Matthieu 7 - Nyanmien nde Ufle

Swran wun nde kanle

¹ Nanh an bu swran fo man Nyanmien bu amun fo. Fo kunngba nga an fa bu swran'n, ye Nyanmien wa fa bu amuon,

² ye liké kwlaa nga an sé ke, se swran yôo o ti kpa'n, i kunngba so'n ye Nyanmien wa sé amun ke an yôo.

³ ?O yô se ye a wun wla'n b'o ô o niaan i nyin su'n sannge a wu'an dyanvle'n b'o ô o bobo o nyinma su nion?

⁴ ?O yô se ye a sé o niaan ke: Dyran man n yi o nyin su wla'n, sannge dyanvle ô o bobo o nyin su nion?

⁵ Dunman klôfue, yi dyanvle'n b'o ô o nyin su'n ka, nan a wun asé a yi o niaan'n i nyin su wla'n.

⁶ Nanh an fa ninngé ng'o ti Nyanmien lie'n man alua mun, ye nanh an fa amun nennglenman'n gua kokoti'm bé bô, man bé tiatia bé su, bé kpe bé nyin amun su, bé to amun su.

Anh sre, anh kunnde, anh bôbô anuan

⁷ Anh sre, béh fah man amun, anh kunnde, amunh nyenh, anh bôbô, béh tikéh amun anuan.

⁸ Afin swran kwlaa ng'o sre liké'n, bé men, swran ng'o kunnde liké'n, o nyen, ye swran ng'o bôbô anuan'n, bé tiké.

⁹ ?Amun nun ônin ye se i wa sé i ke o men i kpaun'n, o fa yebue men io?

¹⁰ ?Annze se o sé i ke o men i kpatra'n o fa wuô men io?

¹¹ Se amun bo an ti te'n, an fa liké kpa tye amun mma mun'n, wuun amun Si b'o ô nyanmien su lo'n i kusu oh fah liké kpa man bé nga bé sre i'n kpe blu.

¹² Liké kwlaa nga an klô ke swran yô man amun'n, anh yô i kunngba so'n man bé, i ye o ti Moïse mmla nin Nyanmien nuan idyofue'm bé nde nion.

Anuan fii'n

¹³ Anh sin anuan fii'n nun, afin se bé sin anuan tetre'n nun'n, bé kpen atin dan'n bo i awiélie ti nyrennen'n nun, ye bé nga bé fa su'n, bé sonnin.

¹⁴ Sannge anuan nin atin nga bé sin nun bé nyan nguan'n bé ti kaan, ye bé nga bé kunnde bé wuin'n, ba sonman.

Waka kun nin i mma

¹⁵ Anh sasa amun wun bé nga bé ton bé wun suen ke bé ti Nyanmien nuan idyofue'n bé lika. Bé fa bua kplô wla bé wun, bé ba amun wun, sannge bé ti gbôklô bé satyi nnen mun.

¹⁶ Bé nzuen'n ye amunh fah si béo. ?Bé kô ti lômin, lôlô su? ?Bé kô ti blofue aloma aintonman su?

¹⁷ I kunngba nion, waka kpa kwlaa su mma kpakpa, sannge waka b'o ti'a kpa'n kusu o su'a mma kpakpa.

¹⁸ Waka kpa'n kwla su'a mma tete, ye waka b'o ti'a kpa'n kwla su'a mma kpakpa.

¹⁹ Waka kwlaa b'o su'a mma kpa'n bé kpe yii sin nun.

²⁰ I so'n ti, bé nzuen'n ye amunh fah si béo.

N si'a amun mlonmlon

²¹ Nanh swran kwlaa nga bé fle min bé Min'n bé ngba ye béh yôh men nga Nyanmien sié'n i nunfueo, san swran ng'o yô min Si b'o ô nyanmien su lo'n i klun sa'n, i ye oh yôh men so'n nunfueo.

²² Tyen so'n nun swran kpanngban kpa bé wa usa n ke: ?Nannan, Nannan, o dunman nun ya ka'an Nyanmien nde? ?O dunman nun ya fua'an asie usu? ?Ye o dunman nun ya yô'a sa kéklééklé mun?

²³ Ye nh séh bé ke: Amun bo an satyi mmla'n, anh fa dyaô min wun le. N si'a amun mlonmlon.

Sua kplanfue nnyon

²⁴ I so'n ti, swran kwlaa ng'o tié nde nga n ken ye'n, nan o fa su'n, o ti ke ngwlelefue b'o kpleen i sua yebue su'n sa.

²⁵ Nzué'n toli, o yii lika'n, ye aunngban'n fitaa sua so'n, sannge wa buman, yele ke bé kpleen yebue su.

²⁶ Sannge swran ng'o tié nde nga n ken ye'n b'o fa'a su'n, o ti ke sinnglinfue b'o kpleen i sua'n aunnyan'n nun'n sa.

²⁷ Nzué'n toli, o yii lika'n, ye aunngban'n fitaa sua so'n, nan wa bu mlonmlonmlonmlon.

Jésus i atin b'o le'n

²⁸ Ke Jésus kan nde so'n kléé swran mun wiéli'n, fo so'n b'o tuu bé'n o bôô bé nuan,

²⁹ afin fo wafa ng'o fa tu bé'n nin bé mmla kléfue'm bé lie'n ti'a kun, yele ke i le'n klé ke o le sin dyranfue.