Matthieu 24 - Nyanmien nde Ufle

Jésus kaan Nyanmien sua dan'n i satyile nde

¹ Ke Jésus fin Nyanmien sua dan'n nun fitéli b'oh koh'n, i sonnzonfue'm bé wunngéé i wun le, bé fa Nyanmien sua dan'n i wafa nga bé fa kplannin'n klélii.

² Ye o sé bé ke: ?An wun ninngé kwlaa nga? Nanwle, i yebue fi su ke'e i wiéngu yebue su b'o su kan guamaan.

Nyrennen nga bé wa wuin nan men'n wa bô'n

³ O kô traan asé Olive Ôka'n su. Ye i sonnzonfue'm bé bee i wun le, bé use blele ke: ?Ble ônin ye sa so'm bé yôo, ye nzu ye o ti o bale'n nin men'n i awiélie'n i nzolie nion? Klé é.

⁴ Jésus sé bé ke: Anh sasa amun wun kpa, nanh man bé laka amun.

⁵ Afin wa ti ale i wun nde nin i ngannien, béh séh ke, bé ye bé ti Christ (*f1*) nion. Bé wa laka swran kpanngban.

⁶ Amun wa ti ale i wun nde nin i ngannien, nanh man amun klun titi amun, afin san sa so'm béh yôh.

⁷ Sannge o su yô'e i awiélie. Nvlé kun wa dyaô nvlé kun wun, ye famien kun wa dyaô i wiéngu famien kun wun. Lika wié'm bé nun awé wa kpen, asie'n o wa kédyé.

⁸ I kwlaa so'n ti nyrennen'n i bué nuan kaan sa.

⁹ Bé wa fa amun wla nyrennen nun, béh kunh amun, ye nvlé'n kwlaa béh kpoh amun n dunman nun.

¹⁰ O man swran sunman bé ti nun oh satyih, béh fah bé wiéngu wle swran'm bé sa nun, béh kpoh bé wiéngu.

¹¹ Swran kpanngban bo bé ton bé wun suen ke bé ti Nyanmien nuan idyofue'n, bé wa dyaô laka swran kpanngban.

¹² Sa tete'n b'o wa son'n ti swran kpanngban bé swran klôle'n oh wiéh.

¹³ Sannge swran ng'o tre i awlen lélé dyu i awiélie'n, oh fitéh nun.

¹⁴ Bé wa kan Nyanmien siéle'n i dyasin fe nga men wunmuan'n nun nan swran'n kwlaa bé ti Nyanmien nde'n. I sin ye men i awiélie'n oh dyuoh.

Nyrennen dan'n

^15-16 I so'n ti, ble nga an wun «tété liké» bo Nyanmien nuan idyofue Daniel keen i nde'n, ke o ô Nyanmien lika'n nun'n, man bé nga bé ô Judée'n bé wanndi o ôka'n su lo. —Man swran ng'o kanngan nde so'n o bu i akunndan! —

¹⁷ Ye swran ng'o ô sua ti gbagblagba'n su'n, ke o dyra'n, nanh mon o kô fa liké sua lo.

¹⁸ Ye swran ng'o ô fié su'n, nanh mon o se i sin ke o wa fe i trale dan'n.

¹⁹ Ble so'n nun wunnzefue nin bla ta'm bé yakô!

²⁰ Anh sre Nyanmien ke, nanh man amun wanndile'n yô ayre nun, annze sabbat b'o ti amun tyen te'n.

²¹ Afin ble so'n nun nyrennen'n oh yôh dan, bo ke o fin men'n i bôbôle'n nun lélé nde i wunsu nian yô'a le, ye i wunsu su yô'a kun lé.

²² Se Nyanmien a kpe'a tyen so'n su'n, swran fi su fité'a nun, sannge bé b'o faa bé'n bé ti, oh kpeh tyen so'n su.

²³ I ble so'n nun, se swran wié sé amun ke Christ (*f1*) ô wa'n, annze o ô lé sa'n, nanh an fa su.

²⁴ Afin bé bo bé ton bé wun suen ke bé ti Christ'n, o nin bé bo bé ton bé wun suen ke bé ti Nyanmien nuan idyofue'n, bé wa dyaô, béh yih atre, béh yôh abônuan sa mun lélé ke bé fa laka bé bo Nyanmien faa bé'n bobo, se bé kwla nyan bé ô.

²⁵ Man dun mmua bô su a klé amun.

²⁶ I so'n ti, se bé sé amun ke, o ô blô lo'n, nanh an wo se bé sé amun ke, anh nian o ô sua lo'n, nanh an fa su.

²⁷ Afin ke nyanmien'n kpasin wia afilie lo o kpadya lélé dyu wia atolie lo'n, ke m bo n katyii Swran'm m bale'n oh yôh soo.

²⁸ Lika nga liké fuen ô le'n, le ye apetekuasi'm bé yiaa.

Jésus b'o katyii Swran'n i bale

²⁹ Ke tyen so'n nun nyrennen lie'n kô sin tye'n, wia'n katyih tuun, anglô'n su ta'a kun, nzraama'm béh finh nyanmien su lo gua, ye bé wa kédyé nyanmien su lo ninngé ngblingbli'm bé nun.

³⁰ Ye nzolie ng'o klé ke m bo n katyii Swran'n n su ba'n oh fitéh nyanmien su lo, nvlénvlé'n kwlaa béh bôh auyé, béh wunh m bo n katyii Swran'n ke n wô nyanmien blé'n su n su ba. Mh bah yasua su, min nyrun nyannyan o yô srô.

³¹ Ke awe'n kô te'n, nh sunmanh min ange mun, bé wa yia bé bo Nyanmien faa bé bo bé ô men wunmuan'n nun'n, ke o fin nyanmien'n i bué kun su lélé fa dyu i bué kun ékun.

Blofue aloma'n i su nde

³² Anh fa sunnzun blofue aloma'n bé nian. Ke oh nyrenh, bo i nnya'n treh'n, an si ke munngun'n wa mantan.

³³ I kunngba nion, amun kusu ke an wun ninngé so'm bé kwlaa'n, man amun si ke m bo n katyii Swran'n min nin wa a mantan, n dyin anuan'n sin.

³⁴ Nanwle, swran nga bé ô le'n, bé su wiéman nan sa so'm ba yô.

³⁵ Nyanmien'n nin asie'n béh sinh, sannge min nde'n i ble'n su si'an lé.

Nyanmien kunngba tye ye o si i bale tyeon

³⁶ Tyen so'n nin i do'n swran fi simen, san min Si kunngba tye ye o si io. M bo n ti i Wa'n bobo n simen, ye nyanmien su lo ange'm bé kusu bé simen.

³⁷ Ke m bo n katyii Swran'n m ma ba'n, swran'm béh yôh ke Noé i ble su'n sa.

³⁸ Ble so'n nun, ke o ka kaan bo nzué dan'n toh'n, swran'm bé di liké, bé non nzan, bé non nzan, bé dya bla nin bian, lélé fa dyu tyen nga Noé wluu mméli'n nun'n.

³⁹ Ba bu'a liké fi akunndan, lélé nzué dan'n o wa fa bé kwlaa oli. Ke m bo n katyii Swran'n m bale'n o wa yô soo.

⁴⁰ Ble so'n nun yasua nnyon bo bé ô fié kun su'n béh fah kun, kun kah le.

⁴¹ Bla nnyon bo bé su si liké'n béh fah kun, kun kah le.

⁴² I so'n ti, anh tran minnde, yele ke an si'a tyen nga amun Min'n oh bah nuon.

⁴³ Man amun wun i wle ke, se awlô bô kpen kun si kongue do nga awiéfue'n bah su'n, oh tranh minndee, o su yatyi'e le ke o fiti i sua'n.

⁴⁴ I so'n ti, amun kusu anh buabua amun wun sié, afin m bo n katyii Swran'n mh bah do nga an bu'a min akunndan'n su.

Dyunman difue ng'o ti kpa'n nin ng'o ti'a kpa'n

⁴⁵ ?Swran kpa nanwlefue b'o si ngwlele'n bo i min'n fe sié i swran'm bé su ke o man bé alie ble ng'o ti i nuan su'n i su'n, yele wan?

⁴⁶ Dyunman difue nga ke i min'n bah'n o di i dyunman so'n, i lie su ti yé!

⁴⁷ Nanwle, o wa fe i ninngé'n kwlaa wle i sa nun.

⁴⁸ Sannge se o ti dyunman difue b'o ti'a nanwlefue b'o bu akunndan ke

⁴⁹ i min'n i bale'n wa tye, nan o to i wiéngu dyunman difue'm bé su o bô bé, o nin nzanbôefue mun bé di bé non'n,

⁵⁰ dyunman difue so'n i min'n oh bah tyen nga i nyin nu'en i bale'n su kun'n, nin do ng'o si'a ke i su ye o ba'n.

⁵¹ Oh kpekpeh i nun, oh feh wle dunman klôfue'm bé nun, kan bé sun bé di bé dyé lo'n.