Rɔmfuɛ Mun 15 - Nyanmien nde Ufle

Man é yô liké ng'o dyo é wiéngu klun'n

¹ É bo é wun sa so'n i wle kpa'n, man é uka bé nga bé wu'en i wle kpa'n, nanh man é yô liké ng'o dyo é bobo é klun'n.

² Man é kwlaa é yô liké ng'o dyo é wiéngu klun'n, i so'n nun é uke mon o yô kpa.

³ Afin Christ wa yô'a liké ng'o dyo i bobo i klun'n, yele ke bé klee ke: «Nzôwa nga bé kô fa kô kpe wo'n, bé fa kpee min.»

⁴ Nde kwlaa nga bé klee bé laa'n, bé kle i so ke bé fa klé é ngwlele, nan Nyanmien fe i nde so'n wla é fanngan, nan é tra é awlen, é fa é wla'n gue i su.

⁵ Man Nyanmien b'o wla swran fanngan b'o man bé tra bé awlen'n, o man amun akunndan'n yô kun ke Christ-Jésus bobo klé é ke é yô'n sa.

⁶ Man amun bô yô kun so nan amun kwlaa an yi é Min Jésus-Christ i Si Nyanmien'n i aye.

Dyasin fe'n ti swran'n kwlaa bé lie

⁷ Anh fa amun wiéngu bu amun niaan ke Christ kusu fa amun buu i niaan'n sa, i so'n ba Nyanmien nyrunnyan.

⁸ N sé ke yiô: Jésus-Christ baa bé nga bé wla klen'n bé lika nianle, nan bé wun ke Nyanmien ti nanwlefue, ye oh yôh liké nga Nyanmien séé é nannan'm bé ke oh yôh man bé'n,

⁹ ye bé bo bé ti'a Juif'n bé kusu béh lah Nyanmien asé i aunnvue b'o wun bé'n ti. Afin bé klee ke: «I so'n ti, mh bôh o dunman bé nga bé ti'a Juif'n bé nyrun, Ye nh tôh dyué mh bôh fle o.»

¹⁰ Bé klee ékun ke: «Amun bo an ti'a Juif'n, anh wuka Nyanmien swran mun anh tô dyué.»

¹¹ Ye: «Amun kwlaa bo an ti'a Juif'n, anh manman é Min Nyanmien'n Ye man swran'n kwlaa bé yi i aye.»

¹² Ésaïe kusu séé ke: «Isaï i anunman'n oh bah, O wa dyaô sié bé nga bé ti'a Juif'n, I su ye béh fah bé wla'n guaa.»

¹³ Man Nyanmien bo é nyin ô i sin'n o man amun klun dyo, ye an di aladyé i su bo an lafi'n ti, nan Nyanmien Wawe'n i fanngan nun amun nyin tren i sin tititi.

Paul i dyunma'n nin i lika kole'n bé wun akunndan bule

¹⁴ N niaan mun, m bobo n lafi amun su kpa ke an ti klunufuéfue kpa, an wun sa'n kwlaa wle, ye an kwla tu amun wiéngu fo.

¹⁵ Kannze o ti so'n, ke n klee fluwa ye'n, n kan sa wié'm bé nde wéiin kléé amun nan amun wla kpen sa nga amuan dun mmua ti'n su. Yé dan bo Nyanmien yôô min

¹⁶ b'o sié min ke n di Christ-Jésus i dyunman bé nga bé ti'a Juif'n bé afien'n ti ye n kleli i soo. Ke mh bôh Nyanmien i dyasin fe'n, n yô i nyrun dyranfue nan nh fah bé nga bé ti'a Juif'n men, i Wawe'n man bé katyi i lie, o man i klun dyo bé wun.

¹⁷ Swran wunmuan bo min nin Christ-Jésus ya katyi'n ti, n kwla fa dyunman nga n di man Nyanmien'n, di n nuan.

¹⁸ N le'a nde fi n kanman, san nde nga Christ man n kan klé bé b'o man bé nyin ye Nyanmien'n,

¹⁹ ye sa kéklééklé, nin atre, nin abônuan sa bo Nyanmien Wawe'n i fanngan nun n yôli'n, i tye ye n kaan. Ke m bô Christ i dyasin fe'n kwlakwlakwla sa, Jérusalem bué lie'n su lélé fa dyuu Illyrie.

²⁰ Ke o kô yô nan man saman swran wié dyunman lie ng'o bôô i bô'n su'n, i so'n ti, n waan lika nga bé nian ti'a Christ nde le lé'n, le ye mh bôh i dyasin fe nion.

²¹ Afin bé klee ke: «Bé nga ba ke'en i nde a klé'a bé'n, béh wuinh, Ye bé nga bé nian ti'e i nde lé'n, béh tih béh wunh i wle.»

Paul i Rome kole i wun akunndan bule

²² Sa so'n ye o bô n kôkôwa titi ye man n nya'an n ti m ba'a amun wun lo nion.

²³ Sien'n man wié n dyunman ng'o ô akpasua nga'm bé su'n di. Ke m bu amun wun lo kole akunndan'n, wa di afue nnyon kun.

²⁴ I so'n ti, ke nh koh Espagne'n n klô ke mh bôh nun amun wun lo nan é yi awlalôe kan lé nnyon kun, nan an gua min atin klaan.

²⁵ Sannge lé nnyon nga lie'n, n su ko Jérusalem Nyanmien swran'm bo bé ô lo'n, bé ukale.

²⁶ Afin Macédoinefue'm bé nin Achaïefue'm ba bu akunndan ke béh yiyih sika nan bé fa kô man Nyanmien i swran bo bé ô Jérusalem lo'n bé nun nga bé ti yalefue'n.

²⁷ Bé bobo ye bé buu i akunndan ke bé yôo, ye se bé yôé so'n, o ti su, afin Juif mun ye man bé nga bé ti'a Juif'n bé tii Nyanmien nde'n ye bé faa suo. O man so bé kusu bé man Juif'm bé liké'n, ba bô'a aôsuan.

²⁸ Liké nga ti ye bé sunmaan min'n, se n wié i yô bo n wun ke ba fa sika so'n ba wla bé sa nun'n, nh kôh Espagne. Ke nh koh'n, mh bôh nun amun wun lo.

²⁹ N si ke, ke n dyu amun wun lo'n, amunh wunh ke Christ dyin n sin dan.

³⁰ [Aniaan mun,] nh sreh amun, anh nian é Min Jésus-Christ nin klôle nga Nyanmien Wawe'n man é klô é wun'n ti,

³¹ amun kusu amun nin min é dyran kéklé é sre Nyanmien ke o dé min bé nga bé lafi'a Nyanmien su Judée lo'n bé sa nun, ye liké nga n su fa kô man Nyanmien su Judée lo'n bé sa nun, ye liké nga n su fa kô man Nyanmien i swran mun Jérusalem lo'n, man bé so nun klaan.

³² Ye anh sre Nyanmien ékun, nan se o di su'n, ke n dyu amun wun lo'n, n klun dyo, ye n dé wunmien kan amun wun le.

³³ Man Nyanmien b'o man swran di aladyé'n, o nian amun kwlaa amun su. Mon o yô so!