Rɔmfuɛ Mun 1 - Nyanmien nde Ufle

Paul kle fluwa nga kô maan Rome lo Christfue mun

¹ M Paul, n ti Christ-Jésus i swran. Nyanmien flee min ke o sunman min. O yii min ke m bô i dyasin fe'n

² b'o man i nuan idyofue'm bé ken i nde laa Nyanmien Nde nga bé kleli'n nun'n.

³ Dyasin fe so'n ti i Wa'n i nde. Ke o katyili swran'n, bé wui David ôsu'n nun,

⁴ ye i tyenle bo Nyanmien Wawe'n tyenniin'n o ti sa kéklé b'o yôli, o man bé si ke o ti i Wa sakpa. O ti é Min Jésus-Christ.

⁵ I ti ye Nyanmien bu n swraan, o sunmaan min ke n ken i nde'n klé nvlénvlé'n kwlaa i bobo dunmaan nun, nan bé lafi su ye bé nyin yii.

⁶ Amun bo Nyanmien flee amun ke an yô Jésus-Christ lie'n, an wô nun wié.

⁷ Nh fah fluwa nga ble amun bo an wô Rome lo bo Nyanmien klô amun b'o fle amun ke an katyi i lie mlonmlon'n. Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

Paul wla b'o lô Rome lo Christfue mun'n

⁸ Jésus-Christ ti n la min Nyanmien'n i asé amun nde bo n tili'n ti, afin bé kan amun Nyanmien sulafile nde'n men wunmuan'n nun.

⁹ Nyanmien bo min akunndan'n kwlaa ô i sule'n su'n, bo m bô i Wa'n i dyasin fe'n o si ke n kan amun nde kléé titi.

¹⁰ N sre i tyen kwlaa ke o man min atin klaan man n wo amun wun lo.

¹¹ N klô ke nh wunh amun wun nan Nyanmien Wawe'n i liké nga n nyenniin'n, an nyan wié, nan an dyran kéklé.

¹² Se n dyu amun wun lo bo é wla é wun fanngan Nyanmien su bo é lafi'n ti'n, oh yôh n fe dan.

¹³ Aniaan mun, m bu amun wun lo kole'n i akunndan tititi, ke mh bah nan nh nyanh n dyunman'n i nuan liké amun wun lo ke n nyen nvlé nga'm bé nun'n sa, sannge lélé nde n nian nya'an n ti.

¹⁴ Swran kwlaa nga bé nyin a ti ô, bé nga bé nyin nian timan ô, bé nga bé si fluwa ô, bé nga bé si'a fluwa ô, bé dyasin fe bô kléle kale ô n su.

¹⁵ I so'n ti, n waan m ma kan dyasin fe'n klé amun Romefue mun amun kusu wié.

Dyasin fe'n bo Nyanmien Kpli fa dé swran mun'n

¹⁶ Dyasin fe'n ti nyannzuen ku'an min, afin i ye Nyanmien Kpli fa dé swran kwlaa nga bé lafi i su muon, Juif mun ye bé ti kliklio, i sin bé nga mun.

¹⁷ Dyasin fe so'n ye o klé é wafa nga Nyanmien fa bu swran swran kpa nion, i so'n fin swran i Nyanmien su b'o lafi'n, ye kusu o man swran lafi Nyanmien su kpa, afin bé klee ke: «Swran ng'o lafi Nyanmien su b'o man o katyi swran kpa'n, oh nyanh nguan.»

Swran'n kwlaa bé yô sa te

¹⁸ Srôle bo swran srô'a Nyanmien'n nin sa tete'n kwlaa b'o yô'n ti, Nyanmien klé é ke i ya'n wa dyasô. Bé sa tete yôle so'n ti, o man swran'm bé wu'an Nyanmien nde'n i nanwle.

¹⁹ Afin bé wun liké nga b'o man swran si Nyanmien'n i wle. Nyanmien bobo yi bé nglô wéiin kléé bé.

²⁰ Swran nyinma wu'an Nyanmien'n, sannge ke o fin tyen ng'o yii men'n, liké kwlaa ng'o yô bé bo bé wun bé'n, o man bé wun i wle wéiin ke Nyanmien ô le, ye o kwla sa'n kwlaa yô. I so'n ti, bé le'a nde fi.

²¹ Afin bé si ke o ti Nyanmien, sannge o nin i so'n ngba bé yi'e i aye, bé le'e i asé. Bé akunndan kwlaa nga bé bu'n o yôô ngben, ye ngwlele bo bé simen'n ti, ba wu'an sa fi wle kun.

²² Bé bu bé wun ngwlelefue, o man bé katyii sinnglinfue.

²³ Bé yatyi Anannganman Nyanmien Kpli'n le, bé yô ninngé mun, bé taka bé, bé so bé, swran ô, nnen ô, anunman ô, wuô ô.

²⁴ I so'n ti, Nyanmien yii i sa bé su, o man bé yô sa tete kwlaa nga bé klô ke béh yôh'n, lélé o man bé yô bé bobo bé wun finfin.

²⁵ Bé fa atô'n fa katyi Nyanmien nde b'o ti nanwle'n, bé fa bé wun man ninngé bo Nyanmien yii bé'n, bé so bé, bé yatyi i bobo le. I ye bé bô i dunman tititi nion. Mon o yô so!

²⁶ I so'n ti, Nyanmien yii i sa bé su, o man bé kônvi so nyannzuen sa'm bé yôle, lélé o man bé mmla'm bé yatyi bian nna nga Nyanmien siéé i su'n, bé yô sa ng'o ti'e i su mlonmlon'n.

²⁷ Yasua'm bé kusu bé yatyi bla nna nga Nyanmien siéé i su'n, bé wun yrayra bé bé wiéngu yasua'm bé kunndele'n nun, bé yô nyannzuen sa mun, o man bé nyan bé sa tete so'm bo bé yô'n i nuan akatua.

²⁸ Ke bé nyin kpaa Nyanmien su'n, i kusu yii i sa bé su o man akunndan tete baa bé ti nun, o man bé yô sa b'o ti'e i su'n.

²⁹ Sa tete yôle'n kwlaa kun bé kpô, bé ti swran te, bé kônvi ti kpli, bé klun yô wi, bé nyin tyi swran nin liké, bé kun swran, bé klô utré, bé ti gble, bé bu swran wun akunndan te, bé bla,

³⁰ bé kan swran wun nde, bé kpo Nyanmien, bé kpe nzôwa, bé tu bé wun, bé di bé nuan, bé kpe sa tete ufle'm bé ba, bé nyin yi'a bé si nin bé nin mun,

³¹ bé wu'an sa wle, sa nga bé sé ke bé yô'n, bé yôman, bé klô'a bé ôsufue mun bobo, swran yô'a bé annvo.

³² Bé si ke bé klee Nyanmien mmla'n nun ke swran ng'o yô i so sa'n, o nin kunle fata, sannge bé yô, ye ke swran wié'm bé yô sa kunngba so'n, o yô bé fe.