Matthieu 25 - Nyanmien nde Ufle

Talua blu bé wun nyanndra

¹ I ble so'n nun Nyanmien siéle'n oh yôh ke talua blu bo bé faa bé kannin mun ke béh kôh kpa yasua kun b'o su wa fa atonvle'n i atin'n sa.

² Bé nun nnun bé ti sinnglinfue, ye nnun bé ti ngwlelefue.

³ Sinnglinfue'm bé faa bé kannin'n, sannge ba fe'e i nzué a tra'a nun.

⁴ Sannge ngwlelefue'm bé faa bé kannin mun, ye bé gue i nzué'n wié liké wié nun traa nun.

⁵ Ke yasua so'n tyeli b'o baman'n, lafile'n fa bé kwlaa, nan ba lafi.

⁶ Ke lika'n buu nun'n, swran wié kpan séé ke: Anh nian, bian'n su ba, anh fité kô kpe i atin.

⁷ Talua so'm bé kwlaa bé dyaôli, nan ba yô bé kannin'm bé kpa.

⁸ Sinnglinfue'm bé sé ngwlelefue'm bé ke: Anh man é amun kannin nzué'n wié, é kannin lie'm bé su nuan.

⁹ Ngwlelefue'm bé sé bé ke: É bu'e ke o dyu é nin amun, o man anh wo kan bé yô i ate lo'n, anh kô tô bé lie.

¹⁰ Ke béh koh i tôle'n ye bian'n dyuu leo, bé nga bé buabuaa bé wun'n bé nin bian'n bé wluu kan bé fa atonvle'n lo'n, nan ba tô anuan'n nun.

¹¹ Ke o tye louun kan'n ye talua nga'm bé balio, bé sé ke: Ndya, Ndya tiké é anuan!

¹² Sannge o sé bé ke: Nanwle, n si'a amun.

¹³ Ye Jésus sé bé ke: I so'n ti, anh tran minnde, afin an si'a tyen'n nin do'n.

Dyunman difue nsan bé wun nyanndra

¹⁴ O wa yô ke bian kun bo ke o wa ko lika'n, o flee i swran mun, o fe i ninngé'n kwlaa wlaa bé sa nun'n sa.

¹⁵ O maan kan talent (*f11*) nnun, o maan kun nnyon, ye o maan kun ékun kun, ke swran kun i wunmien'n fa ti dyu'n sa, ye o olio.

¹⁶ Ke o yôô so'n, nga bé meen i talent nnun'n o fa kô dii aata, nan wa nyan su nnun.

¹⁷ I kunngba'n nga bé meen i talent nnyon'n o nyaan nnyon uka su.

¹⁸ Nga kusu bo bé meen i kun'n o kô kpe kunman, o fe i min'n i sika'n fiaa nun.

¹⁹ Ke o tyee kpa'n, swran so'm bé min'n bali, o fle bé ke bé bla man bé bu sika b'o maan bé'n i akunndan.

²⁰ Nga b'o meen i talent nnun'n, o fa nnun ékun bali, o sé ke: Baba, a maan min talent nnun, nian, man nyan nnun ékun.

²¹ I min'n sé i ke: O ti kpa. A ti swran kpa, a ti nanwlefue, liké kaan nga n fa mannin wo'n, a yôli i kpa, i so'n ti, n kusu nh foh o sié liké dan su. Bla man é ablé.

²² Nga b'o meen i nnyon'n, i kusu bali, o sé ke: Baba, a maan min talent nnyon, nian, man nyan nnyon ékun.

²³ I min'n sé i ke: O ti kpa. A ti swran kpa, a ti nanwlefue, liké kaan nga n fa mannin wo'n a yôli i kpa, i so'n ti, nh foh o sié liké dan su. Bla man é si ablé.

²⁴ I sin nga b'o meen i kun'n bali, o sé ke: Baba, n si ke a ti swran bo i liké yôle yô ya, lika nga a gua'a awié le'n, a kpa awié le, ye a isa awié bo nanh wo ye a bôli'n.

²⁵ Sre kuun min o wun, nan man fa o talent'n man kô wle i asé, nian, o sika'n ye, dé.

²⁶ I min'n sé i ke: A ti swran te, a ti fuenfue, a sé ke, lika nga man gua'a awié le'n, n kpe awié le, ye n isa awié bo nanh min ye m bôli'n.

²⁷ ?B'o li a si so'n, se o ti ke a fa n sika'n kô maan sika siéfue mun'n, ke n sa n sin bali'n, bo nh kôh fa'n, wuun n nya'an su nvasue?

²⁸ I so'n ti, anh dé talent kun ng'o ô i sa nun'n, anh fa uka swran ng'o le talent blu'n i lie'n su.

²⁹ Afin swran ng'o le liké'n ye béh menh i wiéo, ye oh nyanh kpanngban, sannge swran ng'o le'a liké'n, kaan ng'o ô i sa nun'n, béh déh.

³⁰ Ye n swran b'o ô ye'n b'o le'a nyankô'n, anh fe i guasu lo aôsin'n nun, kan bé sun bé di bé dyé lo'n.

Dyole dile'n i atabô

³¹ Ke m bo n katyii Swran'n bo min nyrun ti nyannyan o yô srô'n, min nin min ange'n kwlaa éh bah'n, nh yih n famien'n nglô nh tranh m bia'n su.

³² Nvlénvlé'n kwlaa béh yiah min nyrun le, mh buh bé nun ke nnen tafue bu i bua nin i bôli'm bé nun gua bé ngunminngunmin'n sa.

³³ Nh guah bua mun n sa fama su, ye nh guah bôli mun n sa be su.

³⁴ Ye m bo n ti famien'n nh séh bé nga bé gua n fama su'n ke: Amun bo n Si yôli amun yé'n, anh bla'a di famien bo ke b'éh bôh men'n i bô'n, bé sié maan amun'n.

³⁵ Afin ke awé kuun min'n, an maan min liké, nzué wé kuun min, an maan min nzué, ke n ti aôfue'n an sikéé min,

³⁶ ke min wun ti kplen'n an maan n tannin, n too tukpatye, an niaan n lika, bé wlaa m bisua, an niaan n wôsu.

³⁷ Ye nanwlefue'm bé wa usa n ke: ?Nannan, tyen ônin ye é wuun wo bo awé kun wo bo é moon o likéo, annze é wuun wo bo nzué wé kun wo bo é moon o nzuéo?

³⁸ ?Tyen ônin ye é wuun wo bo a ti aôfue bo é sikéli woo, annze o wun ti kplen bo é moon o tannion?

³⁹ ?Ye tyen ônin ékun ye é wuun ke a too tukpatye annze ba wlo o bisua bo é niannin o ôsuo?

⁴⁰ Ye m bo n ti famien'n nh séh bé ke: Nanwle, liké kwlaa nga an yô maan n nian nga bé yale'n tra wié'm bé lie'n, bé nun kun'n, min ye an yô maan mion.

⁴¹ I sin nh séh bé nga bé gua m be su'n ke: Amun bo n Si bôô amun sannzan'n, anh dyaô min wun le o anannganman sin bo bé tro maan mmusu'm bé si Satan nin i ange mun'n nun.

⁴² Afin ke awé kuun min'n, amuan ma'an min liké, nzué wé kuun min, amuan ma'an min nzué.

⁴³ Ke n ti aôfue'n, amuan siké'a min, ke min wun ti kplen'n, amuan ma'an n tannin, n too tukpatye, amuan nia'an n lika, bé wlaa m bisua, amuan nia'an n wôsu.

⁴⁴ Ye bé kusu béh usah n ke: ?Nannan, tyen ônin ye é wuun wo bo awé kuun wo, nzué wé kuun wo, a ti aôfue, o wun ti kplen, a too tukpatye, bé wloo o bisua bo ya nionmon o likaa?

⁴⁵ Ye nh séh bé ke: Nanwle, liké kwlaa nga amuan yô'a ma'an n niaan nga bé yale'n tra wié'm bé lie'n, bé nun kun'n, min ye amuan yô'a ma'an mion.

⁴⁶ Swran so'm bé lie'n, béh koh lika bo lo nyrennen'n wiéman'n nun, sannge nanwlefue'm béh nyanh anannganman nguan.