Filemɔn 1 - Nyanmien nde Ufle

Paul kle fluwa nga kô maan Philémon

¹ M Paul bo Christ-Jésus ti n wô bisua'n nun'n, min nin é niaan Timothée

² éh kleh fluwa nga ble o Philémon bo a ti é swran kpa nin é wiéngu dyunman difue'n, nin é niaan bla Appia, nin Archippe bo é nin i é fe'n, nin asonunfue nga bé yia o awlô lo'n.

³ Man é Si Nyanmien nin é Min Jésus-Christ bé man an nyan yé, ye man amun wun dyo amun fouun!

Philémon klô swran nin Jésus

⁴ O ti, n la n Nyanmien'n i asé titi, ye n sre i titi ke o nion o su,

⁵ afin n ti klôle bo a fa klô é Min Jésus nin Nyanmien swran'n kwlaa'n nin sulafile nga a fa lafi bé kwlaa bé su'n i nde.

⁶ Nh sreh Nyanmien ke anuanse bo Christ bo é lafii su'n ti é di'n, o man a wun liké kpakpa kwlaa ng'o ti é lie swran wunmuan bo é nin Christ ya katyi'n ti'n i wle kpa wéiin.

⁷ N niaan bian, klôle nga a fa klô bé'n ti, o man n wla gua asé, n klun dyo dan, afin w'o man Nyanmien swran'm bé awlen to nzué nun.

Paul kpataa Onésime ti

⁸ I so'n ti, Christ b'o dyin n sin'n ti, n si ke n kwla sé ke a yô sa ng'o ti su'n

⁹ sannge nga lie'n, o fata ke n sre o klôle bo a klô bé'n ti. M Paul bo man yô kpenngben bo Christ-Jésus ti sien'n n wô bisua'n nun'n,

¹⁰ n wa Onésime bo n katyii i si bisua'n nun wa'n ti, yatyi.

¹¹ Laa wa yô'a sa kpa a monmon, sannge sien'n o wa yô sa kpa man min nin o.

¹² Sien'n i b'o ti n sa nin n dya'n n fe ble o.

¹³ Ke n wô bisua'n nun wa dyasin fe'n ti'n, n waan, o ka min wun wa, o dyran o dya nun nian n lika.

¹⁴ Sannge liké nga a kpli'an su ke n yô'n, n klô'a ke n yô, nan yé nga a yô'n, w'a yô'e mainle su, sannge w'a yôé o klun-ufué su'n ti.

¹⁵ Wiénuon ke o yô nan wa ka o sa nun mlonmlon'n ti ye man o wanndii o lé nnyon kun nion.

¹⁶ Afin sien'n, nanh ke o kanga kunngba ye o tio, sannge i kpa tra kanga, o ti é niaan bo é klôé kpa. O ti n swran kpa, ye o lie'n, o wa yô o swran kpa tra min, afin o ti o swran, ye kusu amun Min'n wa yô kun.

¹⁷ I so'n ti, se a bu n ke o wiéngu sa'n, so i nun ke a fa so min nun'n sa.

¹⁸ Se o yôô o sa wié'n, annze se o kale wié ô i su'n, a kô dé n su.

¹⁹ Nian, n sa nuan ye: M bobo m Paul m ma tannin kale so'n man o. O nin i so'n ngba, n kusu n su sé'a o ke n ti ye man a nyan nguaan.

²⁰ N niaan bian, swran wunmuan bo a nin é Min'n ti'n ti, nh sreh o ke a yô n yé, man n wla gua asé Christ lie bo é ti'n ti.

²¹ Fluwa nga nh kleh m ble o ye'n, n si ke swran bo a bu min'n ti, liké nga n sé o ke a yô'n, ah yôh tra su.

²² Ke ah yôh so'n, yô sua ba kun kpa fa sié min, afin Nyanmien bo an sre i ke o dyran n sin man an wun min ékun'n ti, n lafi su ke mh bah.

I liké yôle

²³ Épaphras b'o ti n wiéngu bisuafue Christ ti'n, oh yôh o liké.

²⁴ Marc, nin Aristarque, nin Démas, nin Luc bo bé ti n wiéngu dyunman difue'n, bé kusu béh yôh o liké.

²⁵ Man é Min Jésus-Christ aklunyéfue'n nin amun tran!