Matthieu 26 - Nyanmien nde Ufle

Jésus wun nde tyityile

¹ Ke Jésus wiéé nde so'n kwlaa kan bo i nuan toli'n, o sé i sonnzonfue'm bé ke:

² An si ke o ka lé nnyon Pâque'n (*f17*) dyuh, bé wa fa m bo n katyii Swran'n man swran mun ke bé bôbô min waka'n su.

³ Ke oh yôh so'n, wuun Nyanmien nyrun dyranfue dandan nin men kpenngben'm ba yia Nyanmien nyrun dyranfue dan'n bo bé flee Caïphe'n i awlô lo,

⁴ ke béh kunndeh ngwlele wafa nga bé fa tra Jésus bé kuin'n.

⁵ Sannge bé waan, nanh mon o yô tyen dile'n nun, se o yô soo, o tyeman nan swran'm ba tri.

Bla kun fa blofue nzué guaa Jésus ti'n su

⁶ Ke Jésus ô Simon kôkôwéfue'n i awlô Béthanie lo'n, bla kun bee i wun le.

⁷ Blofue nzué bo i gua ti kéklé kpa'n i albâtre (*f18*) se kun ô i sa nun. Ke Jésus ti alie'n sin'n, o fa blofue nzué so'n gue i ti'n su.

⁸ Ke i sonnzonfue'm bé wuun i so'n, o yôô bé ya, nan ba sé ke: ?Liké satyile ngben ke nga sa'n, i bô yele ônin?

⁹ Bé kwla yô blofue nzué nga i ate gua kpan, bé fe i sika'n man yalefue mun.

¹⁰ Jésus wuun bé akunndan'n, nan wa sé bé ke: ?Nzu ti ye an fita bla'n i awlen soo? Liké ng'o yô maan min'n ti kpa.

¹¹ Afin amun nin yalefue mun ye amunh kah titio, sannge n lie'n, min nin amun su tra'an wa titi.

¹² Blofue nzué so'n b'o fa guaa min wun'n o ti ke min nzie ye wa siéo.

¹³ Nanwle, men wunmuan'n nun lika kwlaa nga béh bôh dyasin fe nga'n, béh kanh sa nga bla nga yôli'n wié, ke bé wla kpen i su.

Judas i Jésus swran'm bé fa manle

¹⁴ Ye i sonnzonfue blu-nin-nnyon'n bé nun kun bo bé flee Judas Iscariot'n o oo Nyanmien nyrun dyranfue dandan'm bé wun lo,

¹⁵ o usa bé ke: ?Se n fe man amun'n, nzu ye amunh manh mion? Nan bé nen a su ke béh menh i dyete ufué ablasan.

¹⁶ Ke o fin tyen so'n nun'n, o kunndeli tyen ng'o ti kpa bo i nun oh kwlah fe man bé'n.

Jésus nin i sonnzonfue'm bé dii Pâque'n

¹⁷ Lé kunngba bo béh bôh kpaun bo bé gua'a nun ayré'n (*f19*) i dile bô'n, Jésus sonnzonfue'm bé wa usee i ke: ?Nin ye a klô ke é kô siésié nan a di Pâque (*f17*) nion?

¹⁸ O sé bé ke: Anh wo klo lo swran kun awlô, anh sé i ke, Ndya waan iyô, é sé o ke i ble'n wa mantan, nan o lika wa ye o nin i sonnzonfue'm béh dih Pâque nion.

¹⁹ Jésus sonnzonfue'm bé yôô liké ng'o kan kléé bé ke bé yô'n, nan ba kô ton Pâque alie'n.

²⁰ Ke alie dyoli'n, o nin i sonnzonfue blu-nin-nnyon'n bé traan alie'n sin.

²¹ Ke béh dih liké'n, o sé ke: Nanwle, amun nun kun wa fa min man swran mun.

²² Bé wla bôô dan kpa, bé use bé ti nun ti nun ke: ?Nannan, mion?

²³ O sé ke: Swran nga bé nin min wlaa asa ityra'n, bé nun kun ye oh fah min man swran muon.

²⁴ M bo n katyii Swran'n n su ko ke bé klee min wun nde'n nun'n sa, sannge swran ng'oh fah min man swran mun'n, i yakô! O flunman ke ba wu'a swran so'n.

²⁵ Judas b'o fe maan swran mun'n o usee i ke: ?Baba, mion? Jésus sé i ke: Een, ye o nuan ô su leo.

Communion fale'n i ba kpele

²⁶ Ke béh dih liké'n, Jésus faa kpaun, ke o laa Nyanmien asé'n, o bubu nun fa meen i sonnzonfue mun, o sé bé ke: Kpaun ng'o ô ye'n ti min wunnen, anh fa di.

²⁷ I sin o faa klôwa kun, ke o laa Nyanmien asé'n, o fa maan bé, o sé bé ke:

²⁸ Amun kwlaa anh non, du vin ng'o ô ye'n o ti min mmôdya b'o man amun nin Nyanmien amunh dih anuanse. Swran sunman bé ti ye béh gueh i aséo, o man Nyanmien yatyih bé sa bo bé yôlii'n tye bé.

²⁹ Nh kanh klé amun ke, ke o fin nde'n n su no'an raisin (*f12*) nzué nga kun, lélé san tyen nga min nin amun éh nonh ufle n Si i men'n nun lo'n.

³⁰ Ke bé tôô Nyanmien manmanle dyué'n, bé oo Olive Ôka'n su lo.

Jésus séé ke Pierre wa sé ke o simen

³¹ Ye Jésus sé bé ke: Nde kongue nga amun kwlaa amun ti nun wa satyi min ti, afin bé klee ke: «M ma bô bua tafue'n, ye bua fa so'n béh bôh sanndi.»

³² Sannge ke n wu bo n kô tyen'n, nh dunh mmua amun nyrun Galilée lo.

³³ Pierre soo su, o sé i ke: Kannze o ti bé kwlaa bé ti nun satyih'n, n lie'n su satyi'a wié mlonmlon.

³⁴ Jésus sé i ke: Nanwle, nde kongue nga bobo, a wa sé ke a si'a min so kpa nsan, nan ako nyinman'n wa bô.

³⁵ Pierre sé i ke: Kannze min nin wo é wu'n, san éh wuh, n su sé'a ke n si'a o lé. Nan i sonnzonfue'n kwlaa ba kan nde kunngba'n.

Jésus kôkô yale kléé Nyanmien Gethsémané lo

³⁶ Ke o yôô so'n, o nin i sonnzonfue'm bé oo lika bo bé flee Gethsémané'n nun lo, o sé bé ke: Anh tran wa, n kusu nh koh n nyrun lo, nh kôh kôkô yale klé n Si.

³⁷ O faa Pierre nin Zébédée wa yasua nnyon'n bé oli, akluntitie'n too i su, ye awlabôe'n bôô i kunle bôo,

³⁸ ye o sé bé ke: Awlabôe'n su kun min, anh ka wa, anh tran bé nyin su uka min.

³⁹ Ye o oo i nyrun lo kaan, o la utu i nyin asé, o sé i Si ke: N Si, se nyrennen wié nga kwla tô fuan min'n, mon o tô fuan min, sannge nanh yô nga a klô ke o yô su'n, sannge yô nga a klô ke ah yôéh su'n.

⁴⁰ Ke o se i sin b'o tô i sonnzonfue muon, bé ô le bé su lafi, ye o sé Pierre ke: Amuan kwla tra'an amun nyin su a uka'a min do bo kun!

⁴¹ Man amun nyin tran su, ye amun nin Nyanmien anh kôkô yale nan Lakafue'n wa laka'a amun. Amun awlen'n wô su ke amunh yôh, sannge an le'e i wun fanngan.

⁴² O yatyi bé oli ékun, o sé i Si ke: N Si, se o ti'a bo nyrennen wié nga tô fuan min'n, man n wun nyrennen so'n. Sa nga a klô ke ah yôh'n, yô.

⁴³ O baa ékun o tô béo, bé su lafi, afin lafile'n wô bé nyin su.

⁴⁴ O yatyi bé le o oo ékun, o kô kan nde kunngba'n kléé i Si ékun.

⁴⁵ I sin o se i sin bee i sonnzonfue'm bé wun le, o sé bé ke: Anh dé wunmien, anh lafi sien'n! Anh nian, do nga béh fah m bo n katyii Swran'n man sa te yôfue mun'n wa dyu.

⁴⁶ Anh dyaô man é wo, swran ng'oh fah min man swran mun'n o su ba.

Jésus i trale

⁴⁷ Ke i nuan te ô nde'n su'n, kpekuun i sonnzonfue blu-nin-nnyon'n bé nun kun bo bé flee Judas'n, o nin swran kpanngban bo Nyanmien nyrun dyranfue dandan nin men kpenngben'm bé sunmaan bé, bo kaka nin klonman ô bé sa nun'n, ba bô nun.

⁴⁸ Judas b'o fe maan swran mun'n, o kléé bé nzolie kun, o sé ke: Swran nga n tô n sa yi i komin'n, wuun io, anh tre.

⁴⁹ Kpekuun o wunngé i wun le, o sé i ke: Baba, anun ô, ye o tôô i sa yi i komion.

⁵⁰ Jésus sé i ke: Dyanvue, liké nga a bee i yôle'n, yô. Nan swran so'm ba to Jésus su, ba tre.

⁵¹ Bé nga bé su Jésus su'n bé nun kun tyuen i kaka'n o fa kpee Nyanmien nyrun dyranfue dan'n i swran'n kun su'n.

⁵² Ye Jésus sé i ke: Fo o kaka'n wle i bua'n nun, swran kwlaa ng'o tra kaka nun'n, kaka i nuan ye oh kooh.

⁵³ ?A bui ke n kwla fle'a n Si ke o ble min ange bo bé tra akpi fa blu-nin-nnyon ityra'n?

⁵⁴ ?Se wa yô'a so'n, oh yôh se nan nde nga bé kleli i ke béh yôh ke nga sa'n, wa kpen su?

⁵⁵ Kpekuun Jésus sé swran'm bé ke: An su n su nin klonman nin kaka mun ke kôdiawiéfue bo an be i trale sa. Tyen kwlaa n tran Nyanmien sua dan'n nun n klé liké, amuan tra'a min.

⁵⁶ Sannge bé yôô i kwlaa so'n nan nde nga Nyanmien nuan idyofue'm bé kleli'n o kpen su. Ye i sonnzonfue'n kwlaa bé yatyii le bé wanndilio.

Jésus i dyole difue dandan'm bé dyasu fa kole

⁵⁷ Bé bo bé traa Jésus'n bé fe oo Nyanmien nyrun dyranfue dan Caïphe i awlô lo, kan mmla kléfue nin kpenngben'm bé yiaa lo'n.

⁵⁸ Pierre su i su lélé bé dyuu Nyanmien nyrun dyranfue dan'n i awlô lo, sannge o mentenmen. O wluu lo, o nin sua sunianfue'm bé tran le ke o nian ke nde so'n oh fah kpe'n.

⁵⁹ Nyanmien nyrun dyranfue dandan'm bé nin dyole difue dandan'n kwlaa bé kunnde Jésus wun sa kun bo béh dyranh su fa kuin.

⁶⁰ Swran kpanngban bé wa toon i suen'n, sannge wa yô'a yé.

⁶¹ I sin i suen tonfue nnyon ékun bé bali, bé sé ke: Bian so'n waan, o kwla bubu Nyanmien sua dan'n, ye oh kplenh ufle lé nsan.

⁶² Nyanmien nyrun dyranfue dan'n o dyaô usaa Jésus ke: ?A te'a nde fi su? ?Nde nga bé ken le'n, o ti se?

⁶³ Sannge Jésus a uké'e i nuan. Ye Nyanmien nyrun dyranfue dan'n sé i ke: Nh sreh o, nian Anannganman Nyanmien'n ti, se a ti Christ Nyanmien Wa'n, kan klé é.

⁶⁴ Ye Jésus sé i ke: Ye o nuan ô su leo. Nh kanh klé amun ékun ke, ke o fin nde'n, amun wa wun m bo n katyii Swran'n ke n ti Nyanmien Kpli'n i fama su, ye n wô nyanmien blé'n su n su ba.

⁶⁵ Ye Nyanmien nyrun dyranfue dan'n tii i bobo wun trale'n nuon, o sé ke: Wa satyi Nyanmien dunman! ?Lalôfue ônin ye éh kunndeh i ékuon? Afin amun bobo an tii Nyanmien dunman b'o satyi'n. ?An bu i se?

⁶⁶ Ye bé sé i ke: O nin kunle ye o fataa.

⁶⁷ Ke o yôô so'n, ye bé guee i nyrun ngosre, bé bôô i atyolieo.

⁶⁸ Wié'm bé kpatyi i nyrun, bé sé ke: Christ (*f1*), klé é swran ng'o bô wo'n.

Pierre séé ke o si'a Jésus

⁶⁹ Ke oh yôh so'n, wuun Pierre ti awlô le. Afannien kun bee i wun le, o sé i ke: O kusu, a ô Jésus b'o fin Galilée'n i sin wié.

⁷⁰ Sannge o keen bé kwlaa bé nyrun le ke o simen, o sé ke: Nde nga a klô ke ah kanh'n, n wu'en i wle.

⁷¹ Ke Pierre oo ala bô lo'n, afannien kun ékun wunniin, o sé bé nga bé ô le'n bé ke: Bian nga ô Jésus b'o fin Nazareth'n i sin wié.

⁷² O keen ékun ke o simen, nan wa di Nyanmien Kpli'n.

⁷³ Ke o tyee kan'n, bé nga bé ô le'n bé wunngé Pierre wun le, bé sé i ke: Nanwle, o kusu, a ô minnien nga'm bé nun wié, afin wo anien'n klé so.

⁷⁴ Ye o fa Nyanmien Kpli wuewue i wuon, o sé ke: Se m bua atô'n, man Nyanmien Kpli wun min. N si'a bian so'n. Ke o yôô so'n ye ako nyinman'n bôlio.

⁷⁵ Ye Pierre wla kpeen nde nga Jésus kan klélii ke, o wa sé ke o simen so kpe nsan, nan ako nyinman'n wa bô'n i suo. O fitéé gua su lo, nan wa sun dan kpa.