Matthieu 23 - Nyanmien nde Ufle

Jésus i mmla kléfue nin Pharisifue'm bé kputule

¹ Ye Jésus kan nde kléé swran mun nin i sonnzonfue mun, o sé bé ke:

² Mmla kléfue nin Pharisifue (*f4*) mun bé siin Moïse dya nun.

³ I so'n ti, liké nga bé klé amun'n, anh fa su, anh yô, sannge bé bobo bé fa'a su.

⁴ Bé wlawla tro nonninnonnin dyin swran'm bé ti su, sannge bé bobo bé fa'a bé sama bo kun kenmen.

⁵ Liké kwlaa nga bé yô'n, bé yôé ke swran'm bé wun bé. Bé wla sebe dandan mun, ye bé yô bé trale'n i nuan ndyole'n tennden.

⁶ Ke béh dih liké nzra nun'n, bé klô swran dandan'm bé tranwle'n nun tranle, bé klô Nyanmien sua nun bia kpakpa su tranle.

⁷ Bé klô ke swran'm bé yô bé liké nzra nun, ye bé fle bé Nannan.

⁸ Sannge amun lie'n, nanh an yô amun wun ke bé fle amun Nannan, afin amun sukpen b'o ti amun liké kléfue'n ti kunngba tye, ye amun kwlaa an ti niaan.

⁹ Nanh an fle swran ti blé fi amun si, afin amun Si'n ti kunngba tye, i ye o ô nyanmien su lo nion.

¹⁰ Nanh an yô amun wun ke bé fle amun swran'm bé sukpen, afin amun sukpen'n ti kunngba tye, yele Christ.

¹¹ Swran ng'o ti dan tra amun kwlaa'n, mon o su i wiéngu mun.

¹² Swran ng'o yô i wun dandan'n, Nyanmien wa gue i nyin asé, sannge swran ng'o tu'e i wun'n, Nyanmien man oh nyanh nyrun.

¹³ Amun mmla kléfue nin Pharisifue dunman klôfue mun, an yakô! Yele ke an ma'an swran'm bé atin ke bé fa bé wun man Nyanmien ke o sié bé. Amun bobo an fa'a amun wun ma'an Nyanmien ke o sié amun, ye bé nga bé waan béh yôh'n, an kpli'an bé su.

¹⁴ [Amun mmla kléfue nin Pharisifue dunman klôfue mun, an yakô! Yele ke an dé angbôti mmla'm bé awlô'n, ye an kan nde tennden klé Nyanmien lélélé ke swran'm bé bu amun swran kpa. I so'n ti, amun fo tule lie'n o wa yô te kpa.]

¹⁵ Amun mmla kléfue nin Pharisifue dunman klôfue mun, an yakô! Yele ke an wlan dyénvié'n nin asie'n bé lika'n kwlaa ke amunh kunndeh swran kun nan o katyi Juif. Ke an kô nyen'n, amun man o katyi nyrennen lika'n nun lofue tra amun bobo kpe blu.

¹⁶ Amun anyansifue'm bo an klé swran atin'n, an yakô! Afin an sé ke, se swran wié di Nyanmien sua dan'n, nde fi nu'an nun, sannge se swran wié di Nyanmien sua dan'n nun sika okwle'n, bé dé i liké.

¹⁷ Anyansifue, sinnglinfue mun, sika okwle'n nin Nyanmien sua dan'n b'o man sika okwle so'n katyi Nyanmien lie'n, bé nun ônin ye o ti dan tra kuon?

¹⁸ Ye an sé ke, se swran wié di Nyanmien sowle'n, nde fi nu'an nun, sannge se swran wié di nnen'n bo bé fa so Nyanmien b'o ô i sowle'n su'n, bé dé i liké.

¹⁹ ?Anyansifue mun, nnen'n ye o ti daan, annze Nyanmien sowle'n bo i su ye Nyanmien fa nnen nion?

²⁰ Swran ng'o di Nyanmien sowle'n, wuun wa di Nyanmien sowle'n nin liké kwlaa ng'o ô su'n.

²¹ Ye swran ng'o di Nyanmien sua dan'n, wuun wa di Nyanmien sua dan'n nin Nyanmien Kpli b'o tran nun'n.

²² Swran ng'o di nyanmien'n, wuun wa di Nyanmien Kpli i bia'n o nin Nyanmien Kpli'n bobo b'o tran su'n.

²³ Amun mmla kléfue nin Pharisifue dunman klôfue mun, an yakô! Yele ke an yi menthe'n nin aneth'n nin cumin'n (*f15*) bé blusu'n (*f16*), sannge an yatyi mmla ng'o ti tyinndyin'n, nanwle dile'n, nin aunnvue sile'n, nin sa kpa yôle b'o man swran'm bé fa bé wla gua amun su'n. Bé ye bé yôle'n ti i su nion, sannge nanh an yatyi wié'm bé yôle.

²⁴ Amun anyansifue'm bo an klé swran atin'n, an kpukpu nzué'n an yi kakaa ba kun b'o ô nun'n, sannge an men chameau.

²⁵ Amun mmla kléfue nin Pharisifue dunman klôfue mun, an yakô! Yele ke an wunnzin klôwa nin talié'm bé sin, sannge liké ng'o ô nun'n an nyeen wué kéklé su amun kônvi kpli'n ti.

²⁶ Pharisifue anyansifue, dun mmua wunnzin klôwa'n nin talié'm bé klun lo nan i sin'n kusu wa yô yeiin.

²⁷ Amun mmla kléfue nin Pharisifue dunman klôfue mun, an yakô! Yele ke an ti ke ndia su sua bo ba ken i ayré ufué sa, i tale'n yô klaan, sannge i klun lo'n ti swran ôwié, nin ninngé tete wafa'n kwlaa.

²⁸ Amun kusu ke an ti soo. Ke swran'm bé wun amun'n, an fa swran kpa, sannge dunman klôle'n nin sa tete'n kwlaa bé ô amun awlen'n nun.

²⁹ Amun mmla kléfue nin Pharisifue (*f4*) dunman klôfue mun, an yakô! Yele ke an kplan Nyanmien nuan idyofue'm bé ndia'm bé su sua, ye an yô swran kpakpa'm be asiélie'm bé klaan.

³⁰ An sé ke: Se o ti ke é si'm bé ble su é ô le'n, wuun é nin bé é bô a yô'a kun ya ku'an Nyanmien nuan idyofue mun.

³¹ I so'n nun amun bobo an klé ke an ti bé nga bé kuun Nyanmien nuan idyofue mun'n bé wa.

³² Se o ti so'n, liké nga amun si'm bé bôli i bô'n, anh guegue i bô.

³³ ?Wuô, onda mma mun, se ye amunh yôh nan ba bu'a amun fo ba fa'a amun a oman nyrennen lika'n nuon?

³⁴ O man, nh sunmanh Nyanmien nuan idyofue nin ngwlelefue nin mmla kléfue mun amun sin. Amun wa kun wié, amunh bôbôh wié waka'n su, ye amunh bôh wié mun nin ngblé amun Nyanmien sua'm bé nun, amunh kléh bé yale klo'm bé su

³⁵ nan bé kwlaa nga ba yô'a sa te fi bo bé kuun bé'n ke o fin Abel nanwlefue'n i ble su lélé fa dyuu Barachie wa Zacharie bo an kunniin Nyanmien sua dan'n nin Nyanmien sowle'n bé afien'n, bé wié nde'n wa ka amun su.

³⁶ Nanwle, i kwlaa so'n o ti adyulisufue nga'm bé nde.

Kôkôle nga Jésus kôkôé Jérusalem ti'n

³⁷ Oô Jérusalem! Jérusalemfue bo an kun Nyanmien nuan idyofue mun'n, bo an fin bé nga bé sunman bé amun sin'n bé yebue'n, ble sunman n klô ke nh fleh amun mma mun, ke ako ta kun fle i mma mun o utu bé su'n sa, sannge amuan kpli'an su!

³⁸ Anh nian, amun awlô'n o wa ka amun sa nun, ye nde kun bo nh kanh klé amun'n ye, an su wu'an min kun,

³⁹ lélé san amunh séh ke: «Swran ng'o ba é Min Nyanmien'n i dunman nun'n, man i liké'n kwlaa yô yé.»