Rɔmfuɛ Mun 14 - Nyanmien nde Ufle

Nanh kon o wiéngu wun nde

¹ Swran nga ke o lafii Christ su'n o nian wu'an sa ng'o yôo o ti su'n i wle'n, anh bui amun niaan, nanh amun nin i si akplôwa.

² Anh nian, swran wié ô le'n o lafi su ke o kwla di liké'n kwlaa, sannge swran ng'o nian wu'an sa ng'o yôo o ti su'n i wle'n, alie ngunmin ye o dio, o di'a nnen.

³ Nanh man swran ng'o di liké'n kwlaa'n, o yô swran ng'o diman'n i finfin, ye nga kusu b'o diman'n, nanh mon o kan swran ng'o di'n i nde, afin Nyanmien bobo a so i nun.

⁴ ?A ti o lie se bo a kon o niaan wié dyunman difue'n i wun ndeo? Se i nzuen ti kpa ô, se o ti'a kpa ô, nonh o ndeo, i min'n i ndeo. Oh yôh kpa, afin é Min'n kwla suen i bô mon o yô kpa.

⁵ Swran wié bu ke tyen'n wié ti kpa tra wié, sannge wié nyrun i kwlaa ti kun. I so'n ti, man swran kun wun liké ng'o yô'n i wle nan wa yô.

⁶ Swran ng'o sié tyen kun man é Min'n, é Min'n i akunndan b'o bu'n ti ye o sié i soo. Ye swran ng'o di liké'n kwlaa'n, é Min'n i akunndan b'o bu'n ti ye o dio, afin o la Nyanmien asé. Swran ng'o di'a liké ngba'n é Min'n i akunndan b'o bu'n ti ye o yôé soo, i kusu la Nyanmien asé.

⁷ Ôle nga é ô ye'n, é di'a é wun, o man se é wu'n, i ti'a é nde.

⁸ Se é wu ô, se é wuman ô, é Min'n i dunman nun ye é ô leo, o man se é wu ô, se é wuman ô, é ti é Min'n lie.

⁹ Ke o kô yô nan Christ wa yô bé nga bé wuli'n nin bé nga bé nyin ô su'n bé Min'n, o wuli, o tyennin.

¹⁰ ?O kpa'n, a fin o lie nin bo a kon o niaan i wun nde, annze a yô i finfion? Afin bé wa fa é kwlaa ko Nyanmien dyasu.

¹¹ Afin bé klee ke: «É Min Nyanmien sé ke: Ke n ti alulua'n, O man swran'n kwlaa bé wa kôtô m bô, O wa fité swran'n kwlaa bé nuan ke n ti Nyanmien.»

¹² O man é kwlaa é wa kan sa nga é yôô bé'n klé Nyanmien.

Nanh an yô sa ng'o satyi amun niaan'n

¹³ I so'n ti, nanh man é kan é wiéngu wun nde kun, sannge anh bu akunndan, nanh an yô sa ng'o satyi amun niaan b'o man o yô sa te'n.

¹⁴ Swran wunmuan bo min nin é Min Jésus é ti'n ti, n si wéiin kpa ke liké kwlaa nga bé ô le'n, bé wié fi ti'a liké te, sannge se swran kun bu liké kun ke o ti'a kpa'n, wuun o ti'a kpa i nyrun.

¹⁵ Se liké nga a si ke sa a dio a sanngan o niaan i akunndan, nan a di'n, wuun wa yô'e ke swran ng'o klô swran'n o yô'n sa. Nanh man liké nga a di'n satyi swran nga ti ye Christ wuli'n.

¹⁶ Liké nga amun nyrun o ti kpa'n, nanh man amun dunman satyi su.

¹⁷ Nanh ke liké bo swran di'n nin nzan bo bé non'n ye o klé ke Nyanmien sié béo, sannge i Wawe'n b'o man swran katyi swran kpa, b'o man bé di aladyé, bo bé klun dyo'n ye o klé ke o sié béo.

¹⁸ Swran ng'o di Christ i dyunman'n ke nga sa'n, Nyanmien klun dyo i wun, ye swran'm bé bô i dunman.

¹⁹ I so'n ti, man é yô sa ng'o dyo é wiéngu klun b'o man é kwlaa éh yôh kpa'n.

²⁰ Nanh man é satyi liké nga Nyanmien yôli'n liké bo é di'n ti. Nanwle, liké kwlaa nga bé di'n ti kpa, sannge se swran kun di liké nan o satyi i niaan'n, wuun wa yô'a sa kpa.

²¹ Liké nga se an yôo o ti kpa'n ye: Nanh an yô liké fi bo se amun yôo o satyi amun niaan, nnen dile ô, nzan nonle ô.

²² O sa wle bo a wuin so'n, mon o tran a nin Nyanmien amun afien. Swran ng'o wun liké ng'o yô'n i wle b'o wun ke se o yôo i klun su timen'n, i lie su ti yé!

²³ Sannge swran ng'o wu'an liké ng'o di'n i wle kpa se o ti kpa ô, se o ti'a kpa ô, nan o di'n, Nyanmien wa sé ke wa di fo, yele ke liké ng'o yô'n, o wu'en i wle. Afin liké kwlaa nga bé yô bo bé wu'en i wle ke o ti kpa nan ba yô'n, o ti sa te.