Rɔmfuɛ Mun 16 - Nyanmien nde Ufle

Bé liké yôle

¹ N klô ke an si é niaan bla Phoebé, o ti Cenchrées lo asonunfue'm bé lika nianfue.

² O man anh so i nun kpa é Min'n ti, ke Nyanmien i swran'm bé so bé wiéngu nun'n sa. Liké kwlaa ng'o mien i sa'n, anh yô men, afin nanwle, o tii swran kpanngban bé wun nyaan nun, ye o nian n kusu n lika kpa.

³ Nh yôh Prisca nin Aquilas bo bé ti n wiéngu Christ-Jésus i dyunman nun'n, bé liké.

⁴ N ti bé fa bé wun maan wié'n, i so'n ti, n la bé asé, ye bé nga bé ti'a Juif bo bé ti asonunfue'n bé kwlaa bé la bé asé wié.

⁵ Nh yôh asonunfue nga bé yia bé awlô le'n, bé liké. Nh yôh Épaïnète b'o fe i wun maan Christ Asie men'n nun lo klikli b'o ti n swran kpa'n, i liké.

⁶ Nh yôh Marie b'o dii dyunman dan man amun'n, i liké.

⁷ Nh yôh Andronicus nin Junias bo bé ti n wôsufue'n, bé liké. Bé ti n wiéngu bisuafue, bé nga Jésus sunmaan bé'n, bé bô bé dunman kpa. Bé dun mmua fa bé wun maan Christ, nan man fa min wun a men.

⁸ Nh yôh Ampliatus b'o ti n swran kpa é Min'n ti'n, i liké.

⁹ Nh yôh Urbain b'o ti é wiéngu Christ i dyunman nun'n, o nin Stachys n swran kpa'n, bé liké.

¹⁰ Nh yôh Apellès b'o ti Christfue kpa'n, i liké. Nh yôh Aristobule i awlôfue'm bé liké.

¹¹ Nh yôh Hérodion b'o ti n wôsufue'n, i liké. Nh yôh Narcisse i awlôfue'm bo bé lafi é Min'n su'n, bé liké.

¹² Nh yôh Mmô Tryphène nin Mmô Tryphose bo bé di dyunman man é Min'n, bé liké. Nh yôh Mmô Perside b'o ti é swran kpa'n, b'o dii dyunman kpa man é Min'n, i liké.

¹³ Nh yôh Rufus é Min'n i swran b'o ti kpa'n, o nin i nin b'o katyii min nin'n, bé liké.

¹⁴ Nh yôh Asyncrite, nin Phlégon, nin Hermès, nin Patrobas, ye Hermas, o nin é niaan nga bé nin bé ô le'n, bé liké.

¹⁵ Nh yôh Philologue, nin Julie, nin Nérée, nin i niaan bla, nin Olympas, o nin Nyanmien i swran'n kwlaa bo bé nin bé ô le'n, bé liké.

¹⁶ Se an wun amun wun'n, anh yô amun wiéngu liké. Christ i asonunfue'n kwlaa béh yôh amun liké.

¹⁷ Aniaan mun, nh sreh amun kpa, anh nian amun wun bé nga bé fa'a nde nga an faa su'n su, bo bé fa afien satyie'n wla amun afien, bo bé satyi swran ti nun'n bé lika. Nanh an fa amun wun mantan bé.

¹⁸ Afin swran wafa so mun, nanh Christ b'o ti é Min'n i dyunman ye bé dio. Bé bobo bé klun sa lie'n ye bé yôo. Bé kan nde fe, bé fa bé nuan laka bé nga bé nian wu'an sa wle'n.

¹⁹ Swran'n kwlaa bé sé ke an ti anyinyiefue. Ke an yô so'n, o dyo n klun, sannge n klô ke an yô ngwlelefue bo bé yô sa kpa, ye nanh man sa te bo kaan sa tran amun wun.

²⁰ O tye kaan Nyanmien b'o man swran di aladyé'n, o man amunh tiah Satan (*f6*) su, amunh nunkuinh. Man é Min Jésus yô amun yé tititi!

²¹ Timothée b'o ti n wiéngu dyunman nun'n, nin Lucius, nin Jason, nin Sosipater, ye n wôsufue mun béh yôh amun liké.

²² Min Tertius bo Paul man n klee fluwa ye'n, ke é nin é Min'n é ti swran wunmuan'n ti, nh yôh amun liké.

²³ N sikéfue Gaïus bo asonunfue'n kwlaa bé yie i awlô lo'n, oh yôh amun liké. Éraste klo'n su sika sunianfue'n nin é niaan Quartus béh yôh amun liké.

²⁴ [Man é Min Jésus yô amun kwlaa amun yé tititi! Mon o yô so!]

Nyanmien manmanle

²⁵ Nyanmien Kpli kwla ô! Afin n dyasin fe'n nin Jésus-Christ i nde bo n kan'n, nin sa nga Nyanmien yi'e i nglô klé'a é laa bo sien'n ya wun i wle'n ti, o man an kwla dyran kéklé. Ke o fin men'n i bôbôle nun'n, Nyanmien fiaa sa so'n su,

²⁶ sannge sien'n, fluwa nga i nuan idyofue'm bé kleli'n man ya wun i wle wéiin. Anannganman Nyanmien siéli i so nan bé kwlaa nga bé ti'a Juif'n bé lafi i su ye bé nyin yii.

²⁷ Jésus-Christ ti man é yi Nyanmien Kpli bo ngwlelefue fi nu'en i sin'n i aye tititi! Mon o yô so!