su'n sa, Bé fa bé nuan'n ye bé laka swran muon. Bé nuan nun nde'n ti ke wuô boyré sa.

¹⁴ Amuennwua'n nin nde tete'n wô bé nuan nun.

¹⁵ Ke bé ti swran kunle ngan'n bé dyraan o dyranman,

¹⁶ Lika kwlaa nga bé sin le'n, bé wun bé sa ôsu,

¹⁷ Bé si'a atin nga bé sin suo bé nyan aladyé'n.

¹⁸ Nyanmien ti'a liké fi bé nyrun, o man bé srômen.»

¹⁹ É si ke nde kwlaa ng'o ô mmla'n nun'n o ti bé nga bé di su'n bé lie, o man swran fi su kwla uke'e i nuan, sannge béh fah swran'n kwlaa ko Nyanmien dyasu.

²⁰ Nyanmien su bu'a swran fi swran kpa i mmla'n su fale'n ti, afin mmla'n ti ye man bé si liké nga bé fle ke sa te nion.

Jésus-Christ i su lafile b'o man Nyanmien bu swran swran kpa'n

²¹ Sannge sien'n Nyanmien klé é wafa ng'o fa bu swran swran kpa'n, b'o fi'an mmla'n nun'n, afin bé klee mmla'n nun ye Nyanmien nuan idyofue'm bé ken i nde ke,

²² Nyanmien bu bé kwlaa nga bé lafi Jésus-Christ su'n bé swran kpa, afin i nyrun swran fi kpa tra'a wié.

²³ Afin swran'n kwlaa bé yôô sa te, o man anyrunnyan nga Nyanmien waan oh manh bé'n, o tô fuaan bé.

²⁴ Sannge Nyanmien i klun-ufué dan'n ti o bu bé swran kpa, wa dé'a bé liké fi, Christ-Jésus b'o déli bé'n ti.

²⁵ Ke o yô nan ya si ke Nyanmien ti kpa'n, o fa Jésus maan é ke é fa yi é ti te, nan ke bé kô kuin'n, bé bo bé lafi i su'n, sa te nga bé yôli'n, Nyanmien yatyi tye bé i mmôdya'n ti. Afin laa sa nga bé yôlii'n, o blu su.

²⁶ Sannge ôle nga é ô ye'n, o klé é wafa ng'o fa bu swran swran kpa'n, afin o klé i wun ke o ti kpa ye o bu bé nga bé lafi Jésus su'n bé swran kpa.

²⁷ ?Se o ti so'n, nzu su ye é dyran fa di é nuaan? É le'e i so liké mlonmlon! ?Nzu ti ye é le'e i so liké nion? ?Mmla'n b'o man é si liké nga é yô'n tio? Tyetye, Nyanmien bo é lafi i su'n tio.

²⁸ Afin é bu i ke, nanh mmla'n bo swran fa su'n ti ye Nyanmien bui swran kpaa, sannge i su b'o lafi'n ti ye o bui swran kpaa.

²⁹ ?Nyanmien'n ti Juif'm bé ngunmin bé lie? ?O ti'a bé nga bé ti'a Juif'n bé lie wié? O ti bé lie wié,

³⁰ afin Nyanmien kunngba'n ye o bu bé nga bé lafi i su'n bé swran kpaa, se bé wlaa bé klen ô, se ba wla'a bé klen ô.

³¹ ?Nyanmien su bo bé lafi so'n ti, o man é bu'a mmla'n i liké fi kun? É bu'e i so mlonmlon! Sien'n é bui liké dan tra laa'n.