Matthieu 27 - Nyanmien nde Ufle

Jésus i Pilate dyasu fa kole

¹ Ke alie tyennin'n, Nyanmien nyrun dyranfue dandan nin men kpenngben'm bé kwlaa bé kô wuun bé wun ke bé kun Jésus.

² Ke bé tyilii'n, bé fe kô maan Pilate b'o sié bé'n.

Judas i komin bôle

³ Ke Judas b'o fa Jésus maan swran mun'n, o wun ke béh kuinh sakpa'n, o kôkôli, nan wa fa dyete ufué ablasan'n wa kô man Nyanmien nyrun dyranfue dandan nin kpenngben mun,

⁴ o sé ke: Ke n fa swran bo wa yô'a sa te fi'n maan amun ke an kuin'n, man yô'e kpa mlonmlon. Ye bé sé i ke: ?É nde ô nun? O bobo o ndeo.

⁵ Judas tô sika'n guaa Nyanmien sua dan'n nun lo, nan wa o a kô bô i komin.

⁶ Nyanmien nyrun dyranfue dandan'm bé isaa sika so'n, ye bé sé ke: É kwla fa'a sika so'n gua'a Nyanmien sika'n nun, afin bé fa sika so'n tôô swran mmôdya.

⁷ Ke bé kannin bo bé nen see su'n, bé fa sika so'n tôô se ufue'n i asie'n, ke bé fa yô aôfue'm bé asiélie.

⁸ I so'n ti, lélé nde bé te fle asie so'n mmôdya asie.

^9-10 Ye o kpeen Nyanmien nuan idyofue Jérémie i nde'n suo, o sé ke: «Bé fa dyete ufué ablasan b'o ti swran nga bé dili i gua'n i sika'n, bé fa tôô se ufue'n i asie'n, ke é Min Nyanmien'n kan kléé min ke n yô'n sa. Afin ke swran kun i gua bo Israël mma'm bé kpeli'n o ti soo.»

Pilate i Jésus sa usale

¹¹ Ke bé fa Jésus oo bé kpenngben'n i dyasu so'n, o usee i ke: ?A ti Juif'm bé famien? Ye Jésus sé i ke: Ye o nuan ô su leo.

¹² Sannge suen nga Nyanmien nyrun dyranfue dandan nin kpenngben'm bé toen'n, o te'a wié fi su.

¹³ Ye Pilate use i ke: ?A ti'a suen tete kpa nga bé ton o le'n?

¹⁴ Sannge Jésus a te'a nde so'n kun sa su, i so'n ye o bôô bé kpenngben'n i nuan dan nion.

Bé séé ke bé kun Jésus

¹⁵ Bé tyen dile kwlaa nun bisuafue kun nga swran'm bé sre bé kpenngben'n ke o yatyi i nun man bé'n, o satyi i nun man bé.

¹⁶ Ke oh yôh so'n, bisuafue kun ô le bo i dunman'n wa fu dan kpa, bé flee Barabbas.

¹⁷ Ke bé yiali'n, Pilate usa bé ke: ?Barabbas nin Jésus bo bé flee Christ'n (*f1*), bé nun ônin ye an klô ke n yatyi i nun man amuon?

¹⁸ Afin o si ke bé nyin b'o tyi Jésus'n ti ye bé fe kô meen io.

¹⁹ Ke o traan asé dyole diwle lo'n, i yi sunmaan swran ke bé kô sé i ke, nanh mon o fe i wun wla bian nanwlefue so'n i nde'n nun, afin i waan, nde o fee lalie nun dan kpa i ti.

²⁰ Nyanmien nyrun dyranfue dandan nin kpenngben'm bé di wlaa swran mun ke bé sre Barabbas ti, nan bé kun Jésus.

²¹ Kpenngben'n usaa bé ékun ke: ?Bé nnyon'n bé nun ônin ye an klô ke n yatyi i nun man amuon? Ye bé waan, Barabbaso.

²² Pilate usa bé ke: ?Ye n yô Jésus bo bé flee Christ'n i se? Bé kwlaa bé waan: Man bé bôbôé waka'n su!

²³ Ye o usaa bé ékun ke: ?Sa te ônin bo tye ye o yôlio? Ye bé kpan kéklé kpa ékun ke: Man bé bôbôé waka'n su!

²⁴ Ke Pilate wuun ke o su kwla yô'a sa fi bo alôwa'n yô dan tra su'n, o fa nzué wunnziin i sa swran'm bé nyrun le, o sé ke: Swran nanwlefue nga i kunle'n, n lie nu'an nun, amun bobo amun ndeo.

²⁵ Ye swran'n kwlaa bé sé i ke: Man i wié nde'n ka é nin é mma mun é su.

²⁶ Ye Pilate yi Barabbas maan béo. Ke o man bé bôô Jésus'n, o fe maan bé ke bé kô bôbôé waka'n su.

Sôndya'm bé Jésus finfin yôle

²⁷ Ye Pilate i sôndya'm bé fa Jésus oo i awlô lo, nan ba yia sôndya'n kwlaa bo bé ô le'n, ke bé wa yie i wun le.

²⁸ Bé yii i wun trale'n nan ba fa trale dan kun bo i nyin ti ke ba wle kôndrô bui nun sa'n ba wle i wun.

²⁹ Bé woo ôwié ke sika klé sa bé fa wle i ti, ye bé fa ndema kun wle i sa fama'n nun, bé kôtô i bô, bé yô i finfin bé sé ke: Juif'm bé famien, man a tye ô!

³⁰ Bé gue i wun ngosre, bé fa ndema'n b'o ô i sa nun'n fin i ti'n su.

³¹ Ke bé yô i finfin so wiéli'n, bé yii i wun trale dan'n, nan ba fe i bobo lie'n ba wle i wun ékun, ye bé fe oo i waka'n su bôbôleo.

Jésus i waka'n su bôbôle

³² Ke bé fin lo béh fitéh'n, bé nin Cyrène bian kun bo bé flee Simon'n yiali, nan ba mien ke o sua Jésus waka'n.

³³ Ke bé dyuu lika bo bé flee Golgotha'n bo i bô yele Ti Kônglôman Lika'n nun lo'n,

³⁴ bé menniin du vin bo bé fa nnen wiwi guaa nun'n ke o non, sannge ke o woo su'n, wa nonman.

³⁵ Ke bé bôbôlii waka'n su'n, bé tu i trale'm bé wun foto.

³⁶ I sin bé traan asé le bé nien.

³⁷ Bé kle sa nga ti ye bé bôbôlii waka'n su'n siéé i ti su le, bé klee ke: Jésus b'o ti Juif'm bé famien'n ye.

³⁸ Bé bôbôlii nin kôdiawiéfue nnyon, kun ô i fama su, kun ô i be su.

³⁹ Bé nga béh sinh le'n, bé di i te, bé kpukpu bé ti nun, bé sé ke:

⁴⁰ O bo o waan ah bubuh Nyanmien sua dan'n, nan ah kplenh lé nsan'n, dé o wun sien'n, ye se a ti Nyanmien Wa sakpa'n, fin waka'n su dyra.

⁴¹ Nyanmien nyrun dyranfue dandan nin mmla kléfue'm bé nin kpenngben mun bé yô i finfin, bé sé ke:

⁴² O déé swran wié mun, sannge o kwla dé'e i bobo wun. O ti Juif'm bé famien! Mon o fin waka'n su dyra, ye éh lafih i suo.

⁴³ O fe i wla gue Nyanmien su, se Nyanmien so'n klôé'n, mon o déé sien'n, afin i waan o ti Nyanmien Wa.

⁴⁴ Kôdiawiéfue bo bé bôbôli bé nin i'n bé kusu bé dii i te wié.

Jésus i wule

⁴⁵ Ke wia'n dyrannin'n, aôsin'n wlali men wunmuan'n nun lélé fa dyuu nnosua wia nun.

⁴⁶ Nnosua wia so'n nun Jésus kpaan kéklé kpa, o sé ke: ?Éli, Éli, lama sabaktani? bo i bô yele: ?Min Nyanmien, min Nyanmien, nzu ti ye a wanndi mion?

⁴⁷ Bé nga bé ô le'n bé nun wié tili, bé sé ke: Anh nian, o su fle Élie.

⁴⁸ Kpekuun bé nun kun wanndi kô fa mlan fa bôô du vin nyanwa nun, o fa bleblee ndema kun su, o fa meen ke o non.

⁴⁹ Sannge bé wié'm bé sé ke: Yatyi i le man é nian, se Élie wa dé i ô.

⁵⁰ Jésus kpaan kéklé kpa ékun, nan wa wu.

⁵¹ Kpekuun tannin dan'n bo bé fa kpe Nyanmien sua dan'n nun'n, o kpatyii i nglô lo lélé fa dyuu i ngua wa, asie'n kédyéli, yebue'm bé kpukéli.

⁵² Ndia'm bé buli, ye Nyanmien i swran'm bo bé wuli'n, bé sunman bé tyennin.

⁵³ Ke Jésus tyennin'n, bé kusu bé fin ndia nun fitéli, bé oo Jérusalem b'o ti Nyanmien klo'n su lo, swran sunman bé wuun bé.

⁵⁴ Sôndya ya sukpen'n nin bé nga bé ô le bé nian Jésus su'n, ke bé wuun asie'n b'o kédyéli'n nin sa ng'o yôli'n, sre kuun bé dan kpa, nan ba sé ke: Nanwle, bian so'n ti Nyanmien Wa sakpa.

⁵⁵ Bla kpanngban bo bé nin Jésus fin Galilée bali bo bé nien i lika'n, bé ô le, bé dyran mmua lo bé nien.

⁵⁶ Marie b'o fin Magdala'n, nin Marie Jacques nin Joseph bé nin'n, ye Jean nin Jacques bo bé ti Zébédée i wa'n bé nin'n, bé ô bé nun wié.

Jésus i siéle

⁵⁷ Ke alie dyoli'n, bian anyanbéunfue kun bo bé flee Joseph'n b'o fin Arimathée'n bo i kusu ti Jésus sonnzonfue kun'n o bali.

⁵⁸ O oo Pilate wun lo kô sree Jésus fuen'n, ye Pilate waan, bé fa men.

⁵⁹ Joseph faa Jésus fuen'n, o fa tannin kpa kun tyityilii,

⁶⁰ nan wa kô siéé o bobo i ndia ufle b'o man bé kpelii yebue nun'n i nun. Ye o kôndôô yebue dan kun sié ndia'n i anuan'n nun, nan wa o.

⁶¹ Marie b'o fin Magdala'n nin Marie kun'n bé ô le, bé ti ndia'n i nyrun ndenman su le.

Ndia'n i sunianle

⁶² Ke Juif'm bé buabuaa bé wun ya'n bo alie'n tyennin'n, Nyanmien nyrun dyranfue dandan nin Pharisifue'm (*f4*) bé bô yô kun bé oo Pilate wun lo bé kô sé i ke:

⁶³ Nannan, é wla kpen nde kun bo ke bian gblefue dan so'n i nyin ô su'n o kannin'n su, i waan, se bé kuin nan o di lé nsan'n, oh tyenh.

⁶⁴ I so'n ti, sé sôndya mun man bé kô nian ndia'n su lélé o di lé nsan, nan i sonnzonfue'm ba'a fe'e i fuen'n, ba sé'a swran'm bé ke wa tyen'n ti. Se o yô so'n, gble nga bé wa yôé kasien'n, oh trah laa lie'n.

⁶⁵ Pilate sé bé ke: Sôndya mun ye bé ô leo, anh fa bé wo man bé kô nian su ke an klô'n sa.

⁶⁶ Bé fa bé oli. Ke bé taa ndia'n su'n bé siéé i nzolie, nan ba sié sôndya mun le.