Matthieu 8 - Nyanmien nde Ufle

Jésus yôô kôkôwéfue kun dyuédyué

¹ Ke Jésus fin ôka'n su lo dyrali'n, swran kpanngban kpa bé suu i su.

² Kôkôwéfue kun wa kôtôô i bô, o sre i ke: Ndya yatyi, yô man n kôkôwé'n wié wéiin.

³ Jésus tinnge i sa'n kenniin, o sé i ke: Man ti, mon o kôkôwé'n wié wéiin. Kpekuun kôkôwé'n wa wié i wun.

⁴ Ye Jésus sé i ke: Man sa so'n tran o klun, nanh kan klé swran fi, sannge fo o wun kô klé Nyanmien nyrun dyranfue'n, nan fo o wun asô bôle liké nga Moïse kléli'n fa man, man bé wun ke w'a yô dyuédyué

Jésus yôô sôndya ya sukpen'n i gbanflen'n i dyuédyué

⁵ Ke Jésus dyuu Capernaüm b'oh wluh klo nun'n, sôndya ya sukpen kun bee i wun le o kan klé i aunnvue su ke:

⁶ Ndya, n gbanflen'n wa bubu o la awlô lo, i wunnen'n yô i ya dan kpa.

⁷ Jésus sé i ke: É wo, nh kôh yô i dyuédyué.

⁸ Sôndya ya sukpen'n sé ke: Nannan, o ti'a bo a tu o dya ko min awlô loo, sannge kan nde kpole kunngba tye, ye n gbanflen'n yôh dyuédyué.

⁹ Afin m bo swran'm bé sié min'n, n kusu n sié sôndya mun, se n sé kun ke o o'n, o ko, ye se n sé kun ke o bla'n o ba. Se n sé n gbanflen'n ke o yô liké wié'n, o yô.

¹⁰ Ke Jésus tii nde so'n, o bôô i nuan dan kpa, ye o sé bé nga bé su i su so'n bé ke: Nanwle, Israël nvlé'n nun bobo man wu'an swran fi b'o lafi n su dan ke nga saa.

¹¹ Nh kanh klé amun ke, swran sunman bé wa fin wia afilie nin wia atolie béh bah, bé nin Abraham, nin Isaac, nin Jacob béh tranh table'n su Nyanmien men'n nun.

¹² Sannge bé wa fa bé nga bé ti diéwa men so'n nun'n yi bé guasu lo aôsin'n nun, kan béh sunh, béh dih bé dyé lo'n.

¹³ I sin Jésus séé sôndya ya sukpen'n ke: Ko mon o yô ke a lafi n su dyu'n sa. Ye i ôsu kunngba'n nun i gbanflen'n yôô dyuédyuéo.

Jésus yôô Pierre sia bla'n i dyuédyué

¹⁴ I sin Jésus wluu Pierre awlô lo, o wuun ke ayre a gue i sia bla'n wun, wa la.

¹⁵ O uti i sa'n, ye ayre'n tuu i wuon. O dyaôli, nan wa kunnde liké a men.

Jésus yôô tukpatyefue kpanngban bé dyuédyué

¹⁶ Ke alie dyoli'n, bé fa swran sunman bo asie usu a satyi bé'n blee Jésus. Ke o idyoli asie usu so mun'n, bé dyaô swran'm bé su, ye o yôô tukpatyefue'n kwlaa bé dyuédyué.

¹⁷ I so'n nun nde nga Nyanmien nuan idyofue Ésaïe kenniin ke: «I bobo faa é wunnen ya'n, ye o fa é tukpatye'n suali'n,» o kpeen su.

Bé nga bé klô ke béh suh Jésus su'n

¹⁸ Ke Jésus wuun swran kpanngban bo bé sin yie le'n, o sé ke: Man é sin nzué'n bué kun lo.

¹⁹ Mmla kléfue kun bee i wun le, o sé i ke: Ndya, lika kwlaa bo a ko'n min nin wo éh koh.

²⁰ Jésus séé i ke: Sôlôngbi'm bé le kunman la nun, ye anunman'm bo bé tu sin'n bé le lawle, sannge m bo n katyii Swran'n n le'a lika bo n la nun dé wunmien bo kaan.

²¹ I sonnzonfue'm bé nun kun kusu sé i ke: Ndya, man min atin man n kô sié n si ka.

²² Sannge Jésus sé ke: Su n su. Yatyi bé bo bé wu'n man bé sié bé swran mun.

Jésus kpeli aunngban dan'n

²³ Jésus fuu alié'n nun, nan i sonnzonfue'm ba fu i sin.

²⁴ Kpekuun aunngban dan kpa kpee fete'n su, o man nzué'n bô tra alié'n su, sannge o su lafi.

²⁵ I sonnzonfue'm bé wunngéé i wun le bé tinngélii, bé sé i ke: Nannan, dé é ô é su wu ô!

²⁶ O usaa bé ke: ?Nzu ti ye sre kun amuon? ?An lafi'a n su tio? O dyaôli, o idyoli aunngban'n nin nzué'n, nan ba dyran diin.

²⁷ Bé nuan bôô bé wun, nan ba usa bé wiéngu ke: ?Nzu swran yele nga bo aunngban'n nin nzué'n nin nzué'n bobo bé srôé soo?

Jésus yôô swran bo asie usu'm bé satyili bé'n bé dyuédyué

²⁸ Ke o dyuu nzué'n i bué kun Gadarafue'm bé men'n nun'n, swran nnyon bo asie usu satyii bé'n bé fin ndia su sua'm bé wun lo bé bee i atin kpale. Bé liké yôle yô ya kpa, o man swran fi kwla si'an le.

²⁹ Bé kpan use i ke: ?Nyanmien Wa Yasua, nzu nde ye o ô é nin wo yé afieon? ?A baa ke a wa dun mmua klé é nyrennen, nan é nyrennen kléle ble'n wa dyu?

³⁰ Kokoti fi dan kpa kun bé ô mmua lo bé su didi.

³¹ Asie usu'm bé sree Jésus kpa ke: Se a kan é bô'n man é atin man é kô wlu kokoti fa nga'm bé nun.

³² O séé bé ke: Anh wo! Nan ba dyaô bé su ba kô wlu kokoti so'm bé nun. Ye kokoti akpasua wunmuan so'n bé wanndi trôô fete'n i tyéndyé'n b'o séli pia'n, nan ba gua nzué'n nun ba wu.

³³ Bé nga bé kankan bé'n bé wanndi oo klo lo bé bô kaan sa kwlaa ng'o yôô kokoti mun'n o nin sa ng'o yôô swran bo asie usu'm bé satyii bé'n kléé bé.

³⁴ I so'n ti, klofue'n kwlaa bé fité oo Jésus atin kpale. Ke bé nin i yiali'n, bé sree kpa ke o dyaô bé men'n nun.