Matthieu 9 - Nyanmien nde Ufle

Jésus yôô bubuwafue kun dyuédyué

¹ Jésus fu alié'n nun o kpee fete'n, o se i sin i klo lo.

² Bé sua bubuwafue kun te nun blelii. Ke Jésus wuun ke bé lafi i su'n, o séé bubuwafue'n ke: N wa, guo o wla asé, sa nga a yôli Nyanmien'n wa yatyi a tye o.

³ Ke o séé i so'n, mmla kléfue wié'm bé bu i akunndan sé ke: Bian nga satyi Nyanmien dunman.

⁴ Jésus wuun bé akunndan'n, nan wa sé ke: ?Nzu ti ye amun akunndan'n ti te soo?

⁵ ?Ke bé sé ke, Nyanmien a yatyi sa nga a yôlii'n wa tye o'n, annze, dyaô nanti ko'n, i nnyon'n ônin ye i kanle ti popo tra kuon?

⁶ Anh dyran man n klé amun wéiin ke m bo n katyii Swran'n n le atin asie'n su wa bo n yatyi sa nga bé yô Nyanmien'n tye bé. O sé bubuwafue'n ke: Dyaô fo o te'n ko wo awlô.

⁷ O dyaôli, nan wa o i awlô.

⁸ Ke swran'm bé wuun i so'n, sre kuun bé, bé manman Nyanmien b'o tin swran mun ke nga sa'n.

Matthieu i flele

⁹ Ke Jésus fin le oo i nyrun lo kan'n, o wuun bian kun bé flee Matthieu, o dé guabô sika, o ti i dyunman diwle le. Jésus séé i ke: Bla'a su n su. Ye o dyaô wa suu i suo.

¹⁰ Ke Jésus nin i sonnzonfue'm bé ô awlô lo bé di liké'n, guabô sika défue nin sa tete yôfue kpanngban bé nin i ye bé di liké nion.

¹¹ Ke Pharisifue'm (*f4*) bé wuun i so'n, bé usee i sonnzonfue'm bé ke: ?Nzu ti ye amun si nin guabô sika défue nin sa tete yôfue mun di likéo?

¹² Jésus tii nde so'n, nan wa sé bé ke: Nanh swran ng'o ti dyuédyué ye o ko ayréfue sion, sannge tukpatyefue ye o koo.

¹³ Anh wo kô bu nde nga bé kan sé ke: «Bé wun aunnvue sile'n yô n fe tra n sole'n» i akunndan, amunh wunh i wle, afin man ba'a nanwlefue'm bé flele, sannge sa tete yôfue mun ye m baa bé fleleo.

Sre nun kpele'n i su sa usale

¹⁴ Ye Jean sonnzonfue'm bé baa Jésus wun le bé usee i ke: ?O yô se ti ye é nin Pharisifue mun é kpe sre nun, bo o lie'm bé kpe'a wiéo?

¹⁵ Jésus sé bé ke: ?Se yasua kun su fa atonvle'n b'o nin i dyanvue'm b'o yiaa bé'n bé te ô le'n, bé wla bô? Lé kun bé wa dé yasua so'n bé sa nun, ble so'n nun ye béh kpeh sre nuon.

¹⁶ Swran fi fa'a tannin sin ufle bo bé nian kpu'e lé'n ta'a trale nvuen nun, afin se bé fa ta nun so'n, oh tyuentyuenh tannin nvuenfue'n oh titih, ye i titile'n oh yôh te tra laa'n.

¹⁷ Bé fa'a du vin lofle kusu gua'a kplô kôtôkun nvuen nun, se bé fa gua nun so'n, ke oh kétéh'n, kôtôkun'n kpukéh, oh satyih, ye du vin'n guah. Sannge bé fa du vin lofle'n gue kplô kôtôkun b'o ti ufle'n nun ye i nnyon'n ka leo.

Jaïrus wa bla'n i tyenle. Bla'n b'o kaan Jésus trale'n b'o yôô dyuédyué'n

¹⁸ Ke Jésus nuan te ô nde'n su'n, Nyanmien sua sukpen kun bee i wun le, o kôtôô i bô o sé ke: N wa bla'n wa wu ityra'n, sannge bla'a fo o sa fue i su ye oh tyenh.

¹⁹ Jésus dyaôli, nan o nin i sonnzonfue mun ba su i su.

²⁰ Ke béh koh'n bla kun bo mannza tennden too i wun wa di afue blu-nin-nnyon'n, o baa Jésus sin le, o ken i trale'n i nuan ndyole'n.

²¹ Afin bla so'n sé ke: Se n kwla ken i trale'n bo tye'n, nh yôh dyuédyué.

²² Jésus kpee i nyin, ke o wunniin'n, o sé ke: N wa bla, guo o wla asé, ke a lafi n su ke n kwla yô o dyuédyué'n ti, w'a yô dyuédyué. Nan bla so'n wa yô dyuédyué i ôsu kunngba'n nun.

²³ Ke Jésus dyuu Nyanmien sua sukpen'n i awlô lo b'o wuun kété bôfue nin swran bo bé bôfue nin swran bo bé bô auyé'n, o sé ke:

²⁴ Anh fité, ba'n wa wuman, lafile ye o su lafio. Nan ba srii.

²⁵ Ke o kaan swran'm bé bô'n, o wluu sua lo, o so talua kan'n i sa, nan wa dyaô.

²⁶ Nde so'n truu men so'n i akpasua'n kwlaa su.

Anyansifue nnyon bé asé wunle

²⁷ Ke Jésus koh'n, anyansifue nnyon bé su i su bé kpan sé ke: David Anunman si é aunnvue yô é yé!

²⁸ Ke Jésus dyuu awlô lo'n, anyansifue'm bé wunngéé i wun le, nan wa usa bé ke: ?An lafi su ke n kwla yô? Bé séé i ke: Een, a kwla yô.

²⁹ Ye o fe i sa fue bé nyinma'n su, o sé bé ke: Mon o yô ke an lafi n su dyu'n sa.

³⁰ Ye bé wuun aséo. Jésus wlaa bé su nun kpa ke, nanh man bé kan nde so'n klé swran fi.

³¹ Sannge ke bé fitéé tye'n, bé tru Jésus dunman'n men wunmuan so'n nun.

Bôbôfue'n i dyuédyué yôle

³² Ke béh koh'n, swran wié'm bé fa bôbôfue kun bo asie usu satyillii'n blelii.

³³ O fuaan asie usu so'n, nan bôbô'n wa idyo. Ke swran'm bé nuan bô bé wun'n, bé sé ke: É nian wu'an abônuan sa ke nga sa Israël men'n nun lé.

³⁴ Sannge Pharisifue'm (*f4*) bé waan: Mmusu'm bé wléngbi'n i dunman nun ye o fuan asie usu muon.

Jésus sii swran'm bé aunnvue

³⁵ Jésus wlanwlan klo dandan nin klo kanngan'm bé su, o klé bé liké bé Nyanmien sua'm bé nun, o kan Nyanmien siéle'n i dyasin fe'n klé bé, ye o wié bé tukpatye nin bé wunnen ya'n kwlaa.

³⁶ Ke Jésus wuun swran mun'n bé yôé annvo, afin bé ti afefue, ba bô dyé ke bua bo bé le'a sunianfue sa.

³⁷ Ye o séé i sonnzonfue'm bé ke: Fié'n wa yô yé, sannge i su dyunman difue'm ba sonman.

³⁸ I so'n ti, anh sé fié ifue'n mon o fa swran ékun man bé kô di i dyunman'n.