Matthieu 3 - Nyanmien nde Ufle

Jean baptême yôfue'n i Nyanmien nde kanle

¹ Ble so'n nun Jean baptême yôfue'n bali, o kan Nyanmien, nde blô lo Judée lo.

² O sé bé ke: Anh katyi amun nzuen'n, afin Nyanmien i siéle ble'n wa mantan.

³ I ye Nyanmien nuan idyofue Ésaïe kennin i nde ke: «I ye o kpan blô lo nion, o sé ke: Anh siésié é Min'n i akpo'n, Anh yô i atin'm bé séiin, anh tréké su.»

⁴ Chameau ndre trale ô Jean wun, ye kplô kun tyi i afien. Lalô nin wema nzué ye o dio.

⁵ Jérusalemfue mun nin Judée men nunfue'n kwlaa, bé nin bé bo bé fin Jourdain bué lie'n kwlaa su'n, bé bee i wun le.

⁶ Ke bé di sa nga bé yôli'n i nanwle'n, o yô bé baptême nzué ba bo bé flee Jourdain'n nun.

⁷ Ke o wuun ke Pharisifue (*f4*) nin Sadducéfue (*f5*) kpanngban bé ba ke o yô bé baptême'n, o usaa bé ke: ?Onda mma mun, wan ye o séé amun ke an wanndi ya b'o wa dyaô'n i bôo?

⁸ I so'n ti, anh yô sa kpa b'o klé ke amuan katyi amun nzuen'n, ke waka kpa su mma kpa'n sa.

⁹ Nanh an bu amun awlen'n nun sé ke: É nannan yele Abraham, afin nh kanh klé amun ke Nyanmien kwla fa yebue nga mun katyi Abraham mma mun.

¹⁰ Kpelie'n wa kan waka ôlui'n, o man waka kwlaa nga i mma'n ti'a kpa'n béh kpeh gue sin'n nun.

¹¹ N lie'n, n yô amun baptême nzué'n nun ke an katyi amun nzuen'n, sannge swran ng'o ô sien b'o su ba'n, o le nyrun tra min. Min nin i ngbabua'n i suale fataman. I lie'n, o wa fa Nyanmien Wawe'n nin sin yô amun baptême.

¹² I néné'n wô i sa nun, o wa kpedye i awié'n b'o ô i bôwle'n nun'n lélé oh wiéh, oh iseh i awié'n gua tanngannin'n nun, ye oh won i wla'n nun sin b'o nuanman'n nun.

Jésus i baptême yôle

¹³ Ye Jésus fin Galilée men'n nun baa Jean wun le Jourdain'n nuan le ke Jean wa yôé baptême.

¹⁴ Sannge Jean waan o kpli'an su, nan wa sé ke: Min ye o fata ke a yô min baptêmeon, sannge a su ba n sin ke n yô o baptême.

¹⁵ Jésus séé ke: Yatyi, yô nde lie'n afin o ti i nuan su ke é yô sa kwlaa ng'o ti Nyanmien klun su'n. Ye Jean yôlio.

¹⁶ Ke bé yôô Jésus baptême b'o fin nzué'n nun fitéé tye'n, kpekuun nyanmien su lo su ti muaan, o wuun Nyanmien Wawe'n o dyra ba ke aublé sa, o wa treen i su.

¹⁷ Kpekuun bé ti swran kun nen nyanmien su lo, o sé ke: Min awlen su ba'n i su ye man fa n wla'n kwlaa guaa.