Matthieu 4 - Nyanmien nde Ufle

Jésus i lakale

¹ Ye Nyanmien Wawe'n fa Jésus oo blô lo ke mmusu'm bé si Satan kô leke.

² O kpee sre nun kongue nin wia'n nun tyen ba ablanan, i sin awé kunniin.

³ Lakafue'n bee i wun le, o sé ke: Se o waan a ti Nyanmien Wa sakpa'n, sé yebue nga mun man bé katyi alie.

⁴ Sannge Jésus séé i ke, bé klelii ke: «Nanh alie kunngba ye o man swran nguaan, sannge nde kwlaa ng'o fin Nyanmien nuan fité'n, i ye o man swran nguaan.»

⁵ Mmusu'm bé si Satan fe oo Nyanmien klo'n su lo, o fe sié Nyanmien sua dan'n su, o sé ke:

⁶ Se o waan a ti Nyanmien Wa sakpa'n, tu kpen asie wun lo, afin bé klelii ke: «Oh séh i ange'm bé ke, Bé fa o bé sa su, O man o dya su kplaman yebue.»

⁷ Jésus kusu séé i ke: Bé klelii lika ufle ékun ke: «Nanh laka o Min Nyanmien.»

⁸ Mmusu'm bé si Satan fe ékun oo ôka fléiin kpa kun su, o fa men'n i famien diwle'n kwlaa nin i nun ninngé b'o ba bé nyrunnyan'n klélii, o sé ke:

⁹ Se a kôtô m bô a manman min'n, nh fah ninngé nga kwlaa man o.

¹⁰ Ye Jésus sé i ke: Satan (*f6*), dyaô le! Afin bé klelii ke: «Kôtô o Min Nyanmien'n i bô, ye sui kunngba tye.»

¹¹ Ye mmusu'm bé si Satan yatyii i nuon, nan ange'm ba be i sule.

Jésus bôô i dyunman'n bô Galilée men'n nun

¹² Ke Jésus tii ke ba wla Jean bisua'n, o oo Galilée men'n nun.

¹³ O tuu Nazareth, o wa tran Capernaüm b'o ô fete'n nuan le Zabulon-Nephtali akpasua'n su

¹⁴ nan Nyanmien nuan idyofue Ésaïe i nde'n o kpen su, o sé ke:

¹⁵ «Zabulon men'n ye Nephtali men'n, Atin b'o ko fete'n nun lo, Jourdain'n i sin lo'n, Bé bo bé ti'a Juif'n bé Galilée

¹⁶ Swran nga bé tran aôsin'n nun'n, bé wuun ke lika'n kpadya dan kpa, Ye bé nga bé tran wié'n i men tuun'n nun'n lika'n kpadyali bé su.»

¹⁷ Ke o fin le'n, Jésus bôô Nyanmien nde kanle'n bô, o sé ke: Anh katyi amun nzuen'n, afin Nyanmien i siéle ble'n wa mantan.

Jésus flee dyué kunfue nnan

¹⁸ Ke oh sinh Galilée fete'n nuan le'n, o wuun swran nnyon bé ti niaan, Simon bo bé flee Pierre'n nin André, bé su gua bé lala fete'n nun, afin bé ti dyué kunfue.

¹⁹ Jésus séé ke: Anh bla'a su n su nh fah amun katyi swran'm bé trafue ke dyué trafue sa.

²⁰ Kpekuun bé yatyili lala'm bé le, ye bé suu i suo.

²¹ Ke o oli i nyrun louun'n, o wuun swran nnyon ékun, bé ti niaan, Zébédée wa Jacques nin Jean, bé nin bé si bé ô bé alié'n nun bé su tanndan bé lala'm bé nun. Jésus flee bé,

²² kpekuun bé yatyii bé si nin alié'n le, ye bé suu i suo.

Jésus kan nde kléé swran mun, o yôô bé dyuédyué

²³ Jésus wlanwlan Galilée akpasua'n kwlaa su, o klé liké Nyanmien sua'm bé nun, o kan Nyanmien i siéle'n i dyasin fe'n klé bé, ye o wié tukpatye kwlaa b'o ô swran'm bé wun'n nin bé wunnen ya'n kwlaa.

²⁴ I dunman'n fuli Syrie men wunmuan'n nun. Bé faa bé kwlaa nga tukpatye fanunfanun ô bé wun'n, bo bé wunnen yô bé ya'n, nin bé bo asie usu a satyi bé'n, nin fiaunfue nin bubuwafue mun blelii, nan wa yô bé dyuédyué.

²⁵ Swran kpanngban kpa bé fin Galilée nin Klo Blu asa'n su, nin Jérusalem, nin Judée akpasua'n su, ye Jourdain'n i sin lo bé su i su.