Rɔmfuɛ Mun 11 - Nyanmien nde Ufle

Nyanmien a yi'a Israëlfue'm bé blô sékéséké

¹ O man n sé ke yiô: ?Nyanmien yii i swran'm bé blô? Tyetye! Afin n kusu n ti Israëlfue, n fin Abraham ôsu'n nun, Benjamin akpasua su.

² Nyanmien swran'm b'o dun mmua sii bé'n, wa yi'a bé blô. ?Nyanmien Nde nga bé klee ke, Élie sanmaan Israëlfue mun Nyanmien dyasu'n, an si'a nde so'n? Bé klee nde so'n ke:

³ «É Min Nyanmien, bé kuun o nuan idyofue mun, ye bé bubuu o sowle mun, o ka n kunngba, ye bé kunnde n kunwle.»

⁴ ?Sannge Nyanmien séé i se? O sé i ke: «N le swran akpi-nsô bo ba kôtô'a Baal (*f37*) bô.»

⁵ I kunngba'n, ke é ô ve'n kusu, bé ônga kaan kaa le bo Nyanmien faa bé i klun-ufué'n ti.

⁶ Nanh sa nga bé yôli'n ti ye o faa bé soo, sannge i klun-ufué'n ti ye o yôé soo. Afin se liké nga bé yô'n ti ye o fa bé'n, wuun nenh i klun-ufué'n tio.

^7-8 Se o ti so'n, éh séh ke, liké nga Israëlfue'm bé kunnde'n, ba nyenmen, san bé kaan nga Nyanmien faa bé'n, bé ngunmin ye bé nyennin io. Sannge nde nga bé klee ke bé nga'm bé wa yô swran bo bé wu'an sa wle'n, ye wa kpen su ye'n. Bé klee ke: «Nyanmien man bé katyii ke swran bo bé akunndan nu'an le sa, Ye o man bé wu'an asé, Bé ti'a sa Lélé fa dyu nde.»

⁹ Ye David sé ke: «Man bé tyen dile'n yô ke aya sa, Man o yô ke zo sa, bé to nun, nan bé nyan bé sa te'n i akatua!

¹⁰ Man bé nyin su dun bé, nanh man bé wun asé kun. Man bé komiansin klu tititi.»

Bé bo bé ti'a Juif'n bé ti nyanle

¹¹ O man n sé ke yiô: ?Ke bé to nun so'n, bé ka le mlonmlon? O ti'a so mlonmlon! Sannge ke bé yôli sa te'n, o man bé bo bé ti'a Juif'n ba nyan bé ti nan Juif'm bé nyin tyi bé.

¹² Se Juif'm bé sa te yôle'n o yô men nunfue'm bé yé dan'n, ye se bé nvlé'n i bôle'n o yô bé bo bé ti'a Juif'n bé yé'n, wuun ke bé kô nyan bé ti mlonmlon'n, oh yôh wié'm bé yé kpe blu!

¹³ Amun bo amun ôsu'n ti'a Juif'n, amun ye n kan nde nga klé amuon. Nyanmien sunmaan min bé bo bé ti'a Juif'n bé sin, ye n fa dyunman so'n di n nuan.

¹⁴ N yô i so nan n nvléfue'm bé fa bé nyin tyi amun, nan bé nun wié'm bé nyan bé ti.

¹⁵ ?Afin se bé asé siéle kan bo Nyanmien siéé bé'n o man men nunfue'm bé nin Nyanmien bé afien a se'n, ke o kô fa bé ékun'n, oh yôh se? O man bé nga bé wuli'n béh nyanh nguan!

¹⁶ Se kpaun bo bé ton'n bé dun mmua kpe Nyanmien lie'n (*f38*), wuun i wunmuan'n kwlaa ti i lie, ye se waka'n i bô'n ti Nyanmien lie'n, wuun i sama'n ti i lie.

¹⁷ Israël'm bé ti ke olive (*f39*) bo bé tali sa, bo bé kpekpe i sama'm bé wié. Amun bo an ti'a Juif'n an ti ke blô olive sa, bé kpe amun ta klo lie nga bé kpeli'n i bô'n su. O man nzué ng'o fin i bô'n nun'n o wlu amun nun wié, ye man an yô kpaa.

¹⁸ O man se o ti so'n, nanh an bu ke an ti kpa tra bé nga bé kpe bé guali'n. ?Nzu ti ye an tu amun wuon? Afin nanh amun ye an ti waka'n i bô nion.

¹⁹ Wiénuon swran wié wa sé ke: Bé kpekpee waka sama so'n nan béh fah min ta bé ôsu'n nun.

²⁰ O ti so. Nyanmien bo bé lafi'e i su kpa'n ti ye bé kpekpee béo, o kusu, i su bo a lafi'n ti ye man a ô leo. Nanh tu o wun, sannge nion o wun kpa,

²¹ afin se Nyanmien a yatyi'a Juif'm bo bé ti ke olive i sama kpa sa'n bé le'n, o su yatyi'a Juif'm bo bé ti ke olive i sama kpa sa'n bé le'n, o su yatyi'a o le kusu.

²² I so'n ti, nian, Nyanmien ti kpa, ye kusu nde ng'o kan'n o le'a katyiwle. Ke a nien i bué kun'n a wun ke nde ng'o kan klé bé nga ba nia'an bé lika'n su kpa'n o le'a katyiwle, ye ke a nien i bué kun ékun'n a wun ke, se a yô ke o yô o kpa'n, oh yôh o kpa. Se a yô'e i so'n, oh kpeh o yi.

²³ Ye Juif'm bé kusu se bé katyi bé lafi Nyanmien su'n, oh fah bé ta bé ôsu'n nun, afin Nyanmien kwle i so yô.

²⁴ O bo a ti'a Juif'n, a ti ke blô olive sama sa, bé kpe o taa klo lie'n, o ti sa bo bé yôman. ?Se bé yô o so'n, wuun Juif'm bo bé ti klo olive kpa'n, nan bé lie sion?

Israëlfue'm bé Nyanmien sin sale

²⁵ Aniaan mun, ke o kô yô nan amuan bu'a amun wun ngwlelefue'n, n klô ke nh kanh sa ng'o ô ye'n bo Nyanmien yi'e nglô'n klé amun. Israël'm bé bué ba yô swran bo bé wu'an sa wle, béh kah le so lélé san bé nga bé ti'a Juif bo béh nyanh bé ti'n bé nuan'n wa dyu.

²⁶ Ke o kô yô so'n, nde nga bé klelii ke Israël'm bé kwlaa béh nyanh bé ti'n, oh kpenh su. Afin bé klee ke: «Bé ti Défue'n finh Sion (*f14*), O man Jacob anunman'm bo bé srô'a Nyanmien'n béh srôéh.

²⁷ Nian sa nga n sé bé ke nh yôh man bé Tyen nga nh yatyih sa nga bé yô min'n tye bé'n ye.»

²⁸ Ke é nien i bué kun'n, é wun ke dyasin fe'n bo Juif'm ba fa'a su'n ti Nyanmien nin bé buli. I so'n yôô amun môaé sa. Sannge ke é nien i bué kun ékun bo é wun wafa nga Nyanmien fa swran'n, é wun ke bé nannan'm bé ti, bé ti Nyanmien i awlen su swran.

²⁹ Afin ke Nyanmien fa liké man swran'n, ye ke o fle swran'n, o kôkô'e i sin.

³⁰ Laa amun nyin yi'a Nyanmien a wun amun aunnvue.

³¹ I kunngba'n, aunnvue nga Nyanmien wuun amun'n ti, Juif'm bé yô nyin kéklé sien'n nan Nyanmien wun bé kusu bé aunnvue wié.

³² Ke o kô yô nan Nyanmien a wun swran'n kwlaa bé aunnvue'n, o bu bé kwlaa nyin kékléfue.

³³ Iii, Nyanmien ti anyanbéunfue ô! O si ngwlele ô! O si sa'n kwlakwla kpa! ?Wan ye o si i klun lo akunndaan? ?Wan ye o wun sa ng'o yô bé'n bé wleo? Afin,

³⁴ «?Wan ye o si akunndan nga é Min Nyanmien'n buli nion? ?Wan ye o klélii ngwleleo?

³⁵ ?Wan ye o dun mmua maan Nyanmien liké ti ye o men i wiéo?»

³⁶ Liké kwlaa ng'o ô le'n o fiin, i ye man bé ô leo, ye i dunman nun ye bé ô leo. Man é yi i aye tititi. Mon o yô so!